2 Petelo 3 - Nouveau Testament en Kilega

Kengelazi Busi Buzinda.

¹ Batundua bane, kano kaluma mukanda wono uweibili una­musanzila; mu wono nkulindia mitima zeinyu ku kumukenge­lezia;

² buno mukengele malagi matendagua wakalazi na balengania basuagibua, nu kuko kukakizia kua Mukota Monia kualusizibue na basingua beinyu:

³ menyazi tanga, kitondo kikino buno ku busi bua kuzinda kukaba beliliki, bayangi ba ntundo zabo,

⁴ nu bakatenda buno, Kuni kuli idagano lilio lia kuvua kuage? kubuno, kutukila kukua kua batateisue binsania bili anga bubiakitilue.

⁵ Kubuno batu­ndaga kuibilila kitondo kikino, buno kutukila wakalazi kuabezaga meigulu, nu kisi kiakitilue mu mazi nu kiatukile mu mazi, kuidagi lia Kalaga;

⁶ bubo kisi kikio kitangi kiakokile mu mazi, nu kiabi­gizibue:

⁷ tondo meigulu ma kano kaluma, nu kisi, biabikilue milanga ku keiya kuidagi lilio, bikibialindila ku busi bua lusungio nu nkungu za kusungibua kua bantu batanza Kalaga.

⁸ Tondo, batundua bane, tamuibilile kitondo kikino buno busi bumozi ku Mukota nti miaka kanunu, nu miaka kanunu nti busi bumozi.

⁹ Mukota ntakugalukia kuzindilizia idagano liage, anga bukugalukia bango; tondo ekuikalila, ntakutunda muntu unsania kuzimina, tondo bansania beiyanie.

¹⁰ Kubuno busi bua Mukota bukavua anga bukuvuaga muibi; ku busi bubo meigulu makazumia mizumio mibibu, nu binsania bia bumba bikanyenguka na keiya, kisi nu misako zili mukio zikazika.

¹¹ Umpanga bibino binsania bikanyenguka, buni nuinyue bumuatunganana kulama kalamo kasuagibua nu kuanza Kalaga,

¹² mukulindila nu mukutunda nunse buno busi bubo bua Kalaga buavue, kubuno meigulu maka­nyenguka na keiya kanene, nu binsania bikanyenguka nu kugia?

¹³ Tondo ku kabamba keidagano liage, tukulindila meigulu mato, nu kisi kito, muli buisanana.

¹⁴ Kubuno batundua bane, ndi mukulindila bitondo bibino, iko­komeziazi buno tamube neitondoki aba kabalibango kueli mu bubo­belelo,

¹⁵ Nu kengelazi kuikalila kua Mukota weitu buno kuli lonio; anga bubo buamusanzide mubuto weitu mutundua weitu Paolo ku menge makasilue;

¹⁶ bubo bubo anga mu mikanda zage insania, atendile musagu wa bitondo bibino muzo; mu mikanda zeno bitondo bimozi bili bibibu kumenyinina; ku babo beteli na menge nu tabakokomena bekuzimina anga mango masanzo, ku kuzimina kuabo bobenyene.

¹⁷ Umpanga inyue batundua bane, ndi mualinga kumenya bitondo bibino, kasi idangazi, munavua kuekua na misako mibi za bantu babi, munavua kutaba na magala.

¹⁸ Tondo mukule mu mponga, nu kumenya Mukota u Monia weitu Yesu Klisto. Kueli kuli lutanuno aba kano kaluma nu nkiko zitanakuzinda. Amena.