Yoane 11 - Le Nouveau Testament in Kele (Lokele) 1958

Lasalo wa Betania

¹ Boto ɔmɔi ayalaka la loo, ako Lasalo wa Betania, bokenge wa Malia la boloo Wande ako Maleta.

² Malia aaka nde otomali oyasingɔlɔkɔ Ngɛnɛ la baningo ba liɛsɛ, la oyaɔmbɔkɔlɔkɔ batindi bande la swee yande la Lasalo oyaaka la loo aaka welo wande.

³ E-baelo-ba lotomela Yesu wɛndi mbo— Ngɛnɛ, oyasamomu laɛ ale la loo.

⁴ Okakä Yesu ongoma, Inde loonga mbo— E-loo-lo loti to eloa liwa, kangä elɔɛnɛsɛ tala ya Mungu mbo Wana wa Mungu ataliomoko tala ko la loao.

⁵ Yesu asamaka Maleta la etungani yande la Lasalo,

⁶ okakä to Inde mbo Lasalo ale la loo, Inde lotatikala kɔni bacho bambale omao nda elela eyayalak’Inde.

⁷ Mbisa yaamao Inde loonga la baeki mbo— Tɔɛkɛ nda Yudea liasi.

⁸ Baeki loonga lande mbo— Labi, ko kwani kongo, BaYuda lokota ndokushel’Aɛ batalɛ; ¿Otoinwa k’omao liasi?

⁹ Yesu lomutola mbo— ¿Saa biisoyala liu la imbale la löwa? Boto ɛkɛndɛkɛndɛ la löwa, aitowa likulia, eoka atɔɛnɛ nde löwa loa e-wenda-bo,

¹⁰ nde ɛkɛndɛkɛndɛ la ocho, inde kowa likulia eoka löwa loti lande.

¹¹ Inde loonga ongoma, limɔ mbisa Inde loonga lau mbo— Wina lasu ako Lasalo asokwa ilɔ, nde isɔkɛ okasisɔl’inde.

¹² Baeki loonga to lande mbo— Ngɛnɛ, eya to mbo asokwa ilɔ, ambo esäsaka nde.

¹³ Yesu loonga loasɔ loa liwa liande nde iyo loenyela mbo aongi nde loasɔ loa lɔɛumɔ nda ilɔ.

¹⁴ Eokao Yesu lokambes’iyo fololo mbo— Lasalo asokwela se,

¹⁵ la isooka limɛngɔ loasɔ loanu mbo itiyaleke omao, mbo wimeleke; kongo ko tɔɛkɛ end’inde.

¹⁶ Eokao Tomasa, oyatangomu mbo Liasa, loonga la baina lande bako baeki, mbo— Tɔkɛsɛnɛkɛ lande imɔ mbo toweke amamwito lande.

¹⁷ Iyakä to Yesu omao, Inde loosha Lasalo asoingala oko bacho basatɔ nda losai.

¹⁸ Betania waaka tina la Yelusaleme, esika kwa yiso bilɛfu imbale,

¹⁹ la wike wa BaYuda loya ende Maleta la Malia ndɔɔnjɔnj’iyo nda ewa ya welo wau.

²⁰ Okakä to Maleta mbo Yesu asoya, inde lɔkɛ okatowana lande, ani Malia akoyala se nda ndakɔ.

²¹ Maleta loonga to la Yesu mbo— Ngɛnɛ, yambo wayala eyamaya, ani welo wami atikwelo se.

²² Nde ango kwani iluwi nde mbo lona elokafelek’Aɛ Mungu, Inde kofa aɛ ngo ko loao.

²³ Yesu loonga lande mbo— Welo waɛ atotɛmwa liasi la liwawi.

²⁴ Maleta loonga lande mbo— Iluwi nde mbo atotɛmwa nda litɛmwi lia lise lia liko.

²⁵ Yesu loonga lande mbo— Imi yende litɛmwi la liwawi; oyatolendelo Imi, eyambo ekwela se, inde koyala la liwawi.

²⁶ Boto la boto oyayali la liwawi la elendelo Imi, atilawek’imɔ layalaya. ¿Oimeli nde ongoma?

²⁷ Inde loonga la Yesu mbo— Eingo, Ngɛnɛ. Imi nd’aimeli mbo Aɛ wende Masiya, Wana wa Mungu oyatoya nda wenda.

²⁸ Limɔ aongak’inde ongoma, Maleta lɔkɛ okata etungani yande ako Malia lioi wisisa, inde mbo— Boekesi ale eya la asofel’aɛ.

²⁹ Okakä Malia ongoma, inde loemala lisasaya okakɛ ende Yesu.

³⁰ Nde Yesu atitiyeke nda okenge, nde akoyali nda elela ena olo atowanak’Inde la Maleta.

³¹ BaYuda ebayalaka nda ndakɔ amamwito la Malia ndɔɔnjɔnj’inde, ɛnɛk’iyo mbo aemali futuku, la mbo asokuswa, iyo lotutak’inde, eoka batangaka nde mbo atɔkɛ nda losai okalela ina.

