Yoane 3 - Le Nouveau Testament in Kele (Lokele) 1958

Lioi lia Yesu ende Nikodemo

¹ Yaäkä boto wa BaFalusi, lina liande liko Nikodemo, ayaläkä Bokumi wa BaYuda.

² Boto-yo loya ende Yesu la ocho, inde loonga lande mbo— Labi, toluwi nde mbo wende Boekesi oyasokwi ende Mungu; angwɛnɛ to boto angɔmɔi wokɔkɔlɔ okelaka ndembe ya tolombo ebitokelak’Aɛ, sakolo ngo Mungu koyala lande.

³ Yesu lomutoel’inde mbo— Wewe, wewe, itoonga laɛ mbo, Sakolo ko boto kootomo lɔɔtɔ loa Use, ani inde angokɔkɔlɔ ndɔɛnɛ Bɔkɔta wa Mungu.

⁴ Nikodemo loonga lande mbo— ¿Boto kokɔkɔlɔ nde ndootomo ani asoya inunu la moni? Atokɔkɔlɔ ndɔɔtɔ liasi nda sɔlɔ ya nyango wande la ndootomo?

⁵ Yesu lomutola mbo— Wewe, wewe, itoonga laɛ mbo, sakolo ko boto kootomo la balia la Bolimo, ani aitokɔkɔlɔ ndɔɔtɔ nda Bɔkɔta wa Mungu.

⁶ Eyeotomu la bindo, ele ko bindo, la eyeotomu la Bolimo, yende ngo Bolimo.

⁷ Omwalëke mbo iongiki mbo— Loengani nde lanu ndootomo lɔɔtɔ loa Use.

⁸ Lofofo lotofofa l’olo l’olo atosanga loao, la otoka limiki lia loao, nde otiluwe olo asokwi la loao, kwa olo atɔkɛ la loao; lole ongoma la boto la boto oyaotomu la Bolimo.

⁹ Nikodemo lomutoel’Inde mbo— ¿Lotokɔkɔlɔ oyala ongoma moni?

¹⁰ Yesu lomutoel’inde mbo— ¿Aɛ wende Boekesi wa Isalaele, nde otiluweke eloasɔ-lo?

¹¹ Wewe wewe, itoonga laɛ mbo tosoonga ko baoi ebasoluwak’iso, la tosokambekesa bato ko yao ebisɔɛn’iso; kongo ko ino botikulye inango shasu.

¹² Yekambes’ino eya ono se ani otiimele; ¿Otoimela to moni eya Use ebitokambesa’mi ino?

¹³ La angwɛnɛ imɔ boto oyasoilama nda Use, sakolo ngo ko Inde oyasosulwa se nda Use, ako Wana wa Boto angɛnɛ.

¹⁴ Kwa iläkä Mɔsɛ njɔ nda liɔmbɛlɛ, ongoma loengani la Wana wa Boto mbo Inde ilomoko imɔ koilomo,

¹⁵ ko mbo oyakalendeloko Inde ɛɔlɔkɔ nde liwawi lia loiko.

¹⁶ Mungu asamäkä to bato ba wenda la losamɔ loeta, eokao afäkä Wana ɔmwitoto wande mbo oyatolendelo Inde, atiangosɛɛsɛlɛkɛ, kongo ko ɛɔlɔkɔ nde liwawi lia loiko.

¹⁷ Mungu atiatomäkä Wana wande nda wenda ko mbo afeke bato ba wenda se, kangä mbo eba wenda buwesomoko ko lande.

¹⁸ Oyakalendeloko Inde, aitofomo se, nde oyatialendeloko Inde akofomo se ko kwani, eoka atilendelo lina lia Wana ɔmwitoto wa Mungu.

¹⁹ Lifomu se lina lile mbo löwa losoya nda wenda, kongo ko bato basosama lilima la losamɔ loeta eloa löwa, eoka bekeeli yau bende imɔ ibe.

²⁰ Eoka boto la boto oyatokelaka bekeeli ya bɔwɛwɛ, atɔɛnɛ löwa mbo bobe, la aitoyaka nda löwa mbo bekeeli yande bitatombolomo;

²¹ nde inde oyatokelaka ko eya wewe, eyaka nde nda löwa, mbo bekeeli yande yɛnɛlɛkɛ fololo mbo bikelomu l’isosha sha Mungu.

Yesu nda yese ya Yudea

²² Mbisa yamao Yesu la baeki bande lɔkɛ nda yese ya Yudea la Inde lolengela omao amamwito lau, Inde lolufia bato.

²³ Yoane imɔ lolufiaka bato omao nda Ainona tina la Salema eoka balia baaka wike omao, la bato lɔkɛsɛkɛnɛ end’inde ndokalufiomo,

²⁴ ani Yoane akakushomu kɔni nda bɔnyɔlɔlɔ.

²⁵ Ongoma baeki ba Yoane la BaYuda bamɔi lofenyakana lioi loasɔ loa lisooli liko lilufi,

²⁶ la iyo lɔkɛ ende Yoane, iyo loonga lande mbo— Labi, tɛnɛ ngo, Inde oyaaka laɛ fangi y’ona ya Yaledene, oyaongelak’aɛ eongel’Inde, atolufia bato la batotina batokɛkɛ end’Inde.

²⁷ Yoane lomutola mbo— Boto angokɔkɔlɔ ndɔsɛlɛ isosha sakolo ko mbo shao kofomo inde ko la Use.

²⁸ Ino angɛnɛ nd’atokɔcha lioi liami mbo iongiki mbo— Imi iti Masiya, kangä mbo yatomomökö oso wande.

²⁹ Oyaundi bowai, ende ko bɔsɔngi; nde wina wa bɔsɔngi oyatoemala lande, atookaka inde lioi liande, inde koomala finɛ eoka ya limiki lia bɔsɔngi; eokao limɛngɔ liami nda loasɔ-lo lisɔɔlɔlɔ hɔlɔ.

³⁰ Loengani nde lande mbo asɛngɛkɛ, nde lami mbo yɔndwɛkɛ se.

³¹ Inde oyasokwi nda Use nd’alongeli batotina; nde oyasokwi ono se, nd’ayali ewa se la inde nd’atoonga eya ono se. Inde oyasokwi nda Use nd’alongeli batotina,

³² la atoluwesa bato yao ebiɛni la ebiokak’Inde, kongo ko angwɛnɛ boto wokulya inango shande.

³³ Oyatoimela inango shande, ambo ona asokɔcha lioi mbo Mungu ende wewe.

³⁴ Oyatomomökö la Mungu, nd’atoonga inango sha Mungu la Mungu nd’atofaef’Inde Bolimo wande l’angwɛnɛ ikai.

³⁵ Sango asoniya Wana la asɔsɛlɛ bitotina nda bosamba wande.

³⁶ Oyatolendelo Wana, ambo inde ayali la liwawi lia loiko, nde oyatotefola Wana, atilɛnɛkɛ liwawi, nde efango ya Mungu esɔɔnwelɔ inde.