Yoane 20 - Le Nouveau Testament in Kele (Lokele) 1958

Litɛmwi lia Yesu nda Liwa

¹ Nda lise lia oso lia yenga, ani lilima likoyali, Malia wa Mangandala loya nda losai la inde lɔɛnɛ litalɛ lisosokolomo nda losai.

² Inde lokwaka mangu ende Simona Petelo la ende boeki wasi ona oyasami Yesu osam’inde limɔ inde loonga lau mbo— Basosokola Ngɛnɛ nda losai la totiluwe olo asoingesomo Inde.

³ Limɔ Petelo la boeki oyɔmɔi iyo loakola ɔkɛ nda losai.

⁴ Iyo yaambale lokwa mangu lilenga, nde boeki ebɔmɔi loetela Petelo mangu, inde loiya oso nda losai.

⁵ Inde lotulama se, inde lɔɛnɛ bisinda bifufu oko nda nyɛlɛ, nde atiaɔtɔkɔ kɔni nda losai.

⁶ Nde Simona Petelo, inde lotuta la ayaka’inde, inde lɔɔtɔ nda losai, inde lɔɛnɛ bisinda bifufu nda nyɛlɛ

⁷ la itambala eshalingelomu botö wande, nde sisiami la bisinda la shao loundukwakana nda elela ɛmɔi.

⁸ Limɔ boeki ebɔmɔi oyiyaka oso nda losai, inde lɔɔtɔ imɔ, inde lɔɛnɛ la inde loimela.

⁹ Eoka batitaluweke litina lia Lokasa loa Mungu mbo lole loande ndokuswa liasi nda liwa.

¹⁰ Baeki-ba losokwa okakɛ liasi eyau.

Malia wa Mangandala lɔɛnɛ Yesu

¹¹ Nde Malia loemakala lousa loa losai ani atolelaka; la alelak’inde ongoma, inde lotulama se ndoticha nda losai,

¹² inde lɔɛnɛ bakitomo bambale ebawati bisinda bifufu, bayalaka se, ɔmɔi nda fangi ya botö, ɔmɔi nda fangi ya bakolo, olo ayalaka bolyo wa Yesu.

¹³ Iyo loonga la Malia mbo— ¿Otomali, otolela moni? Inde loonga lau mbo— Basosokola Ngɛnɛ wami la itiluwe olo asoinges’iyo Inde.

¹⁴ Aongaka inde ongoma, Malia lokikwa mbisa, limɔ inde lɔɛnɛ Yesu emali nde atialuwaka mbo ende Yesu.

¹⁵ Yesu loonga lande mbo— ¿Otolela moni, otomali? ¿Otoluka ndai? Malia atangaka nde mbo ende Botingani wa elanga, inde loonga lande mbo— Bwana, eya to mbo end’aɛ oyasoila bolyo wande, kambesaka’mi olo osoinges’Inde limɔ imi kɔkɛ lande.

¹⁶ Yesu loonga lande mbo— Malia! Limɔ Malia lokikwa, inde loonga lande nda baoi ba BaEbele mbo— Laboni! (Litina mbo Boekesi)

¹⁷ Yesu loonga lande mbo— Omatëke’mi eoka ikaki kɔni ende Sango wami, nde kɛndɛkɛ ende beoto yami, kambesaka iyo mbo ikɔkɛ ende Sango wami la Sango wanu, Mungu wami la Mungu wanu.

¹⁸ Malia wa Mangandala lɔkɛ okakambesa baeki mbo— Isɔɛnɛ Ngɛnɛ, la mbo asoonga lande ongoma.

Baeki liu lɔɛnɛ Yesu

¹⁹ Nda lise-ao to, la litele, liko lise lia oso lia yenga, ani biome ya ndakɔ eyayalaka baeki bikandakomu eoka bawangaka BaYuda, Yesu loya, Inde loemala sisi yau, Inde loonga lau mbo— Lilatemi liyaleke lanu!

²⁰ Aongak’Inde ongoma, Inde lotamb’iyo bangasa bande la likuka liande, limɔ baeki loyaimwa la limɛngɔ ani basɔɛnɛ Ngɛnɛ.

²¹ Limɔ Yesu loonga lau liasi mbo— Lilatemi liyaleke lanu! Kwa atomaka Sango otoma’mi, kwani Imi nd’asotom’ino.

²² Aongaka’Inde ongoma, Inde lokusoel’iyo luli, Inde loonga lau mbo— Ɔlɔkɔ Bolimo Botanu!

²³ Bomɛsɛkɛlɛ batwanelo ba bato ambo bao komɛsɛlɔmɔ; bofeka limɛsɛli ambo bao kofekelomo.

²⁴ Nde Tomasa, ɔmɔi w’eba liu la ambale, oyatangomoko Liäsa, inde atiayalaka lau nda mbile eyayaka Yesu.

²⁵ Eokao ebamɔi loakola ndoonga lande mbo— Tosɔɛnɛ Ngɛnɛ! Nde inde loonga lau mbo— Sakolo ngo ko yɛnɛ loelo loa bakɔ̈kɔ nda bangasa bande la kotaka isangakala shami nda elela ya bakɔ̈kɔ la kota lingasa liami nda likuka liande ani imi angoimela.

Baeki liu la ɔmɔi lɔɛnɛ Yesu

²⁶ Mbisa ya bacho bonanɛi baeki bande loyala liasi omao nda ndakɔ la Tomasa imɔ amamwito lau. Akandomoko biome, Yesu loemala sisi yau, Inde mbo— Lilatemi liyaleke lanu!

²⁷ Limɔ Inde loonga la Tomasa mbo— Eshaka to isangakala shaɛ eyamaya, ɛnɛkɛ bangasa bami, eshaka lingasa liaɛ la taka liao nda likuka liami, oyalëke la fee, kangä boto wa liimeli.

²⁸ Tomasa lomutola lande mbo— Ngɛnɛ wami la Mungu wami!

²⁹ Yesu loonga lande mbo— ¿Osoimela ko eoka mbo osɔɛnɛ’mi? Ebasoimela ani batitɛnɛkɛ bende la lɔkɛmɔ loeta.

³⁰ Yesu lokelaka ndembe yasi wike ya tolombo oso wa biɔmbɔ ya baeki bande ebititomo nda lokasa-lo,

³¹ nde ebi bisotomo mbo wimeleke mbo Yesu ende Masiya, Wana wa Mungu, la mbo ko la liimeli, ino bɔɔlɛkɛ loiko, ko la lina liande.