Baefeso 2 - Nouveau Testament en Kilega

Lonio Lukutuka ku Mponga.

¹ Nuinyue mualekanukile na Kalaga ku kabamba ka buagi, nu ku misako za buagi bueinyu,

² uzezo zimuakitaga wakalazi ku kuyanga lukita lua kisi kikino, nu kuyanga mukota wa magala ma mpelela, muuza wozo ukukita mulimo kano kaluma mu babo bekunana;

³ nu isue bansania tuikalaga gano wakalazi mu ntundo za bumba bueitu bua buagi, gatuazindilizagia ntundo za bumba bueitu bua buagi nu za makengelo meitu, nu ku bumba bueitu tunazugidue anga bango.

⁴ Tondo Kalaga, eli na kiombo nunse, ku lutundo luage luatutundile,

⁵ aba nkungu zezo zituale­kanukile na Kalaga, ku kabamba ka buagi, atulamizie na Klisto (ku mponga monezibue),

⁶ atuyukizie nage, nu atuikazizie nage muigulu, mu Klisto Yesu:

⁷ buno mu nkiko zavue alolesie iguma lia bikulo bia mponga zage nu busoga buage kutuli mu Klisto Yesu.

⁸ Kubuno ku mponga monezibue, ku bukatizio; nu bubuno tabuatukile kumuli mubenyene, buli lukaso lua Kalaga;

⁹ ta ku makitilo, muntu unsania anavua kuikaka.

¹⁰ Kubuno isue tuaki­tilue mueli, tuabumbilue mu Klisto Yesu, tukite makitilo masoga, malingile kukakizia Kalaga tutabange mumo.

Bantu baBilongo nu baYuda Bakundamanizibue ku Kalaga mu Lukuo lua Klisto.

¹¹ Ku bubuno kengelazi buno, wakalazi muabezaga bantu baBilongo ku lukita lua mubili, muamanagua buno Batamonesibua na babo beimanaga buno Bamonesibua, kuko kuakitilue ku mubili na maboko;

¹² buno ku nkungu zezo mualekanukile na Klisto, muabezaga muabandukana na kilongo kia balsalele, nu bageni ku luango luidagano, tamuabezaga na kilemanizio nu tamuabezaga na Kalaga mu kisi.

¹³ Tondo wakalazi muabezaga bulazi, kano kaluma mu Klisto Yesu museli buigi mu mikila za Klisto.

¹⁴ Ku­buno we eli bubobelelo bueitu, watukitile isue babili buno tube umozi, enduide kitutu kiabezaga gatusamba.

¹⁵ Na mubili wage asilile kutikia bubo buiti, u mulembe wikakizio uli mu meigisia; buno babili babe muntu umozi muto mueli, nu bubo abagomanizie;

¹⁶ nu akulumanizie babili ku Kalaga mu mubili umozi ku muti wa magu, ku kuita buiti kugo.

¹⁷ Nu avule kubasambalila bumugo­mania inyue babezaga bulazi, nu babo babezaga buigi:

¹⁸ kubuno mueli isue bansania tuseli buigi nelsi mu Muuza umozi.

¹⁹ U­mpanga tamuli lingo bageni aba batingi, tondo muse banyabo na basuagibua, bantu ba kikanga kia Kalaga,

²⁰ mukulindibua ga kibanza kia basingua nu balengania, Klisto Yesu wenyene eli ikozi inene lia kapindapinda;

²¹ mueli kubaka kunsania kuakulumanibua, nu kukula buno kube numba nsoga mu Mukota;

²² mueli nuinyue mualindibua buno mube kiziki kia Kalaga mu Muuza.