Yakobo 5 - Le Nouveau Testament in Kele (Lokele) 1958

¹ Tɛnɛ ngo, ino bafoka. Lelaka, ulaulaka loasɔ loa bemusi ebikayek’end’ino.

² Bieto yanu bisofɔndɔkɔ la bisinda yanu bisobeba la fomboli;

³ mbela la falata yanu bisoliakama la batalɛ la batalɛ bana batotikala kwa tuka yof’ino se, la bao batofechaka lokomba loanu kwa bösä; ososɔnjaka bondanda nda bacho ba liko.

⁴ Tɛnɛ, bieto ya basali banu ebatwaka eula ya bilanga yanu, biko yao ebisɔnɔkɔlɔ ino end’iyo, yao to bisoamamel’ino la bamiki ba ebatwaka eula yanu basɔɔtɔ ko nda batoi ba Mungu Ngɛnɛ wa Bikuke.

⁵ Ono nda wenda walaka bieka ya bonuku la wakaneloko yɛmɛ yanu, watumesaka betema yanu l’enika la lise lia liömä lifi.

⁶ Osofaefa ewa liengani se, osool’inde; atifekel’ino ango sinyo.

⁷ Eokao, Bitungani, owëke esole ko nda bayelo ba Ngɛnɛ wasu. Tɛnɛ ngo, ngɛnɛ wa elanga atoumbakela eula ya tuma etosɔlɛmb’inde finɛ, aitowaka esole ko nd’akatɔnɛkɛ mbula ya biää la mbula ya bɔtɔkɔ.

⁸ Ino imɔ owëke esole, kɔkɔmɛsɛkɛ betema yanu eoka bayelo ba Ngɛnɛ wasu basamboya tina.

⁹ Bitungani, okimakimanëke mbo otafomo se nda liataki. Tɛnɛ, Wataki akoemala nda bome.

¹⁰ Bitungani, böluka etichelo eoka ya winikɔlo wa bato ebatiawaka esole, tichaka Batɔndɔli ebaongaka ko nda lina lia Ngɛnɛ.

¹¹ Tɛnɛ, toisotanga bato ana ebakɔkɔmɔkɔ la bofiili, mbo Eba Limɛngɔ. Osookak’imɔ loasɔ loa bɔkɔkɔmu wa Yobo, la osɔɛnɛ lisangi lia Mungu eoka yande, la ani Ngɛnɛ Mungu asotuma fuu la ngandi la shota.

Bikanɔ la baölo ba wewe

¹² Bitungani yami, loasɔ lɔmɔi losolongela to, loko mbo— Otinyëke ekanɔ, ango ko la Use, ango la se, ango la ekanɔ ya kanda yasi; nde Eingo eyetosingwak’ino, eyaleke ngo ko Eingo, la Mbayo ngo ko Mbayo kongo, mbo otafomo se nda liataki.

Lisomboli liouwesa bato basi

¹³ ¿Ɔmɔi wanu atoka wale? Asombokoleke to! ¿Ɔmɔi wanu nd’asoyaimwa olau? Achweke to bɔɛlɛ!

¹⁴ ¿Ɔmɔi wanu ayali nde la loo? Ateke biange ya Etanda lioi, basombokoelek’inde, balɔkɛsɛk’inde baita nda lina lia Ngɛnɛ;

¹⁵ la lisomboli lia liimeli litouwesa boto ona wa lokambo la Ngɛnɛ atosäsesa nd’inde liasi. Eya mbo asokela batwanelo, bemɛsɛlɛmɔkɔ inde.

¹⁶ Sanokolanaka to batwanelo banu, sombokoelanaka mbo bosasesomoko säsosäso. Lisomboli lia boto wa liengani litokɔkɔlɔ likuwa lia likama.

¹⁷ Eliya aaka boto wa liluku kwa eliasu, la inde losombola ndosombola mbo mbula etatɔnɛkɛ, la mbula etiatɔnɔkɔ nda nyɛlɛ ko la miaka bisatɔ la tengai liambɛ,

¹⁸ limɔ inde losombola liasi la buse lotɔnɛsɛ mbula la nyɛlɛ lɔɔ̈tɔ̈ tuma twa yao.

Liinoli lia boto wa batwanelo

¹⁹ Bitungani yami, eya mbo boto wanu esekwaka nda mboka ya wewe la wasi koinol’inde liasi,

²⁰ aluweke mbo boto oyasoinola boto mbo asekweke nda mboka ya efinole, ambo atouwesa bolimo wande nda liwa la atoliaka ambɔlɛ wa batwanelo.