Yoane 10 - Le Nouveau Testament in Kele (Lokele) 1958

Botingani bolau wa Bɛkɔkɔ

¹ Wewe, wewe, itoonga lanu mbo— Boto oyaitɔɔtɔkɔ ko la bome nda likula lia bɛkɔkɔ, kangä ndoakala liao la elela yasi, ambo ona ende wiya la booni,

² nde oyatɔɔtɔkɔ kola bome ende botingani wa bɛkɔkɔ.

³ Bolambi wa bome atoliokoel’inde bome la bɛkɔkɔ bitoka limiki liande; atotaka eyande bɛkɔkɔ lina, ɔmɔi l’ɔmɔi, limɔ atotol’iyo oso ko lousa.

⁴ Asoumesa eyande bɛkɔkɔ lousa; limɔ atoeteel’iyo oso la bɛkɔkɔ bitotutak’inde eoka bisoluwa limiki liande,

⁵ biitotuta bɔɛnda; bitokwel’inde botili eoka bitiluwe limiki lia bɔɛnda.

⁶ Yesu lotel’iyo bombila-bo, kongo ko batialuwäkä litina eliaongäk’Inde lau.

⁷ Eokao Yesu loonga lau liasi mbo— Wewe, wewe itoonga lanu mbo Imi yende bome ende bɛkɔkɔ.

⁸ Batoti ebayäkä oso wami bende biya la beoni, kongo ko bɛkɔkɔ bitioke bamiki bau.

⁹ Imi yende Bome; boto ɛɔtɔkɔ ko lami, inde kotekama, atɔɔtɔkɔ la atokuswakuswa, l’ani atoosha bieka yola.

¹⁰ Wiya aitoya sakolo ngo mbo iyeke la mbo aoleke la mbo asɛɛsɛlɛsɛkɛ bɛkɔkɔ; Imi nd’ayiki mbo bayaleke la liwawi la bayaleke la lilya.

¹¹ Imi yende Botingani bolau; Botingani bolau atomacha liwawi liande ko ndowela bɛkɔkɔ.

¹² Bokuwi wa bosombo oyati botingani, oyatisɛlɛ bɛkɔkɔ eyande angɛnɛ, atɔɛn’inde ngɔi etoya, inde komacha bɔkɔkɔ, kokwa botili; limɔ ngɔi koungwakela bɛkɔkɔ, inde komelekesa yao mya.

¹³ Atokwa botili ongoma eoka ale ko bokuwi wa bosombo, aitotakela bɛkɔkɔ bolenda.

¹⁴ Nde Imi yende Botingani Bolau la iluwi nde eyami bɛkɔkɔ la eyami nd’aluwi ko Imi;

¹⁵ kwa Sango nd’aluwi Imi, ko Imi imɔ nd’aluwi Sango la isomacha liwawi liami ko ndowela bɛkɔkɔ.

¹⁶ Yende imɔ la bɛkɔkɔ yasi ebiti ya e-liasa-li, lole loami ndotola imɔ ko yao oso la bɛkɔkɔ yokaka nde limiki liami, limɔ beyalaka nde ko liasa limwito la Botingani ko ɔmwito.

¹⁷ Eokao Sango asoniya Imi eoka Imi nd’amachi liwawi liami mbo yɔlɛkɛ liao liasi.

¹⁸ Angwɛnɛ boto wɔnɔkɔlɔ liao ende’mi, nde Imi nd’atomacha liao ko Imi angɛnɛ. Yende l’isosha shomacha liao la yende imɔ l’isosha shɔɔlɔ liao liasi. Sango angɛnɛ nd’atelaka’mi ekela-ye.

¹⁹ Eoka ya baoi-ba BaYuda batisanganeke kuko ko liasi;

²⁰ wike loonga mbo— Asɔɔtɛlɔmɔ la bolimo obe, ongoma asowa loseka. ¿Otok’Inde ko l’eoka iye to?

²¹ Nde basi mbo— Tonango twande toti twa boto oyaɔtɛlɔmu la bolimo obe. ¿Bolimo obe nd’atokɔkɔlɔ oliola baiso ba eba botuku?

BaYuda lokota ndoundesa Yesu

²² Yaäkä nde mbile ya Elambɔ ya Liuchi lia Ndakɔ ya Mungu nda Yelusaleme nda mbile ya bondiya,

²³ Yesu lɔkɛndɛkɛndɛ nda lilɛlɛ lia Ndakɔ ya Mungu, liko elia Solomo.

²⁴ Lamao BaYuda lolingel’Inde, iyo loongaka lande mbo— ¿Otoeyaeyesa betema yasu konda eni to mbile? Aɛ boyala Masiya, kambesak’iso fololo.

²⁵ Yesu lomutola lau mbo— Isokambes’ino, nde otiimele. Bekeeli ebitokelaka’mi nda lina lia Sango wami, yao nd’atokambes’ino loasɔ loami.

²⁶ Kongo ko ino otiimele eoka oti bɛkɔkɔ yami.

²⁷ Bɛkɔkɔ yami bitokaka limiki liami, la Imi nd’asoluwa yao la bitotutaka’mi;

²⁸ Imi nd’atofaefayao liwawi lia layalaya, bitilasɛɛsɛlɛkɛ la angwɛnɛ boto wɔnɔkɔlɔ yao nda bosamba wami.

²⁹ Sango wami oyafäkä’mi yao, alongeli nde batotina, angwɛnɛ angɔmɔi wokɔkɔlɔ ndɔɔnɔkɔlɔ ango yeka nda bosamba wande.

³⁰ Imi la Sango twende ko ɔmwito.

³¹ BaYuda loilaka batalɛ liasi mbo bakushelek’Inde bao.

³² Yesu loonga to lau mbo— Isotambel’ino bekeeli bilau wike ko l’isosha sha Sango, otokushela’mi batalɛ loasɔ loa boni to bokeeli?

³³ BaYuda lomutoel’Inde mbo— Toitokushel’Aɛ batalɛ loasɔ loa bokeeli bolau kangä loasɔ loa lisɛɔli lia Mungu, eoka Aɛ ako boto kongo, nd’aenganesi Aɛ angɛnɛ la Mungu.

³⁴ Yesu lomutola lau mbo— ¿Lotitomo nde nda Lokasa loa Bikela yanu mbo— Imi mbo— Wende BaMungu?

³⁵ ¿Eya to mbo batangomökö BaMungu ebafomökö isosha sha Mungu l’ani Lokasa loa Mungu angotombolomo,

³⁶ monito ino koonga lami oyuchomu la Sango la oyatomomökö lande nda wenda, mbo— Ososɛɔlɔ Mungu, eoka mbo iongiki mbo Yende Wana wa Mungu?

³⁷ Eya to mbo itikele bekeeli ya Sango wami, wimelëke’mi.

³⁸ Kongo ko eya mbo yekelaka yao, otiimeleke’mi, imelaka ngo ko bekeeli angɛnɛ mbo boluweke la mbo wimelek’imɔ mbo Sango ale lami la Imi nd’ayali la Sango.

³⁹ Eokao iyo loluka fofe youndes’Inde liasi, nde Inde loowana nda besamba yau.

⁴⁰ Limɔ Inde lɔkɛ okaleka Yaladene liasi nda elela olo alufiäkä Yoane olufia bato oso, Inde lotikala omao;

⁴¹ la bato wike lɔkɛkɛ end’Inde, iyo loonga mbo— Yoane atiakelaka ndembe y’esisho, nde bitotina ebiaongaka Yoane eoka ya e-boto-yo yende wewe.

⁴² La bato wike lolendelo Inde omao.