Yoane 15 - Le Nouveau Testament in Kele (Lokele) 1958

Boliki wa tuma wa wewe

¹ Imi yende Boliki wa tuma, ewa wewe, la Sango wami ende Ngɛnɛ wa elanga.

² Bota wami ako Boliki, botite tuma, Inde atotena wao; nde bota ebotota tuma, Inde kotonjaka wao la kɛmbɛ mbo boteke tuma twasi.

³ Ino nd’asotanesomo ongoma ko l’eoka ya lioi eliaongaka’mi lanu.

⁴ Watemaka mbate lami la Imi ko lanu. Kwa bota botikɔkɔlɛ ndotaka tuma ko wao angɛnɛ sakolo ko bowatema la boliki, ko ongoma ino imɔ otikɔkɔlɛ ndotaka tuma, sakolo ko bowatema nde lami.

⁵ Imi yende boliki, ino wende beta; oyatoyala lami la Imi imɔ lande, ko inde kongo nd’atotaka tuma wike, nde bosɛnyana lami shɛi, ino angokɔkɔlɔ yeka.

⁶ Oyatiyale mbate lami, ekushomoko tungi kwa bota la atobɛɛlɛ; limɔ batosɔnjaka beta, batokusha yao nda bösä limɔ betofya.

⁷ Ino boyala mbate lami la tonango twami totikala nda betema yanu, felaka ebikalɛmbɛk’ino, la yao kokeelomo ino.

⁸ Sango wami atotaliomo tala ngo ko la litina-li, liko mbo boteke tuma wike la boyalaka nde ebami baeki.

⁹ Kwa Sango nd’asami Imi, Imi imɔ nd’asami ko ino, tikalaka nda losamɔ loami.

¹⁰ Bolitesa bikela yami, ino kotikala nda losamɔ loami, kwa Imi nd’asolitesa bikela ya Sango wami la isotikala nda losamɔ loande.

¹¹ Isoonga baoi-ba end’ino mbo limɛngɔ liami liyaleke lanu la mbo limɛngɔ lianu liiyeleke.

¹² Ekela yami yende mbo bosamaneke kwa asosama’mi osam’ino.

¹³ Angwɛnɛ boto oyatoyala la losamɔ loeta e-losamɔ-lo, loko mbo boto komacha liwawi liande ko l’eoka ya baina lande.

¹⁴ Ino nd’atoyala baina lami eya mbo otokelaka ebitotela Imi otel’ino ekela.

¹⁵ Imi iitotang’ino imɔ mbo bɛkɔwa, eoka bɔkɔwa atiluwe lona elotokela ngɛnɛ wande, nde isotang’ino mbo baina eoka bitotina eyokakä’mi ende Sango wami, isoluwes’ino yao.

¹⁶ Ino botiaaka nde Imi, kongo ko Imi yaaka nd’ino la Imi yüchak’ino mbo bɔɛkɛ okata tuma, la mbo tuma tumweke yumwa la mbo lona elokafelek’ino ofela Sango nda lina liami, Inde kofaef’ino loao.

¹⁷ Isotel’ino bikela-bi mbo bosamaneke.

¹⁸ Eyambo eba wenda beiyana lanu, luwaka to mbo basotaiyana lami oso;

¹⁹ eya mbo wayala eba wenda, ani eba wenda basosama ko ewau angɛnɛ, nde eoka mbo oti ba wenda-bo la mbo isoaa ino nda wenda-bo, ongoma to eba wenda basoiyana lanu.

²⁰ Enyelaka to liölo elisoonga’mi end’ino mbo— Bɔkɔwa aitolongela ngɛnɛ wande; eyambo bakongoli Imi, ani bekongolaka imɔ ko ino. Eya mbo balitesi lioi liami, ani belitesa imɔ ko elianu.

²¹ Nde batokeelak’ino bitotina-bi ko l’eoka ya lina liami eoka batiluwe oyatomaka’mi.

²² Aenaka yayaka oyaonga lau, ani batiayalaka la batwanelo, nde kwani bati ango la lioi liomɛsɛl’iyo batwanelo bau.

²³ Oyatoiyela’mi, asoiyela imɔ ko Sango wami.

²⁴ Aenaka yakelaka bikeeli ya bɔfɔɔnɔ ebotiakelaka boto wasi, ani batiayalaka la batwanelo, nde basɔɛnɛ la basoiyela la Imi la imɔ ko Sango wami lisanga.

²⁵ Ongoma to lioi elisotomo nda Lokasa loa Bikela yau lisokɔchɔmɔ, liko mbo— Basoiyana lami ko l’angwɛnɛ eoka.

Bolimo Botanu ako Boongeli la Bosungi

²⁶ Akayeke Boongeli ako Bolimo wa wewe, oyatotoma’mi otom’Inde ende ino, atosokwa ko ende Sango, Inde oyatokuswa ende Sango, nd’atokambesa bato loasɔ loami;

²⁷ la ino imɔ wende to ebatokambekesa bato loasɔ loami, eoka osoyalaka lami ko nda liakoli.