Baebelo 13 - Nouveau Testament en Kilega

Bitondo Bikutunda Kalaga Bantu Bage Bakite.

¹ Mibuto zane, elamanazi kankanka.

² Tamuibilile kuse­kela bageni: kubuno bango basekede migenzi nu taba­bamenyaga.

³ Kengelazi babo bakandua, anga buno muakandua nabo; nu babo bekubabalua, kubuno nuinyue muli na mubili anga babo.

⁴ Isonga lianzue na bantu bansania, nu mugu usuage: kubuno bitazi nu beiti ba meiga Kalaga akabasungia.

⁵ Tamuelame bikulo; bogazibogazi na bimuli nabio; kubuno we wenyene atendile bune: Nsikakuibilila nunse aba nsikakusiga nunse,

⁶ kasi tukutenda bubuno na kilemanizio, Mukota ekunkasagia, nsiakue bantu boba; Bankite buni?

⁷ Kengelazi babo bamusondelezagia, bamusambalilaga idagi lia Kalaga; nu kengelazi bubakitaga nti tabekua, susaniazi bukatizio buabo.

⁸ Yesu Klisto eli bumozi kankanka, walubi nu lelo aba nu ku nkiko na nkiko.

⁹ Tamuzangibuezangibue na meigisia meingo nkita, nu matasusania na mamo mamuigisizibue, kubuno buli busoga buno mutima ulindibue na mponga; aba ta ku nkita zeidia, kubuno babo babezaga nazo tababede na mutali.

¹⁰ Tuli na kayulo, buno babo bekukita mulimo mu numba za nsulu tabeli na buangato bua kulia biako.

¹¹ Kubuno bitumba bia nyama zezo biagisibagua kuisula lia muino, nu mikila zazo zekagua ku busio bua kizila na sankoga munene ku kabamba ka buagi.

¹² Ku kabamba kakano Yesu, nuwe buno asuagie bantu ku mikila zage wenyene, ababazizibue kuisula lia muino.

¹³ Kasi tuendazi kueli kuisula lia muino nu kubengua anga buakubengua.

¹⁴ Ku­buno gano tatuli na muino ukuizizagia, tondo tukulonda wozo ukavua.

¹⁵ Kueli tukase Kalaga kisansa kia luganuno bindi binsania, ububo kutenda ku kanua nti tuitabizia izina liage.

¹⁶ Tondo tamuibilile kukita busoga nu kugomania: kubuno bisansa anga bibino biku­tananizia Kalaga.

¹⁷ Anzazi basondelezia beinyu, ibotiazi kubeli; kubuno babo bekumulanga, anga bantu bekusambala bubakitaga; buno bakite bubo ku mbogimbogi, aba takueinia mutima; kubuno tabunamutananine.

¹⁸ Tusegelazi; kubuno tuizi buno tuli na bumenyinino busoga, nu tukutunda kukita busoga mu bitondo binsania.

¹⁹ Nunne nkumuana nunse mukite bubo, buno nisasie kusubia kueinyu.

²⁰ Umpanga, Kalaga wa bubobelelo, wayukizie lingo mulangi munene wa mikoko ku bakuzi ku mikila zeidagano litanakuzinda, we mukota weitu Yesu Klisto,

²¹ amusililizie mu bitondo binsania bisoga kukita kusombola kuage; nuwe akite mumuli buamutanani­zia, ku Yesu Klisto; eli na lutanuno ku nkiko na nkiko zitana­kuzinda.

²² Tondo nkumusengezia, mibuto zane, unguililazi bunkutenda; kubuno namusanzila moki mamozi.

²³ Menyazi buno mubuto weitu Timoteo akandulua; nu ndi asasia kuvua, nti muatumoneko kuko kueinyu.

²⁴ Muansambizizia babo bansania bekumusonde­lezia, nu basuagibua bansania. Babo beli ku Itali bamusambizia.

²⁵ Mponga zibe neinyue bansania. Amena.