Baebelo 3 - Nouveau Testament en Kilega

Yesu Atinga Mose.

¹ Umpanga, mibuto zane basuagibua, beizi mubila wa kuigulu kengelazi nunse musingua nu sankoga Munene wa bukatizio bueitu, u Yesu;

² wozo wamubikile amumenyine buno eli muka­tizia anga buabezaga Mose mu numba za Kalaga.

³ Kubuno muntu wozo abezaga na lutanuno kutinga Mose, kubuno we wobaka numba eli na luanzo kutinga numba zobakaga.

⁴ Kubuno na numba na numba nazikubakua na muntu, tondo wakitile binsania u Kalaga.

⁵ Nu Mose abezaga mukatizia mu numba za Kalaga anga mukobe, kuba mulongeki wa bitondo bikatendua;

⁶ tondo Klisto abezaga muana wage, muangati wa numba za Kalaga; numba zage u isue, ndi tualinda mu kilemanizio nu kuiganuna mu mbogimbogi zeitu na magala aba nu kuzinda.

Bantu ba Kalaga Beidange Tabasombe Kitondo kia Yesu.

⁷ Bubo anga buatenda Muuza Wasililila bune, Lelo ndi mungua kuiyuki liage,

⁸ Tamulimbanie mitima zeinyu, anga ku busi bua kubenga, Anga ku busi bua kulindika mu kalula.

⁹ Gandindikile basoinyue mu kungeleka, Nu bamonine ku makitilo mane miaka makumi manazi.

¹⁰ Ku bubuno nongilue na kibuti kikio. Nu natendile bune, Bekuaga bindi binsania: Nu tabamenyine nkita zane;

¹¹ Anga bunalumbide ganongagua, Tabakabasa ku kiumuno kiane.

¹² Muidange, mibuto, buno takube umozi kumuli uli na mutima mubi utakatizia, nu kuidekanukia na Kalaga uli mulami:

¹³ tondo muanane busi na busi, aba bukumanua Lelo; buno muntu wa kumuli ntabe mubibu ku kuengelelua ku buagi:

¹⁴ kubuno tuse tuagomia na Klisto, ndi tualinda mu kilemanizio kietu kia kulinga aba nu kuzinda:

¹⁵ aba ndi buatendua bune, Lelo ndi mungua kuiyuki liage, Tamulimbanie mitima zeinyu, anga ku busi bua kubenga.

¹⁶ Kubuno banazi, bamubengile gabongule? ndi tababo bansania batukile ku Ezipeto basondelezezibue na Mose?

¹⁷ Banazi bongeidue miaka makumi manazi? ndi tababo bagile, nu bitumba biabo biabolile mu kalula?

¹⁸ Nu banazi balumbilide buno taba­kabasa ku kiumuno kiage, ndi tababo bananine?

¹⁹ Ububo tuizi buno tababasile ku kabamba ka kutakatizia kuabo.