Yakobo 2 - Le Nouveau Testament in Kele (Lokele) 1958

Okwelakwelëke biɔmbɔ ya bato ba Etanda

¹ Bitungani yami, okwelakwelëke biɔmbɔ ya bato nda lilendelu liolendelo Yesu Masiya, Ngɛnɛ wasu wa tala.

² Eoka boto ɛɔtɔ nda ɛsɔngɔmɛlɔ yanu ani awati toketi twa loela la bisinda ya bɔfɛkɔ finɛ, limɔ boto wasi wa iuwe ɛɔtɔ ani awati ko bisinda ya baɔmbɔ̈,

³ limɔ asolɛlia ino boto oyawati bisinda ya bɔfɛkɔ la otoonga lande mbo— Yalaka sumbu se eya elela elau; nde, ende oto wa iuwe, ino mbo— Emalaka onamona, ango ko mbo— Yalaka se nda batindi bami,

⁴ ¿Oitotwanesa bato ongoma la oisokinjwa bakomyi ba baenyeli babe?

⁵ Toka, Bitungani ebisamomu lami. ¿Mungu aisoaa eba touwe nda wenda-bo mbo bayaleke bafoka nda lilendelu la mbo basangoleke isosha nda Bɔkɔta ewatikak’Inde lisakä liofaef’iyo ebasosam’Inde?

⁶ Nde ino nd’asosɛɔlɔ boto-yo wa iuwe; ¿Bafoka baisokakales’ino la owau, baitosuliak’ino nda ekomyelo ya njasɔ?

⁷ ¿Iyo ana baisomɔlɔkɔ Lina lia tala elitangelomu ino?

⁸ Nde ango bokɔcha ekela ya Bɔkɔta kwa asɔnɔmɔkɔ nda Lokasa, mbo— Samaka boyalani laɛ kwa aɛ angɛnɛ, ongoma otokela olau.

⁹ Kongo ko eya mbo bokwelakwela biɔmbɔ ya bato, ani osokwa litwanelo, la ongoma Bikela bisof’ino se mbo batefokoli ba yao.

¹⁰ Eoka boto oyasokɔcha Bikela bitoti, nde kotwanelo nda ekela ko ɛmɔi, ambo asofomo se nda bitotina.

¹¹ Eoka Inde oyaongaka mbo— Ochwëke nyongo, aongak’imɔ mbo— Olëke boto; eya to mbo, otichweke nyongo, nde osoola boto, ambo wende botefoli wa Bikela.

¹² Ongaka to la kelakaka bekeeli kwa bato ebakatelomoko ko la Bikela ya toote.

¹³ Eoka boto oyatiwɛlɛkɛ bato basi shota, ona atoatelomo njasɔ l’angwɛnɛ to shota; shota sisoomala mbo sisolonga nda likomyi.

Ebitoimel’iso la ebitokel’iso

¹⁴ ¿Bitungani yami, boto eonga mbo ale la liimeli, ani atikele yeka yokɔcha liao, boni to bolau? ¿Mbo liimeli lina lisokɔkɔlɔ ndouwes’inde?

¹⁵ Boto wanu, ango ko otolome, ango ko otomali, eyala la boeno wa bisinda yowata la bieka yolaka lise la lise,

¹⁶ ɔmɔi wanu koonga lau mbo— Takɛndɛkɛ la wɛlï, ɔtɔkɔ sumbu bosa, okaneloko bieka; nde otifek’iyo yeka ebisoeno bindo yau, boni to bolau anyo?

¹⁷ Liimeli imɔ ko ongoma, eya mbo litikɔchɔmɔ la bekeeli, ambo lisowa liao angɛnɛ.

¹⁸ Kongo ko boto ɔmɔi koonga mbo— Aɛ wende la liimeli, nde imi yende boto oyatokela bolau; tambaka’mi liimeli liaɛ elitikɔchɔmɔ la bekeeli, limɔ imi nd’atotamb’aɛ liimeli liami ko la bekeeli yami.

¹⁹ Osoimela mbo Mungu ende ko Ɔmwito; osokela olau, nde belimo ebe bisoimela imɔ la bisotalimwa.

²⁰ Boto w’ebebel ¿Olɛmbi nde ndoluwa litina lia lioi-li, mbo liimeli elitikɔchɔmɔ la bekeeli lile ngo wawa?

²¹ ¿Mbo Abalayama tata wasu, atilongesomoko ko la bekeeli yande eyasɛlɛk’inde wana wande ako Isaka nda etumbelo?

²² Osɔɛnɛ to mbo liimeli losungana la bekeeli yande la mbo liimeli lisɔɔlwa ko la bekeeli yande;

²³ la ongoma Lokasa loa Mungu lokɔchɔmɔ ani aongaka loao mbo— Abalayama alendeloko Mungu la liimeli liande liatangomokö end’inde mbo liengani, la inde lotangomoko Wina wa Mungu.

²⁴ Ongoma osɔɛnɛ to mbo boto atolongesomo ko la bekeeli yande la inga ko l’eoka ya liimeli kongo.

²⁵ ¿Ko ongoma Lahaba botomali wa bolëfë, atialongesomoko ko la bekeeli yande, ani anyangelak’inde ebatomomoko tɔtɔmbi limɔ inde loinol’iyo ko la mboka yasi?

²⁶ Eoka bindo ebisosɛnyana la bolimo bisoya ko bolyo, bisowa; ko ongoma liimeli elisosɛnyana la bekeeli lisowa ndowa.