Yoane 8 - Le Nouveau Testament in Kele (Lokele) 1958

Ndai kofa boto wasi se?

¹ Nde Yesu lɔkɛ nda löngo loa Elaya.

² Lɛlɛngɔ la nɔngɔ Inde lɔɔtɔ liasi nda Ndakɔ ya Mungu la batotina loya end’Inde omao, Inde loyala se ndoekes’iyo.

³ Batikasa la BaFalusi loeshel’Inde otomali oyaoshomu lau ani asotwa nyongo. Iyo loemesa botomali atiteni yau,

⁴ limɔ iyo loonga la Yesu mbo— Boekesi, botomali-bo looshomo ani akotwa nyongo;

⁵ Mɔsɛ nda Bikela lotel’iso ndola mbo tooleke ebɔfɔnɔ-bo wa boto ko la fëngu ya batalɛ; ¿Aɛ nd’atoonga moni loasɔ loande?

⁶ Iyo loonga ongoma ko ndokɔtɔlɔ Inde mbo bɛnɛkɛ loasɔ lowanjel’Inde. Nde Yesu lotulama se, Inde lotaka ndembe nda nyɛlɛ la isangakala;

⁷ nde afelakäk’iyo imɔ liasi, Inde loila botö liasi, Inde loonga lau mbo— Boto ona wanu oyati la litwanelo, atakushaka litalɛ lia oso.

⁸ Limɔ Inde lotulama se liasi ndotaka ndembe nda nyɛlɛ.

⁹ Okäk’iyo ani, iyo loakola ndokuswakuswa, oso biange limɔ basi, ko nd’atikaläkä ko Yesu angɛnɛ la otomali omao nd’atiteni.

¹⁰ Yesu loilaka botö, Inde loonga lande mbo— ¿Botomali, bende to anima; Angwɛnɛ botö wofa aɛ se?

¹¹ Botomali loonga mbo— Angwɛnɛ oto, Bwana. Yesu mbo— Imi imɔ, iitof’aɛ se; kɛndɛkɛ eyaɛ, okelëk’imɔ obe liasi.

Löwa loa Wenda

¹² Yesu loonga lau liasi, Inde mbo— Imi yende Löwa loa wenda; boto oyatotuta’mi, aitokɛndɛkɛndɛ nda lilima, kongo ko atoyalaka nda löwa loa loiko.

¹³ Eokao BaFalusi loonga lande mbo— Otokambesa bato loaso loaɛ angɛnɛ, inango shaɛ siti to wewe.

¹⁴ Yesu lomutoel’iyo mbo— Ambo yekambesa to bato loasɔ loami angɛnɛ, inango shami shende wewe, eoka iluwi nde olo asokwäkä lami la olo akaɛkɛ lami, nde ino otiluwe olo asokwäkä lami la olo akaɛkɛ lami.

¹⁵ Ino osoata loasɔ kwa asɔɛnɛ ino lokomba loa oto, nde Imi angoata loasɔ loa oto angɔmɔi;

¹⁶ nde ambo yeata loasɔ, liati eliami liengani nde, eoka itiyale ko Imi kongo, kangä Imi la Inde imɔ oyatomäkä’mi.

¹⁷ Nda Bikela yanu angɛnɛ losotomo mbo tonango twa bato ambale tole wewe.

¹⁸ Imi nd’atota inango loasɔ loami angɛnɛ, la Inde oyatomäkä’mi ako Sango atota inango sha’mi.

¹⁹ Iyo loonga to lande mbo— ¿Sango waɛ ende to anima? Yesu mbo— Otiluwe ango Imi, angoko Sango wami; eya boluwa nde Imi, ani boluwa imɔ ko Sango wami.

²⁰ Yesu loonga ebaoi-ba tina la ɛsɔnjɛlɔ ya lifaefi ani aekesak’iyo nda ndakɔ ya Mungu, nde boto angɔmɔi woundes’Inde eoka likayi eliande lisho.

Wike lolendelo Yesu

²¹ Yesu loonga lau liasi mbo— Im’itosokwa eyamaya, limɔ ino bolukaka’mi la bowaka nde nda obe wanu. Olo akaɛkɛ lami, ino botiakɔkɔlɛkɛ ndoya.

²² Eokao BaYuda loonga mbo— Mbo atokakwa linga eoka Inde mbo, Olo akaɛkɛ lami, ino botiakɔkɔlɛkɛ ndoya?

²³ Yesu loonga lau mbo— Ino wende ba ono se, Imi yende w’olikolo; ino wende wa ewenda-bo, Im’iti wa ewenda-bo.

²⁴ Iongi nde lanu mbo bowaka nde nda obe wanu, eyambo botiimele mbo yende Inde, ambo ino kowa nda obe ebotokelak’ino.

²⁵ Lamao iyo loonga lande mbo— ¿Aɛ wende ndai? Yesu loonga lau mbo— Ko nda liako, kwa aongiki’mi lanu oso.

²⁶ Yende la wike woonga loaso loanu la ndoatakel’ino. Nde oyatomäkä’mi ende wewe la yao eyaokäkä’mi end’Inde ambo yao ebitokambesa’mi nda wenda. (

²⁷ Nde batialuwäkä mbo aongäkä lau loaso loa Sango.)

²⁸ Akilek’ino Wana wa Boto, ani boluwaka nde mbo yende Inde, la mbo iitokela loasɔ ko la isosha shami angɛnɛ, kangä kwa aekesäkä Sango oekesa’mi, ambo Imi nd’atoonga ko ongoma.

²⁹ Inde oyatomäkä’mi ale amamwito lami, atimache Imi ikɛndi, eoka Imi nd’atokelaka ko yao ebitoomales’Inde.

