Yoane 12 - Le Nouveau Testament in Kele (Lokele) 1958

Yesu nda Betania

¹ Yesu loya nda Betania becho liambɛ oso wa Elambɔ ya Lieti, okenge ona olo ayalaka Lasalo oyatɛmɔlɔkɔ Inde nda liwa.

² Iyo lokomiela to Yesu bieka ya ocho, la Maleta lotel’iyo yao nda mɛsa olo ayalaka imɔ ko Lasalo amamwito lande.

³ Malia lɔɔsɔ isakɔ sha baningo ba liɛsɛ ba loketi lofi fafo, inde losingɔlɔ batindi ba Yesu, inde lɔɔmbɔkɔlɔ batindi bande la swee yande la ndakɔ lotuma la liɛsɛ lia baningo.

⁴ Nde ɔmɔi wa baeki bande, ako Yudasi wa Keliote oyakawambek’Inde, inde mbo—

⁵ ¿Monito e-baningo-ba batitambesomo nda bieto mia isatɔ la yao kofaefomo eba touwe?

⁶ Inde loonga ongoma, inga eoka mbo atakeli nde eba touwe bolenda, kangä eoka aaka wiya la ɔsɔkɔkɔ̈ bieto eyatakomokö nda sanduku eyaundak’inde.

⁷ Yesu loonga to mbo— Machaka otomali, mbo atinganeke la bao konda liombomu liami;

⁸ eoka wende l’eba touwe lanu mbile bitotina, kongo ko oti lami amamwito lanu mbile bitotina.

⁹ Aluwaka ekuke efi ya BaYuda mbo Yesu ale omao, iyo loya, inga oyɛnɛ Yesu kongo, kangä Lasalo imɔ oyatɛmɔlɔmɔ̈kɔ̈ la Yesu nda liwa.

¹⁰ Ongoma Kanga ebieti lokuliana l’ikumbɛ mbo beolaka imɔ ko Lasalo,

¹¹ eoka ko loasɔ loa Lasalo BaYuda wike losokwa end’iyo okalendelo Yesu.

¹² Lɛlɛngɔ ekuke efi ya bato wike ebayaka nda Elambɔ looka mbo Yesu atoya nda Yelusaleme,

¹³ iyo lɔɔsɔ bakanga ba batoko, iyo lokuswa okatowana lande. Iyo lɔwɛlɛkɛ lielo mbo— Hosana! Limɛngɔ la Bolau ende Inde oyasoya nda lina lia Ngɛnɛ, Ende Bɔkɔta wa Isalaele.

¹⁴ Limɔ Yesu loosha efembeli ya punda, Inde loyala se nda yao, kwa loatomoko nda Lokasa mbo—

¹⁵ Boseka wa Siona, owangëke! Tɛnɛ, Bɔkɔta waɛ atoya, Ani atalemi nda efembeli ya punda!

¹⁶ Baeki bande atialuwaka litina lia baoi-ba oso, nde akataliomoko Yesu tala, limɔ iyo loenyela mbo ebaoi-ba batomökö nda Lokasa loasɔ loande la mbo bakeelak’Inde ko ongoma.

¹⁷ Bato ebayalaka lande nda mbile eyataka Yesu ota Lasalo lioi liokuswa nda losai, la ani atɛmɔlɔkɔ Yesu ɛtɛmɔl’inde nda liwa, iyo lokambekesa bato ongoma.

¹⁸ Liao liaaka litina eliakɛkɛ ekuke okatowana lande, eoka mbo basooka mbo Yesu akeliki nde e-ndembe-ye ya ilombo.

¹⁹ BaFalusi loongana to mbo— Ɔsɔɛnɛ to mbo ebitokel’iso bende ko likeela, tɛnɛ ngo wenda bototina bosotut’Inde.

Yesu la BaHela

²⁰ Bamɔi ebayaka nda Elambɔ bayalaka to BaHela,

²¹ eokao iyo lɔkɛ ende Filipo wa bokenge wa Betesaida nda Ngalilai, iyo lofel’inde mbo— Bwana, tolɛmbi nde ndoyɛnɛ Yesu.

²² Filipo lokakambesa Andelo, limɔ la Andelo la Filipo lokambesa Yesu.

²³ Yesu lomutola lau mbo— Mbile esoya to eyetotaliomo Wana wa boto tala;

²⁴ wewe, wewe itoonga lanu mbo— Loköto loa bofonga, sakolo ko lokwa nda nyɛlɛ ko ndowa, ani loyalaka ngo ko lokötö ko lɔmwito kongo, nde eyambo lowa ndowa, ani loao koota befonga wike.

²⁵ Oyasami nde liwawi liande angɛnɛ, atolefesa nde liao, nde oyatoiyela liwawi liande nda wenda-bo, ambo inde koikesa liao nda loiko.

