Baebelo 6 - Nouveau Testament en Kilega

¹ Kububuno tusigazi bitondo bitangi bia musagu wa Klisto, tuidangiazi aba nu ku kusililila; tatubike lingo kibanza kia kuiyania ku makitilo ma lukuo, nu bukatizio ku Kalaga,

² nu meigisia ma bubatizio, nu kubikua kua maboko, nu kuyukibua ku lukuo, nu lusungio lutanakuzinda.

³ Tunakita bubo, ndi Kalaga aziga.

⁴ Kubuno tabuakulungana ku bantu babo basanizibue kiengi, nu kusonda lukaso lua kuigulu, nu bagomanizie na Muuza Wasililila,

⁵ nu kusonda idagi isoga lia Kalaga, nu magala ma nkiko zikavua,

⁶ nu ndi basiga bibio, tabunakulungana kubasubia ku kuiyania kuto; kubuno bekutaka Muana wa Kalaga lingo, nu bekumuitia na nsoni.

⁷ Kubuno mazi ma mbula makubombaga mu kisi, nu kisi kikuasagia biyikanua ku babo bekubilima ku magala ma Kalaga:

⁸ tondo ndi kiagia miti zili na mikele nu binkelenkele, nti kise kiasombua nu nti kise buigi na kusuililua; kuzinda kuakio kugisibua.

⁹ Tondo, batundua bane, tuizi buno, misako zeinyu zili misoga nu zili na lonio:

¹⁰ kubuno Kalaga eisanana nu ntaneibilila mulimo weinyu nu lutundo lumualolesezie kuizina liage, kubuno muakitide basuagibua, aba nu kano kaluma mukili muabakitila.

¹¹ Tondo tukutunda nunse na muntu na muntu kumuli abe na komanizia ku kumenyinina nunsania kilemanizio aba nu kuzinda:

¹² buno tamube basosu, tondo kususania babo bapieni beidagano ku buka­tizio nu ku nkiki.

Malagano ma Kalaga Makutulindia.

¹³ Kubuno Kalaga galagile Abalahama idagano, kubuno taku­abezaga ungo wamutinga wanalumbide, eidumbide wenyene,

¹⁴ ekutenda bune, Lebelebe nakukite mponga nunse, nu neitizie kikanga kiobe nunse.

¹⁵ Nu bubo, mu kuikalila kuage, eikile ku lilio idagano.

¹⁶ Kubuno bantu bekulumbila wozo watinga munene; nu ku kulumbila kuabo nti miango zasila.

¹⁷ Mu kitondo kikino Kalaga atundile kulolesia bapieni beidagano lilino buli luango luage nunse, lutanagaluka, nu alumbide;

¹⁸ buno, ku bitondo bibili bitanagaluka, mubio Kalaga ntaneka buza, buno tube na magala, nu tuatinine ku kilemanizio kikio kituabikidue buno tukikokomezie;

¹⁹ kituli nakio anga nanga za kalamo, kili bulonge bukata nu kialinda, nu kikuingilila ku muingilo kuli nsulu;

²⁰ kuko kualingile kutuingila Yesu, nu abede sankoga munene utanakuzinda, anga ku lukita lua Melekezedeke.