Yoane 13 - Le Nouveau Testament in Kele (Lokele) 1958

Yesu losoola batindi ba baeki

¹ Loaaka nde oso wa Elambɔ ya Lieti mbo Yesu aluwakä mbo mbile esoya eyetosokwa lande nda wenda-bo ndoinwa ende Sango; asamaka nde baina lande nda wenda-bo, Inde lɔɔlwa osamak’iyo hɔlɔɔ.

² Alak’iyo bieka ya ocho, ani Satana asosila ndofɔɔlɔ botema wa Yudasi wa Keliote, wana wa Simona, mbo awambeke Yesu,

³ l’ani Yesu aluwakä mbo Sango asofaef’Inde bitotina nda besamba yande, la mbo asokwak’Inde ende Sango la mbo atoinwa imɔ ko ende Sango,

⁴ limɔ Inde losokwa nda bieka, Inde lowatola kanjo, Inde lɔɔsɔ itambala ndowata shao nda lɔtɛta.

⁵ Inde lɔwɛlɛ balia nda isako, Inde loakola okasöökole batindi ba baeki bande la ndɔɔmbɔkɔlɔ bao la itambala esiwati Inde nda lɔtɛta.

⁶ Nde iyak’Inde ende Simona Petelo, Petelo loonga lande mbo— ¿Ngɛnɛ, Aɛ nd’atosööla batindi bami?

⁷ Yesu lomutola lande mbo— Elotokela nde Imi kwani, otiluwe, nde mbisa boluwaka nde litina.

⁸ Petelo loonga lande mbo— Otiasööle batindi bami ko layalaya. Nde Yesu lomutoel’inde mbo— Eyambo itisööle aɛ, ambo otisangane lami.

⁹ Simona Petelo loonga lande mbo— Ngɛnɛ, inga to batindi bami kongo, kangä imɔ besamba la botö.

¹⁰ Yesu loonga lande mbo— Oyasokwa ikuli ati la boeno bosöölomo, sakolo ko batindi, nde asotana bindo fee; ino nd’atani nde inga to batotina.

¹¹ Eoka aluwaka nde oyakawambek’Inde, ko la litina-li Inde mbo— etiango ino yaatotina nd’ayali batanu.

¹² Asilakä Yesu ndosööla batindi bau, Inde lowata esinda yande, Inde loyala se liasi; Inde loonga lau mbo— ¿Oluwi nde litina lia loao elosokeela’mi okeel’ino?

¹³ Ino osotanga’mi mbo Boekesi, la Ngɛnɛ, ongoma osokela olau eoka yende ongoma.

¹⁴ Eya to mbo Imi ako Ngɛnɛ la Boekesi, nd’asosööla batindi banu, ambo lole lanu ndosöölana batindi.

¹⁵ Isotamb’ino etichelo, mbo ino imɔ okeleke kwa akeliki nde Imi end’ino.

¹⁶ Wewe, wewe itoonga lanu mbo bɔkɔwa aitolongela ngɛnɛ wande la oyatomomu aitolongela oyatom’inde.

¹⁷ Boluwa to njasɔ-bi, wende la limɛngɔ ani otokɔcha to yao.

¹⁸ Itionge to loasɔ loanu yaatoti, isoluwa ebasoaa’mi ndoaa iyo, nde yende kwa atomoko nda Lokasa mbo bikɔchɔmɔkɔ biko mbo— Oyasola lituma liami, atoilia Imi la batindi.

¹⁹ Isokambes’ino loao ko kwani, oso ani lokayi, mbo akayeke loao, ino koimela mbo Imi nd’ayali ko Inde kongo.

²⁰ Wewe, wewe itoonga lanu mbo— Oyatoaela oyakatomeke’mi, ambo aeli nde Imi angɛnɛ; la oyatoaela Imi, ambo aeli nde Inde oyatomakä Imi.

Yudasi losokwa nda Elambɔ

²¹ Aongaka Yesu ongoma Inde looka ngandi finɛ, Inde loonga liölo mbo— Wewe, wewe itoonga lanu mbo ɔmɔi wanu nd’atowamba’mi.

²² Limɔ baeki lotichakana, iyo lotana fee mbo ndai wau asoongelomo lande.

²³ Ɔmɔi wa baeki bande ako oyasamomu la Yesu, aɛkɛmɛkɛ nda bokuku wande;

²⁴ Simona Petelo lomekoel’inde mbo akambeseke to inde oyatoongomo la Yesu.

²⁵ Aɛkɛmɛkɛ to inde tina la bokuku wa Yesu, inde loonga lande mbo— Ngɛnɛ, ale to ndai?

²⁶ Yesu lomutola mbo— Ale boto ona oyatofaefami ofaef’inde yaki eyetolufiela’mi; la Inde lolufia yaki ya lituma nda bosusu limɔ Inde lofaefa Yudasi wana wa Simona wa Keliote.

²⁷ Mbisa ya yaki, Satana lɔɔtɛlɛ Yudasi. Yesu loonga to lande mbo— Elotokel’aɛ, kelaka oko lisasaya.

²⁸ Nde angwɛnɛ ɔmɔi wa ebayalaka nda bieka oyaluwaka litina eliaongaka Yesu lande;

²⁹ bamɔi loenyela mbo Yesu loonga lande mbo— Sombeläk’iso yao ebile lasu la boeno nda Elambɔ; kwa mbo afeke eba touwe bieto, eoka Yudasi atolaka sanduku ya bieto.

³⁰ Ongoma aelaka Yudasi yaki la lituma, kwaamao inde louma lousa la yaaka mbile ya ocho.

Baoi ba Yesu ende Baeki bande liu la ɔmɔi

³¹ Asilaka Yudasi ndokuswa, Yesu loonga lau mbo— Kwani Wana wa boto asotaliomo tala, la Mungu imɔ asotaliomo imɔ ko lande,

³² la Mungu etaliomo ko lande, Mungu imɔ atotalia Inde tala eyande angɛnɛ la atotalia Inde kwanikwani.

³³ Bana ba booi, ko mbile sinyo Imi ikoyali lanu, bolukaka’mi nde kwa aongaka’mi la BaYuda mbo— Olo akaɛkɛ lami, ino botiakɔkɔlɛkɛ ndoya; kwa atoonga’mi lanu imɔ ko kwani.

³⁴ Isofaef’ino ekela eyai, eko mbo— Samanaka, kwa asosama’mi osam’ino.

³⁵ Bosamakana, ambo lisamakani lianu koyala ndembe yoluwesa bato batotina mbo wende baeki bami.

³⁶ Simona Petelo loonga lande mbo— Ngɛnɛ, ɔtɔkɛ to anima? Yesu lomutola mbo— Olo atɔkɛ lami, aɛ angokɔkɔlɔ otuta’mi kwani, nde botutaka mbisa.

³⁷ Nde Petelo loonga lande mbo— ¿Ngɛnɛ, monito itikɔkɔlɛ ndotut’Aɛ ko kwanikwani? Yemachaka nde liwawi liami ko l’eoka yaɛ!

³⁸ Yesu lomutola mbo— ¿Bomachaka nde liwawi liaɛ ko l’eoka yami? Wewe, wewe itoonga laɛ mbo— Kɔkɔ angota lɔkɔkɔlɔkɔ oso ani okaanganyi’mi baanganya basatɔ.