Baebelo 10 - Nouveau Testament en Kilega

Bisansa Biakasanaga baLewi Tabiasuaga.

¹ Kubuno mulembe uli kisusania kia bitondo bisoga bikaba, tondo ta kisusania kikinyene kia bibio, ku bisansa bibio bibakasanaga muaka na muaka tabinavuama kusililizia babo beku­bilusia.

² Songo bubo bisansa tabinalekedue kukasanua, kubuno songo babo bekukumbamina bese basila kuengibua kalazi, tabeni­menyine buno beli na misako za buagi.

³ Tondo mu bisansa bibio muli kakengelesio ka misako za buagi muaka na muaka.

⁴ Kubuno tabuakulungana mikila za balume ba ngombe nu za mpene kutikia misako za buagi.

⁵ Kububuno, gavule mu kisi, atendile bune, Ntuatundile kisansa nu lukaso, Tondo wankitide mubili;

⁶ Ntuatananizizibue na bisansa bikugisibua nu bisansa bia misako za buagi:

⁷ Ububo natendile bune, Kalaga, Unguilila, navua (mu kigondi kia mukanda buna­sanzidue), Kukita anga buwasombuede.

⁸ Anga bukutenda gambakamia buno, ntuatundile bisansa, nu nkaso, nu bisansa bikugisibua, nu bisansa bia misako za buagi, aba ntuatananizizibue nabio (bibio biakasanagua anga buakakizizibue ku mulembe),

⁹ u gago atendile bune, Unguilila, navua kukita anga buwasombuede. Atikizie itangi, buno abike lia mabili.

¹⁰ Mu kusombola kukuno tuasuagizibue ku kuikasana mubili kuikasene Yesu Klisto limbizi limozi tugu.

¹¹ Nu sankoga na sankoga nawemanaga busi na busi kukita mulimo wage, nu akasanaga bisansa bibino mambizi meingi, nubio tabinavuama nunse kutikia misako za buagi:

¹² tondo wono, gakasene kisansa limbizi limozi tugu ku misako za buagi nu kikuikalaga nkiko na nkiko, eikede ku kuboko kua seidume kua Kalaga;

¹³ aba nu galindile kuangata beiti bage.

¹⁴ Kubuno asililizizie babo basuagibua ku kisansa kimozi ku nkiko na nkiko.

¹⁵ Nu Muuza Wasililila ekutulongekela; kusila kua kutenda bune,

¹⁶ Lilino u idagano linkalagana nabo Kutinga kua bindi bibio ubukutenda Mukota: Nabike milembe zane mu mitima zabo, Nu nazisanze mu makengelo mabo:

¹⁷ Ubuakutenda bune, Nu misako za buagi buabo nu za mibi zabo nsikazikengela lingo.

¹⁸ Umpanga ndi kuse kusigililua kua zeno, nti takuli lingo kingo kisansa kia buagi.

Bakatizia Bekukunda Kalaga.

¹⁹ Umpanga, mibuto zane, tatuli na boba ku kuingila mu busio bua kizila ku kabamba ka mikila za Yesu,

²⁰ ku nzila nsoga nto za kala­mo za tuatide zatinga mu nsulu za busio bua kizila, bubo u mubili wage;

²¹ nu kuba na sankoga munene wangata numba za Kalaga;

²² tukunde na mutima umozi na kilemanizio kinsania ku bukatizio, mitima zeitu zengezibue, buno tusige makengelo mabi, nu mibili zeitu zogezibue na mazi menga,

²³ tukokomezie nunse bulongeki bua kilemanizio kietu buno tatutengetenge; kubuno we walagile eli mukatizia;

²⁴ tukengelane kulindania ku lutundo nu ku makitilo masoga;

²⁵ tatulekele kukundamana anga bukukita bango, tondo tuanane, nu tuitile kukita nunse bubo, bumukumenya buno busi bubo buse buigi.

Musanzi wa Mukanda Wono Ekubakengelesia.

²⁶ Kubuno ndi tuagilila lingo neisela nu tuse na bumenyinino bua bulili, takuli lingo kingo kisansa ku kabamba ka misako za buagi,

²⁷ tondo tugu nti kuse kulindia kubibu kua kusungibua, nu keiya kakali kakagisia babo beiti.

²⁸ Muntu wabenga mulembe wa Mose nti akua ntaguninue, ku bulongeki bua bantu babili aba basatu:

²⁹ mukukengela buni, ndi ntanasungibua nunse wozo muntu wanyantile Muana wa Kalaga, nu kunyega zezo mikila zeidagano, zasuagizibue muzo, nu kubenga Muuza Wasililila wa mponga?

³⁰ Kubuno tuizi wozo watendile bune, Kusuba kuli kundi, noka­suba, nu lingo, Mukota akasungia bantu bage.

³¹ Buli bubibu nunse kukatua mu maboko ma Kalaga uli Mulami.

³² Tondo kengelazi bibio bindi bitangi, mubio muasanizibue na kiengi, nu muababazibue nunse;

³³ ku bubo muabengilue ku ma­bingo nu mbabazio; nu lingo muagomezie na babo bababazizibue bubo.

³⁴ Kubuno muakuilide babo babezaga bakandua kiombo, muabogilebogile gamuanyagua bikulo bieinyu, kubuno muamenyine buno muli na bikulo bisoga nunse muigulu bikekalaga.

³⁵ Umpa­nga tamukutue mu kilemanizio kieinyu, kubuno kili na lukalilo lunene.

³⁶ Kubuno mukutunda kuba na nkiki, buno, gamuna­kita kusombola kua Kalaga, buno mube na lilio kuidagano.

³⁷ Ta bindi bingi nunse, We ukuvua avue, nu nteizizie.

³⁸ Tondo, weisanana wane akalama ku bukatizio; Nu ndi ekuzingazinga, nti nsikabogaboga nage.

³⁹ Tondo tatuli anga babo bekuzingazinga nu bekuzimina, tondo tuli anga babo beli na bukatizio bunatonia.