Baebelo 9 - Nouveau Testament en Kilega

Bitondo Bia mu Numba za Nsulu Tabinasuaga.

¹ Umpanga muidagano itangi muakakizizibue meigisia, nu lia­bezaga na busio buasuagibua nunse bua kisi kikino.

² Kubuno numba za nsulu zobakilue; mu busio butangi muabezaga kibikilo kia kasuku, nu meza, nu tumpampa tua kalolesio, bubo busio bua­managua buno Bua Kizila.

³ Nu lisa lia nsulu zibili kuabezaga bungo busio buamanagua Kiziki Kia Kizila kutinga nunse;

⁴ bubo buabezaga na kiziki kia kayulo ka olo, nu sanduku zeidagano zakukilagua na olo mu ntungo insania, mumo muabezaga kituma kia olo kiabezaga mu mana, nu musumbo wa Alona wasaga nsamba, nu mbabu za makozi meidagano;

⁵ gantata gazo gabe­zaga makelubi ma lutanuno mabikile mpololo ga kisumbi kia kiombo; umpanga tatunavuama kusambala musagu wa bitondo bibino.

⁶ Umpanga gasilile bitondo bibino, basankoga bendaga bindi binsania mu busio butangi bua numba za nsulu, kuzindilizia milimo zabo;

⁷ tondo mu bungo busio bua mabili sankoga munene eingilaga wenyene, limbizi limozi muaka na muaka, tondo nteingilaga ndi nteli na mikila za kukasana ku kabamba kage wenyene, nu ku kabamba ka misako za buagi za bango bantu.

⁸ Muuza Wasililila alolesizie kitondo kikino buno, nzila za kuingila mu busio bua kizila tazikandulua, kungua numba ntangi zikizeimana;

⁹ u kalolesio ka kano kaluma; nkaso nu bisansa bikukasanua tabinavuama kusililizia muntu ukukumbamina

¹⁰ (kubuno malia, nu bikunubua, nu koga kua nkita ningi), bili makakizio ma mubili tugu, biakakizizibue aba nu kugaluka kua misako.

Lukuo lua Klisto Luasuagia Binsania.

¹¹ Tondo gavule Klisto, eli sankoga munene wa bitondo bisoga biabe, ku numba zezo nnene nu zasililila nunse, zitobakilue na bantu, buisulilua buazo, ta za kisi kikino,

¹² tondo ta na mikila za mpene nu za biana bia ngombe, tondo na mikila zage wenyene, eingide limbizi limozi mu busio bua kizila, nu abede na bukuluzi butanakuzinda.

¹³ Kubuno ndi mikila za mpene nu za balume ba ngombe, nu luito lua ibuti lia ngombe luasasidue gantata bantu beli na nsese nti biasuagia nu nti biengia mubili:

¹⁴ embe lino mikila za Klisto wikasene wenyene ku Muuza Wasililila utanakuzinda geteli itondoki ku Kalaga, zikengia kalenganio keinyu ku makitilo ma lukuo buno mukitile Kalaga uli Mulami?

¹⁵ Nu kububuno eli mukulumania weidagano ito, buno lukuo luabede ku kukulula ku misako za buagi zeidagano itangi, babo bamaninue buno babe neidagano lia bupieni butanakuzinda.

¹⁶ Kubuno ndi kuli idagano, idagano lilino lina­zindilila ndi wozo walilagaga akua.

¹⁷ Kubuno idagano linazindilila kungua walilagaga akua; kubuno talinazindilila ndi wozo walilagaga ekiligo.

¹⁸ Kububuno lilio itangi talinalingilue geteli mikila.

¹⁹ Kubuno gasilile kutenda Mose ikakizio neikakizio lia mulembe ku bantu bansania, atolile mikila za biana bia ngombe nu mpene, gamozi na mazi nu mioza zakisimana za mikoko, nu hisope, nu asaside ku mukanda nu ku bantu bansania,

²⁰ atendile bune, Zeno zili mikila zeidagano limuakakizizibue na Kalaga.

²¹ Nu bubo asaside mikila ku numba nu binsania bia meigisia.

²² Nu mu mulembe buigi na binsania biengizibue na mikila; nu gatanabasile mikila takunabede kusigilila.

²³ Umpanga buatunganene kisusania kia bili mu meigulu buno beingibue nazo; tondo bili mu meigulu bikuengibua na bisansa bisoga nunse kutinga bibino.

²⁴ Kubuno Klisto nteingide mu busio bua kizila buobakilue na bantu, u kisusania kia kikio kia bulili; tondo muigulu, buno amoneke kano kaluma ku Kalaga ku kabamba keitu;

²⁵ tondo nteingide buno eikasane mambizi meingi, anga buingilaga sankoga munene mu busio bua kizila na muaka na muaka na mikila ziteli zage;

²⁶ songo bubo anababazizi­bue mambizi meingi kutukila kulinga kua kisi: tondo kano kaluma ku kuzindilila kua nkiko amonekile limbizi limozi buno atikie buagi ku kisansa kiage wenyene.

²⁷ Nu eka bubo bukubikilua bantu kukua limbizi limozi, nu kusila kua kukua lusungio;

²⁸ bubo Klisto nuwe eikasene limbizi limozi buno eke buagi bua bantu beingi, nu ntakavua lingo limbizi kueka buagi, tondo akavua kubabo bekumulindila buno bonibue.