³⁰ Aongäkä’Inde ongoma, bato wike loimela Inde.

Bana ba Abalayama bende bandai?

³¹ Eokao Yesu loakola ndoonga la BaYuda ebimeläk’Inde, mbo— Bokɔkɔmɔ to nda lioi liami, ambo wayala nde baeki bami wewe,

³² la ongoma waluwa nde njasɔ ya wewe, la wewe botokindol’ino toote.

³³ Iyo lomutola lande mbo— Iso twende eba lioti lia Abalayama, totiayaläkä bɛkɔwa ya boto. ¿Monito osoonga mbo— Botokindolomo toote?

³⁴ Yesu lomutola lau mbo— Wewe, wewe itoonga lanu mbo oyatokelaka bobe ende ko bɔkɔwa wa obe.

³⁵ Bɔkɔwa aitoyalaka to nda litumbe lia Ngɛnɛ layalaya, kangä wana nd’atoyalaka layalaya.

³⁶ Eokao, eya to mbo Wana ekindol’ino toote, ambo wende toote wewe.

³⁷ Iluwi nde mbo wende lioti lia Abalayama, kongo ko otoluka nde fofe yoola’mi, eoka mbo Lioi liami liti la elela nda betema yanu.

³⁸ Imi nd’atoonga loasɔ loa yao eyɛnɛkɛ’mi ende Sango wami, nde ino nd’atokelaka ko yao ebisok’ino ende ewanu sango.

³⁹ Iyo lomutola lande mbo— Abalayama ende sango wasu. Yesu loonga lau mbo— Eya mbo boyala bana ba Abalayama, ani bokelaka nde yao eyakeläkä imɔ Abalayama.

⁴⁰ Kwani to wende la yɛmɛ yoola’mi oyasokambes’ino eya wewe ebiaokäkä’mi ende Mungu, Abalayama atiakeläkä ongoma.

⁴¹ Ino nd’atokelaka bekeeli ya sango wanu. Iyo loonga lande mbo— Iso totiaotomökö la nyongo, tole la Sango ɔmɔi ako Mungu.

⁴² Yesu loonga lau mbo— Mungu eyala nde Sango wanu, ani ososama nde Imi, eoka yasekwäkä nde ende Mungu, la yende eya; itiayäkä l’isosha shami angɛnɛ, nde Inde nd’atomäkä Imi.

⁴³ ¿Monito otiluwe litina lia lioi liami? ende eoka otikɔkɔlɛ ndooka lioi liami.

⁴⁴ Ino wende bana ba sango wanu ako Satana, la ino ososanga ko ndokelaka yɛmɛ yande. Ona ayaläkä ko booli w’ato konda liakoli, inde atiyale fii nda wewe, eoka angwɛnɛ wewe end’inde ango sinyo. Atotak’inde nanga, wende ko boyaeli wande, eoka inde ende boti wa nanga la ende ko sango wa lolanga.

⁴⁵ Nde atoonga Imi ko wewe, otiimele Imi.

⁴⁶ ¿Ndai wanu atotombola’mi nda bekeeli ibe? Yeonga nde la wewe, monito ino otiimele’mi?

⁴⁷ Oyayali ewa Mungu, inde atooka nde baoi ba Mungu; ¿Monito ino otioke bao? Ambo otiyale eba Mungu.

⁴⁸ BaYuda lomutoel’Inde mbo— ¿Iso toisoonga wewe mbo wende Ewa Samalia la ole la bolimo obe?

⁴⁹ Yesu lomutola mbo— Im’iti la bolimo obe, nde itolitesa Sango wami, la ino ototefwesa’mi.

⁵⁰ Im’itiluke nde tala yami angɛnɛ, nde Ɔmɔi nd’atoluka yao, Inde nd’atoata loasɔ loami.

⁵¹ Wewe, wewe, itoonga lanu mbo— Boto elitesa lioi liami, atilɛnɛkɛ imɔ liwa.

⁵² BaYuda loonga lande mbo— Kwani toluwi nde mbo wende la bolimo obe. Abalayama lowa la Batɔndɔli imɔ nde Aɛ nd’atoonga mbo— Boto elitesa lioi liami, atilawek’imɔ.

⁵³ ¿Aɛ nd’alongeli to sango wasu ako Abalayama oyawäkä? Batɔndɔli lowa imɔ kowa; ¿Otangi nde mbo wende ndai to?

⁵⁴ Yesu lomutola mbo— Yetalia ko Imi angɛnɛ, tala yami eti eya wewe. Ende Sango wami oyatotalia’mi tala, ako Inde oyatangi ino mbo ende Mungu wanu,

⁵⁵ l’ani otiluw’Inde. Nde Imi nd’aluwi Inde la yeonga mbo itiluw’Inde, ambo yeyala kwa ayali ino, ako ewa lolanga; kongo ko isoluw’Inde la itolitesa lioi liande.

⁵⁶ Tata wanu ako Abalayama loomala mbo elɛnɛkɛ mbile yami, la inde lɔɛnɛ la okäkä limɛngɔ.

⁵⁷ BaYuda loonga to lande mbo— Okiyeli kɔni miaka kama bɔɔmwi la Aɛ mbo Abalayama ɛnɛ̈kɛ̈ nd’Aɛ?

⁵⁸ Yesu loonga lau mbo— Wewe, wewe itoonga lanu mbo, oso wa Abalayama, Imi nd’ayali.

⁵⁹ Kwaamao iyo loilaka batalɛ mbo bakushelek’Inde, nde Yesu loisamel’iyo, Inde losokwa nda Ndakɔ ya Mungu.