Baebelo 4 - Nouveau Testament en Kilega

Babo Bakatizia Yesu Bakabasa ku Kiumuno Kiage.

¹ Umpanga, ndi idagano lia kubasa ku kiumuno liabasa kutuli, tukue boba kububo muntu umozi wa kutuli anavua kutabasa kukio.

² Kubuno isue tuasambalidue musagu musoga, anga babo: tondo musagu wozo gubongule kugo tabawangile, kubuno tababede bumozi mu bukatizio na babo bongule.

³ Kubuno isue bakatizizie tukubasa ku kiumuno kikio; anga bubo buatendile bune, Anga bunalumbide ganongagua, Tabakabasa ku kiumuno kiane: aba ganasilile zezo milimo kutukila kulinga kua kibanza kia kisi.

⁴ Kubuno atendile mu kiziki kimozi ku musagu wa busi bua mutuba kamo bubuno, Kalaga omuinue ku milimo zage insania busi bua mutuba kano:

⁵ nu ku kiziki kikino lingo, Tabakabasa ku kiumuno kiane.

⁶ Umpanga mu kuba kitondo kikino kiasigede buno bamozi baka­basa, nu babo basambalidue musagu wozo wakalazi tababasile kubuno bananine;

⁷ abikile bungo busi, Lelo, atendile ku Davidi gatingile miaka mingi (anga bualingile kutendua), Lelo ndi mungua kuiyuki liage, Tamulimbanie mitima zeinyu,

⁸ Kubuno songo Yosua abomuzizie, songo ntanatendile bungo busi.

⁹ Umpanga kuasigala kiumuno ku busi bua Sabato ku bantu ba Kalaga.

¹⁰ Kubuno wozo wabasa ku kiumuno kiage wenyene asila kumunua ku mulimo wage, anga bubo bumuinue Kalaga ku mulimo wage.

¹¹ Ububo tusasie kubasa ku kiumuno kikio, buno muntu unsania anavua kuaga ku Iukita luluno lua kunana.

¹² Ku­buno idagi lia Kalaga likulamaga, nu lili na magala, nu lili ikali kutinga bupanga bukusesaga ku ntungo ibili; likusumita aba kule­kanukia kalamo na muuza, nu ngiginyo nu mungongo wa makua, nu likumenyinina makengelo nu ntundo za mutima.

¹³ Aba takuli kibumbua kiatakumonako: tondo wozo utukukitila ekumona ku binsania.

Yesu Atinga Aluni nu Basankoga ba Lewi.

¹⁴ Umpanga mu kuba tuli na sankoga munene weingide muigulu, u Yesu Muana wa Kalaga, tukokomezie nunse bukatizio bueitu.

¹⁵ Kubuno tuli na sankoga munene unavuama kutukuila kiombo ku mutambo weitu, kubuno alindikilue mu bitondo binsania anga butu­kulindikagua, tondo ntagile.

¹⁶ Umpanga tukundazi ku kisumbi kia bukota nu kia mponga na kilemanizio, buno tukuilue kiombo, nu tukitue mponga za kutukasia ku nkungu zitukuiyanina.