1 Yoana 5 - Nouveau Testament en Kilega

Kukatizia Muana wa Kalaga Kuatinga Bitondo Binsania.

¹ Unsania wakatizia Yesu buno eli Klisto nti abutua na Kalaga: nu unsania watunda wamubuta nti atunda wozo wabutilue.

² Ku bubuno tuamenyinina buno tuatunda bana ba Kalaga, ndi tuatunda Kalaga nu kukatizia makakizio mage.

³ Kubuno kukuno ukutunda kua Kalaga buno tuanze makakizio mage; nu makakizio mage ta mabibu.

⁴ Kubuno kinsania kiabutilue na Kalaga kiku­kindaga kisi: nu kukuno ukukindua kukukindagua kisi, ububo buka­tizio bueitu.

⁵ Nazi ukukindaga kisi, tondo ndi ta wozo wakatizia buno Yesu eli Muana wa Kalaga?

⁶ Uwono, Yesu Klisto wavule ku mazi nu mikila; ta ku mazi tugu, tondo ku mazi nu ku mikila.

⁷ Nu Muuza ukulongeka, kubuno Muuza ubulili.

⁸ Kubuno basatu beli balongeki, Muuza, nu mazi, nu mikila: nu basatu babano beli umozi.

⁹ Nu ndi tukukatizia bulongeki bua bantu, kasi bulo­ngeki bua Kalaga buli bunene nunse; kubuno bulongeki bua Kalaga ububuno, bualongekede Muana wage.

¹⁰ Nu na wakatizia Muana wa Kalaga eli na bulongeki mueli: nu na utakatizia Kalaga nti eku­muekia buza; kubuno ntakatizia bulongeki bua Kalaga bualonge­kede Muana wage.

¹¹ Nu bubuno ubulongeki, buno Kalaga atu­kasile kalamo katanakuzinda, nu kalamo kakano keli mu Muana wage.

¹² Kubuno we uli na Muana eli na kalamo kakano; nuwe uteli na Muana wa Kalaga nti nteli na kalamo kakano.

Bekukatizia Yesu Klisto Beli na Kalamo Katanakuzinda.

¹³ Namusanzila bitondo bibino mumenye buno, muli na kalamo katanakuzinda, inyue bakatizia izina lia Muana wa Kalaga.

¹⁴ Nu bubuno ubupuka butuli nabo kueli, ndi tuasega kio kinsania anga bubo buli kusombola kuage, nti atungua:

¹⁵ nu ndi tuizi buno eku­tunguaga ku binsania bitukusegaga, nu nti tuizi buno tuli nakio kinsania kituamusegile.

¹⁶ Nu ndi muntu amona mubuto wage aga buagi buteli bua lukuo, nti asega, nu Kalaga nti amukase kalamo ku kabamba ka babano baga buagi buteli bua lukuo. Kuli buagi bua lukuo: nsikutenda buno nti amusegela.

¹⁷ Nu kuteisanana kunsa­nia kuli buagi; nu kuli buagi buteli bua lukuo.

¹⁸ Tuizi buno unsania wabutua na Kalaga ntakugomagia na buagi; tondo we wabutua na Kalaga, nti ekuidanga, nu wozo mubi ntetubie kueli.

¹⁹ Tuizi buno tuli ba Kalaga, nu kisi kinsania kili kia wozo mubi.

²⁰ Nu tuizi buno Muana wa Kalaga avule, nu atukasile menge, buno tumenye buno we eli bulili, nuisue tuli mu wozo wa bulili, uwozo Muana wage Yesu Klisto. Wozo eli Kalaga wa bulili, nu kalamo katanakuzinda.

²¹ Bana bane bakeke, idangazi na nkisi.