Yoane 21 - Le Nouveau Testament in Kele (Lokele) 1958

Baeki lɔɛnɛ Yesu nda Ngalilai

¹ Mbisa yamao Yesu lɔɛnɛlɛ, Inde angɛnɛ, ende baeki liasi nda Eliya ya Tibelia, la Inde lɔɛnɛlɛ ko ani,

² bayalaka elela ɛmɔi la Simona Petelo la Tomasa oyatangomoko Liäsa, la Natanaele wa Kana nda Ngalilai la bana ba Sebedai, la baeki basi bambale ba Yesu.

³ Simona Petelo loonga lau mbo— Isɔkɛ okaluwa swi. Iyo loonga mbo— Lasu imɔ tɔsɔkɛ laɛ. Iyo losokwa nda okenge, iyo lokwa nda watɔ, nde la bocho-ao batiole yeka.

⁴ Asɔswaka bonyanya, Yesu loemala nda ngɔngɛ, nde baeki batiluwe mbo ende Yesu.

⁵ Yesu loonga to lau mbo— ?Ban’atolome, wende la swi? Iyo lomutola mbo— Mbayɔ!

⁶ Inde loonga lau mbo— Taka to wɛngɔ nda fangi ya olome ya watɔ, limɔ otosha yao. Iyo lota to nde batilonge ndosamba wao eoka ya bokamu wa swi.

⁷ Ongoma boeki ona oyasamomu la Yesu, inde loonga la Petelo mbo— Ende Ngɛnɛ! Okakä to Simona Petelo mbo ende Ngɛnɛ, inde lowata esinda, eoka ayali nde wase, limɔ inde loungwa nda balia

⁸ nde baeki ebamɔi loya se la ndɛli, eoka batiaaka esika la ngɔngɛ, kwa yiso kama bɔɔmwi kongo, iyo losulya wɛngɔ ombisa ani botumi la swi.

⁹ Akwak’iyo nda boili, iyo lɔɛnɛ bösä wa bala la swi eyechakomu nda wao la batuma.

¹⁰ Yesu loonga lau mbo— Eshaka swi bimɔi ya yao ebioliki ino kwani.

¹¹ Lamao Simona Petelo lɔkɛ okasamba wɛngɔ nda ngɔngɛ, wao lotuma la swi bifi. Yaaka mia la kama bɔɔmwi la swi isatɔ nde ayalaka swi wike, ongoma wɛngɔ angoachacha.

¹² Yesu loonga lau mbo— Yauku otalaka bieka. Angwɛnɛ angomwito wa baeki lotendela ndofel’Inde mbo— ¿Aɛ wende ndai? Baluwaka mbo ale ko Ngɛnɛ.

¹³ Yesu loya, Inde lɔɔsɔ lituma, Inde lofaef’iyo liao la swi lisanga.

¹⁴ Eli liende liɛnɛlɛ lia asatɔ eliɛnɛlɛkɛ Yesu ende baeki bande ani asotɛmwa nda liwa.

Yesu lofela Petelo mbo— ¿Osami nde’mi?

¹⁵ Asilak’iyo ndola bieka, Yesu loonga la Simona Petelo mbo— ¿Simona wana wa Yona, osami nde’mi la losamɔ loeta ebamɔi? Inde mbo— Eingo, Ngɛnɛ Aɛ nd’aluwi mbo isami nd’Aɛ. Yesu loonga lande mbo— Lesaka bana ba bɛkɔkɔ yami.

¹⁶ Yesu loonga lionga lia ambale mbo— ¿Simona wana wa Yona, osami nde Imi? Inde mbo— Eingo, Ngɛnɛ, Aɛ nd’aluwi mbo isami nd’Aɛ. Yesu mbo— Kukiaka bɛkɔkɔ yami.

¹⁷ Yesu loonga lande lionga lia asatɔ mbo— ¿Simona wana wa Yona, osami nde’mi? Petelo looka ikɛnɛnɛ sifi eoka mbo aongi nde elia asatɔ mbo— ¿Osami nde’mi? Limɔ inde loonga la Yesu mbo— Ngɛnɛ, oluwi nde bitotina, Aɛ nd’aluwi la wɛli mbo isami nd’Aɛ. Yesu loonga lande mbo— Lesaka bɛkɔkɔ yami.

¹⁸ Wewe, wewe, itoonga laɛ mbo— Ayalak’aɛ isenge, aɛ angɛnɛ lokandaka bɔkɔli waɛ, la wakɛndɛkɛndɛkɛ olo alɛmbɛk’aɛ, nde akayalek’aɛ inunu, otonanola besamba yaɛ la wasi nd’atokanda bɔkɔli waɛ, la betolak’aɛ olo atiasangek’aɛ.

¹⁹ Yesu loonga ongoma ndoluwesa boweli ebokaweke lande ani atotalia Mungu tala. Limɔ asilak’Inde ndoonga ongoma, Inde mbo— Tutaka’mi.

Lofelo loasɔ loa boeki oyasamomoko la Yesu

²⁰ Petelo lokikwa, inde lɔɛnɛ boeki ona oyasamomoko la Yesu ani atotut’iyo ako inde oyaɛkɛmɛkɛ nda bokuku wa Yesu nda elambɔ, la oyaongaka lande mbo— ¿Ngɛnɛ, ende ndai oyatowamb’Aɛ?

²¹ Limɔ ɛnɛkɛ̈ Petelo wɛnɛ inde, inde loonga la Yesu mbo— ¿Ngɛnɛ, oyo moni to?

²² Yesu loonga lande mbo— ¿Eya mbo isosanga mbo atikaleke kond’akayeke Imi, lole to loasɔ loaɛ? Aɛ angɛnɛ tutaka’mi.

²³ Eokao lioi-li lomelana ende beoto mbo boeki-bo atilawek’imɔ; kongo ko Yesu atiaongaka lande mbo atilaweke, kangä mbo— ¿Eya mbo isosanga mbo atikaleke kond’akayeke Imi, lole to loasɔ loaɛ?

²⁴ Boeki ona ale ngo ko inde oyɛnɛkɛ la oyakambesaka njasɔ-bi la oyasosɔnɔ yao, la toluwi nde mbo yao ebiong’inde yende ko wewe.

²⁵ Yaaka la bekeeli yasi wike imɔ eyakelaka Yesu, la bisɔnɔmɔkɔ bitotina, lɔmɔi la lɔmɔi, itangi nde mbo wenda bototina angoina kasa ebikasɔnɔmɔkɔ.