Baebelo 7 - Nouveau Testament en Kilega

Yesu eli Sankoga Munene Anga Melekezedeke.

¹ Kubuno wozo Melekezedeke, Mukota wa Salema, sankoga wa Kalaga uli Munene, wakulumene na Abalahama gatukaga kua­kindaga bakota, amukitide mponga,

² nu Abalahama amukasile kindi kikumi kia binsania; (abezaga Mukota wa kuisanana ubuisu­lilua buizina liage, nu Mukota wa Salema, buisulilua bualio, u Mukota wa bubobelelo;

³ nteli neisi, nteli na nina, nteli na kibuti, bindi biage tabinakulinga, nu kalamo kage takanakuzinda; tondo asusananizibue na Muana wa Kalaga), ekubezaga sankoga kankanka.

⁴ Kengelazi buabezaga muntu wono munene, nu Abalahama, tatanguluisue, amukasile kindi kikumi kia bikagi bianyagile ku bita.

⁵ Nu ku babo bana ba Lewi ubakasagua busankoga bakakizizibue ku mulembe buno bakasue kindi kikumi na bantu, u mibuto zabo, tondo babezaga kikanga kia Abalahama:

⁶ tondo we utabezaga wa kikanga kiabo akasilue kindi kikumi na Abalahama, nu akitide wozo uli na lilio idagano mponga.

⁷ Tondo takuli unakania nunse, mu­keke ekukitua mponga na munene.

⁸ Nu gano bantu bekukuaga bekukasagua kindi kikumi; tondo kuko kuli wozo ukusambala buno eli na kalamo,

⁹ nu, tunatenda buno, Lewi ukukasagua kindi kikumi, akaseine kindi kikumi mu Abalahama;

¹⁰ kubuno isi abezaga ntemubuta, gakulumene na Melekezedeke.

Yesu Atinga baLewi.

¹¹ Umpanga ndi kusililila kuabezaga ku busankoga bua Lewi (kubuno kubo bantu bakasilue mulembe), buni lingo buneiyaninua ungo ku busankoga ku lukita lua Melekezedeke, nu kutamanua ku lukita lua Alona?

¹² Kubuno ndi busankoga buagalukibua, kasi mulembe nugo nti wagalukibua.

¹³ Kubuno we wasambedue bubo abezaga muntu wa kingo kilongo, tondo takuli muntu umozi wa kiki­no kilongo wakitaga ku kayulo,

¹⁴ Kubuno buligo buno Mukota weitu atukile mu Yuda; kilongo kitatekuidue na Mose ku kitondo kia busankoga.

¹⁵ Nu bubo butukutenda bukumenyua nunse, buno ndi kuamoneka ungo sankoga ku lukita lua Melekezedeke,

¹⁶ wabikilue, ta ku mulembe wikakizio lia mubili, tondo ku magala ma kalamo katanakuzinda.

¹⁷ Kubuno ubualongekedue bune, Uwe uli sankoga utanakuzinda, Anga lukita lua Melekezedeke.

¹⁸ Kubuno kuli kutikibua kua lilio ikakizio itangi ku kabamba ka mutambo walio nu kutasuaga kualio

¹⁹ (kubuno mulembe wozo tawasililizizie kena), tondo kulusia kilemanizio kisoga nunse, mu kikio tuakunda ku Kalaga.

²⁰ Nu bubo tabuabede gatalumbidue

²¹ (kubuno babo babikilue basankoga geteli kilumbilo; tondo wono alumbidue na wozo wamubuide, Mukota alumbide aba ntakeibezia, Uwe uli sankoga utanakuzinda);

²² umpanga ku kitondo kikino Yesu abede muima weidagano isoga nunse.

²³ Nu babo babikilue basankoga beingi, kubuno bakuaga:

²⁴ tondo kubuno we ekuikalaga nkiko na nkiko, eli na busankoga butekugaluka.

²⁵ Nu ku bubuno we ekuvuama konia nunse babo bekukunda ku Kalaga mueli, kubuno ekulamaga bindi binsania buno abasegele.

²⁶ Kubuno buatutananine buno tube na sankoga munene anga wono, wasililila, uteli na bubi, uteli neitondoki, walekanukizibue na bagi, asakamizibue kutinga meigulu;

²⁷ nteikitide kisansa anga buikitilaga babo bango basankoga banene busi na busi, alingaga kui­kitila kisansa ku misako zage za buagi buage wenyene, nu kungua asila kuikitila wenyene, nti akitila misako za buagi za bango bantu; tondo we akitile bubo tugu limbizi limozi, geikaseine wenyene.

²⁸ Kubuno mulembe ukubikaga bantu batamba buno babe basankoga banene, tondo kulumbila kuabede, nti mulembe useli, nu kuabikile Muana wasililila ku nkiko na nkiko.