1 Yoana 1 - Nouveau Testament en Kilega

Mukanda Mutangi wa Yoana. Yoana Ekubasambalia Bitondo Biamonine Kubio nu Biongule Kubio.

¹ Lilio liabezaga mukulinga, tualiunguleko, nu tualimonineko na meiso meitu, nu tualilolile, nu maboko meitu malibabatile, ku musagu weidagi lia kalamo

² (nu kalamo kalolesizibue nuisue tuaka­monineko, nu tuakalongekile, nu tuasambede kumuli kako kalamo, kalamo katanakuzinda, kabezaga kulsi, nu tuakamonineko);

³ lilio lituamonineko nu litungule kulio, ulilio litukumusambalila; buno nuinyue mugomie neisue: nu mugomio weitu uli mu Tateisue, nu mu Muana wage Yesu Klisto:

⁴ nu tuamusanzila bitondo bibino, buno mbogimbogi zeitu zizindilile.

Kalaga Akasigilila Buagi Bueitu.

⁵ Nu wono umusagu utungule kueli nu kusambala kumuli, buno Kalaga eli kiengi, nu mueli tamuli kapilo nunse.

⁶ Ndi tuatenda buno, tuagomania nage tondo tukuenda mu kapilo, nti tukueka buza, nu nti tatukukita bulili:

⁷ tondo ndi tukuenda mu kiengi, anga bubo bueli mu kiengi, nti tuagomania bueitu bueitu, nu mikila za Yesu Muana wage nti zatusuga ku misako za buagi bunsania.

⁸ Ndi tuatenda buno tatuli na buagi, tukuiyengelela, nu bulili tabuli mutuli.

⁹ Ndi tukuigongaga misako zeitu za buagi, we eli muka­tizia nu wisanana nti atusigilage misako zeitu za buagi, nu nti atusug­age ku binsania biteisanana.

¹⁰ Ndi tuatenda buno tatuagile nu isue tatuli na buagi, nti tuamuekia buza, nu idagi liage nti talili mutuli.