Yoane 17 - Le Nouveau Testament in Kele (Lokele) 1958

Lisomboli lia Yesu eoka ya Inde angɛnɛ la baeki la baina

¹ Aongakä Yesu ongoma, limɔ Inde loila baiso bande nda use, Inde mbo— Sango, mbile esoya, taliaka to Wana waɛ tala mbo Wana atalieke Aɛ tala;

² kwa afakä Aɛ of’Inde isosha sholongela bato batotina mbo afeke loiko loa layalaya ende batotina ebafak’Aɛ of’Inde.

³ Loiko loa layalaya lole ko ndoluwa Aɛ, Mungu Ɔmwitoto wa Wewe la oyatomomu laɛ ako Yesu Masiya.

⁴ Imi nd’asotalia Aɛ tala ono se, isokela yao eyafak’Aɛ ofaefa’mi ndokela.

⁵ Kwani to Sango taliaka Imi tala amamwito laɛ, ko la tala eyaɔlɔkɔ Imi amamwito laɛ oso wa loyaleso loa wenda-bo.

⁶ Ende bato ebafak’Aɛ ofa’mi nda wenda, isoisola lina liaɛ. Baaka nde ebaɛ, la wafaka’mi iyo, la basolitesa lioi liaɛ.

⁷ Kwani basoluwa mbo bitotina eyefak’Aɛ efaefa’mi, biasokwaka ko ende Aɛ;

⁸ eoka isofaef’iyo liekesi eliafak’Aɛ efaefa’mi la basoimela liao, la basoluwa wewe mbo yasokwaka end’Aɛ la basoimela mbo Aɛ nd’atomaka Imi.

⁹ Isosomboel’iyo, iitosomboela wenda kangä ko loasɔ loa bato ebafak’Aɛ efaefa’mi,

¹⁰ bende to ebaɛ la bitotina ebisɛli nde Imi, yende imɔ ko eyaɛ, la ebile eyaɛ yende imɔ eyami la isotaliomo tala ko lau.

¹¹ Nde kwani iti’mɔ nda wenda-bo, kongo ko iyo bakoyali nda wenda ani Imi nd’atoya end’Aɛ, Sango Botanu, tɛmyak’iyo nda lina liaɛ eliafaefak’Aɛ efaefa’mi mbo bayaleke ko ɔmwito, kwani ayali ko Iso ɔmwito.

¹² Ayalakä Imi amamwito lau, Imi yatɛmyak’iyo tɛmya nda lina eliafak’Aɛ ofaefa’mi la yatinganaka lau, angwɛnɛ ɔmɔi wau wosɛɛsɛlɛ sakolo ngo ko wana ona wa losɛɛsɛlɔ, mbo lioi lia Lokasa loa Mungu likɔchɔmɔkɔ kɔkɛ.

¹³ Nde kwani isoya end’Aɛ, nde itoonga baoi-ba ani ikoyali nda wenda mbo baɔlɛkɛ limɛngɔ liami liotumesa betema yau fuu.

¹⁴ Isofaef’iyo lioi liaɛ la eba wenda basoiyana lau eoka mbo bati ba e-wenda-bo, kwa Imi angɛnɛ iti wa e-wenda-bo.

¹⁵ Itisomboel’Aɛ mbo osokolek’iyo nda wenda, kangä mbo otekames’iyo ende ewa bobe.

¹⁶ Bati ba wenda-bo kwa Imi angɛnɛ iti wa wenda-bo.

¹⁷ Uchak’iyo nda Wewe; Lioi liaɛ liende Wewe.

¹⁸ Kwa atomak’Aɛ otoma’mi nda wenda, ko ongoma Imi isotoma iyo nda wenda,

¹⁹ la isüchama Imi angɛnɛ mbo iyo imɔ büchomoko lisanga nda Wewe.

²⁰ Itisomboel’iyo kongo, kangä imɔ ko ebakalendeloko Imi ko l’eoka ya lioi liau,

²¹ mbo iyo yaatotina bayaleke ko ɔmwito, kwa Aɛ Sango, wende lami ko ɔmwito, lami yende laɛ ko ɔmwito mbo iyo imɔ bayaleke ɔmwito lasu mbo eba wenda bimeleke mbo Aɛ nd’atomaka’mi.

²² Imi nd’asofaef’iyo tala eyafak’Aɛ efaefa’mi, mbo bayaleke ɔmwito kwa ayali imɔ ko Iso Ɔmwito.

²³ Imi batebate lau, l’Aɛ batebate lami mbo baɔlɔlɔkɔ oyala ko ɔmwito mbo wenda boluweke mbo Aɛ nd’atomaka’mi la mbo Aɛ nd’asosamak’iyo kwa asosamak’Aɛ osama’mi.

²⁴ Sango, Ilɛmbi nde mbo iyo imɔ ebafak’Aɛ efaefa’mi bayaleke amamwito lami olo akayaleke’mi, mbo bɛnɛkɛ tala eyataliak’Aɛ etalia’mi ani wasamaka’mi oso wa baswelo ba e-wenda-bo.

²⁵ E Sango wa Liengani, ko wenda angɛnɛ angoluw’Aɛ, kangä Imi nd’asoluw’Aɛ, la eba basoluwa mbo Aɛ nd’atomaka Imi;

²⁶ la isoluwes’iyo lina liaɛ la yeluwesak’iyo ngo ko ongoma, mbo losamɔ eloasamak’Aɛ osamaka’mi loyaleke nda betema yau la mbo Imi iyaleke ngo ko nda betema yau.