³² Ayaka to Malia nda elela olo ayali Yesu, la ɛnɛkɛ̈ Malia wɛnɛ Inde, inde loswa balui se nda bakolo bande, inde loonga lande mbo— Ngɛnɛ, yambo wayala eyamaya, ani welo wami atikwelo se.

³³ Limɔ ɛnɛkɛ̈ Yesu kwa atolela Malia la BaYuda imɔ ebayali lande, Inde losumasuma la Inde looka ngandi finɛ,

³⁴ Inde mbo— ¿Osoinges’inde anima to? Iyo loonga lande mbo— Ngɛnɛ, yauku oyɛnɛ.

³⁵ Yesu lolela foo.

³⁶ BaYuda loonga to mbo— Tɛnɛ, aina losamɔ elosam’Inde la Lasalo!

³⁷ Nde bamɔi bau loonga mbo— ¿Oyalioliki nde baiso ba boto wa botuku, inde angokɔkɔlɔ ango okufesa mbo e-boto-yo ataweke?

³⁸ Limɔ Yesu losumasuma liasi l’ikɛnɛnɛ, Inde lɔkɛ konda losai loko lowa la litalɛ lifi lolinjaka loao.

³⁹ Yesu loonga mbo— Sokolaka litalɛ! Welo wa oyawi nde, ako Maleta, loonga mbo— Ngɛnɛ, asokungwa oko litï eoka asowa ko bacho banɛi!

⁴⁰ Yesu loonga lande mbo— ¿Itionge laɛ mbo wimela ani wɛnɛkɛ nde tala ya Mungu?

⁴¹ Limɔ iyo losokola to litalɛ. Lamao Yesu loila baiso likolo, Inde mbo— Sango, isofaef’Aɛ kelekëlë eoka osooka Imi.

⁴² Iluwi nde mbo otokaka’mi mbile la mbile, kongo ko isoonga ongoma ko l’eoka ya ekuke ya bato ebemali tina mbo bimeleke mbo Aɛ nd’atomaka’mi.

⁴³ Aongaka’Inde ongoma, Inde loamama la limiki lifi mbo— Lasalo, kuswaka lousa!

⁴⁴ Inde oyawiki lokuswa ani akandomu la besamba la bakolo la bisinda la bɔmbɔ wande bolinjomu la itambala. Yesu loonga lau mbo— Faikolak’inde la machak’inde akɛkɛ eyande.

⁴⁵ Wike wa BaYuda ebayaka nda ndeli ende Malia, ɛnɛkɛ̈ iyo eloakelaka Yesu, iyo lolendelo Inde,

⁴⁶ nde bamɔi bau lokakɛ ende BaFalusi, la iyo lokambesa iyo loasɔ eloakelaka Yesu.

Ikumbɛ sha BaYuda eoka ya bisisho ya Yesu

⁴⁷ Eokao Kanga ebieti la BaFalusi lɔsɔngɔmɛsɛ ikumbɛ lamao iyo loonga mbo— ¿Totokela nd’iye, eoka boto-yo nd’atokelaka ndembe ya bisisho wike?

⁴⁸ Tomach’Inde ongoma, batotina batolendelo Inde, limɔ BaLoma beyaka nde oyasokoel’iso elela la yakakaelo yasu.

⁴⁹ Limɔ ɔmɔi wau ako Kayafa oyayalaka Kanga eyeti nda mwaka ona, inde loonga lau mbo— Ino b’ikumbɛ otiluwe loasɔ ango sinyo,

⁵⁰ otienye mbo loengani nde mbo boto ɔmɔi kongo aweleke bato batotina la mbo tukela yasu etotina etasɛɛsɛlɛ.

⁵¹ Ationge ongoma l’isosha shande angɛnɛ, kongo ko kwa ayalak’inde Kanga eyeti nda mwaka-ao atɔndɔlɔ̈kɔ̈ mbo Yesu ewelaka ngo ko tukela etotina,

⁵² inga eoka ya tukela ya BaYuda kongo, kangä mbo awacheke la tukela ɛmwito ko bana ba Mungu ebamelakana nda wenda.

⁵³ Ongoma konda lise lina, iyo lotwana kuko mbo bolek’Inde.

⁵⁴ Eokao Yesu atiakendɛlɛk’imɔ sisi ya BaYuda nde Inde losokwa omao okakɛ nda okenge boko Efulaima tina la yese ya liɔmbɛlɛ; Inde lotikala omao amamwito la baeki bande.

⁵⁵ Elambɔ ya Lieti ya BaYuda yaaka nde tina la bato wike ba yese lɔkɛ nda Yelusaleme oso wa Elambɔ ndokasaesomo.

⁵⁶ Iyo loluka to Yesu omao la aemelak’iyo nda Ndakɔ ya Mungu, iyo lofelakana mbo— ¿Oenyeli nde moni; mbo aitoya nda Elambɔ?

⁵⁷ Kanga ebieti la BaFalusi bataka ndola mbo boto eluwa olo ayali Yesu, akambeseke iyo, mbo baundesek’Inde.