²⁶ Boto ɛlɛmbɛ ndoyala bokuwi wami, atuteke ngo ko Imi, limɔ olo ayali nde Imi, ko omao imɔ nd’atoyalaka bokuwi wami. Boto ekuwela’mi, Sango wami koinel’inde.

²⁷ Kwani botema wami bosowa ngandi finɛ; ¿Iongeke to moni? ¿Mbo uwesaka’mi nda bifembi ya mbile-ye; kongo ko Imi nd’asoiya nda mbile-ye ko l’eoka ya litina-li. Sango, taliaka to lina liaɛ tala. Limɔ limiki losokwa nda use mbo— Isotalia liao tala, la yetaliaka nde liao ko liasi.

²⁹ Ekuke ya bato ebaemalakä omao ebokakä liao, iyo loonga mbo ende elundi eyesokuma, nde bamɔi mbo bokitomo aongi nde lande.

³⁰ Yesu nde lomutola mbo— Limiki-li litiye l’eoka yami, kangä ko l’eoka yanu.

³¹ Ko kwani eba wenda batoatomo njasɔ, ko kwani Bɔkɔta wa wenda-bo atoumbolomo lousa,

³² nde Imi angɛnɛ, atoilomo Imi likolo, yelutaka bato batotina ende’mi.

³³ Yesu loonga ongoma ndoluwesa bato bɔfɔnɔ wa liwa elikaweke Inde.

³⁴ Bato ba ekuke lomutola lande mbo— Toeki nde nda Lokasa loa Bikela mbo Masiya elayalaka nde ko layalaya; ¿Monito Aɛ nd’atoonga mbo loengani nde la Wana wa boto mbo ailomoko? ¿E-Wana wa boto ende to ndai?

³⁵ Yesu loonga to lau mbo— Ko mbile sinyo löwa lokoyala kɔni sisi yanu, Takɛndɛkɛ to nda lowa ani lokoyala lanu mbo lilima litaosh’ino, eoka oyatokɛndɛ nda lilima aitoluwa olo atɔkɛ lande.

³⁶ Akoyali nde löwa lanu, lendeloko ko loao mbo bokinjweke bana ba löwa. Aongakä Yesu ebaoi-ba, Inde losokwa okaisamel’iyo.

³⁷ Kwa akelaka Inde ndembe ya bisisho wike oso wau, iyo angolendelo Inde

³⁸ la ongoma baoi ba Bɔtɔndɔli ako Yesaya lokɔchɔmɔ mbo— ¿Ndai asoimela wɛndi wasu, Bosamba wa Ngɛnɛ bosɔɛnɛlɛ ende ndai?

³⁹ Eoka ya litina-li batiakɔkɔlɔkɔ ndoimela eoka Yesaya nd’aongakä liasi mbo—

⁴⁰ Asotufesa baiso bau la botuku, Asɔsɛlɛ betema yau la botufele Mbo batɛnɛ la baiso bau la Mbo bataluwa litina nda betema yau, Mbo batakikwa ende’mi mbo itasäses’iyo.

⁴¹ Yesaya loonga baoi-ba eoka ɛnɛkɛ̈ nde tala yande la aongaka loasɔ loande.

⁴² Wike w’eba tososha lolendelo Yesu; kongo ko eoka ya BaFalusi batiaaolakä Inde eoka iyo lowanga mbo batasokolomo nda ɛsɔngɔmɛlɔ

⁴³ basamakä nde loinelomo loa bato oso wa eloa Mungu angɛnɛ.

⁴⁴ Limɔ Yesu loamama mbo— Oyatolendelo Imi, aitolendelo ko Imi kongo, kangä ko Inde oyatomakä’mi,

⁴⁵ la oyatɔɛnɛ Imi, atɔɛnɛ imɔ ko Inde oyatomaka’mi.

⁴⁶ Imi nd’asoya nda wenda-bo kwa Lowa, mbo oyatolendelo ko Imi, atiayalek’imɔ nda lilima.

⁴⁷ Eyambo boto eokaka baoi bami nde angolitesa bao, Imi angoata loasɔ loande, eoka itiye ndoyaatakela wenda-bo kangä mbo yuweseke wao.

⁴⁸ Oyatotefokola’mi la atikulie baoi bami, ale la ɔmɔi oyatoatakel’inde njasɔ, ako lioi angɛnɛ elisoonga’mi, liao kongo litoatakel’inde nda lise lia liko.

⁴⁹ Eoka Imi itionge ko l’isosha shami angɛnɛ, kangä Sango oyatomakä’mi nd’afaka’mi ekela yotel’ino la baoi boonga lanu.

⁵⁰ La iluwi nde mbo ekela yande ele ko loiko loa layalaya ende bato; eokao lioi elitoongaka’mi, itoonga lioi kwa aongaka nde Sango lami.