Yakobo 1 - Le Nouveau Testament in Kele (Lokele) 1958

¹ Imi Yakobo, bɔkɔwa wa Mungu la wa Ngɛnɛ Yesu Masiya, nd’atoseela eba tukela liu la imbale ebasomelakana nda wenda mia.

² Bitungani yami, atotowakan’ino la bakoteli ba bɔfɔnɔ la bɔfɔnɔ, tangaka nde mbo ende litina lioka ko limɛngɔ lifi,

³ eoka osoluwa mbo likɔtɔlɔmu lia lilendelu lianu litoeshel’ino likɔkɔmɛlɛ.

⁴ Nde machaka likɔkɔmɛlɛ liɔlwɛkɛ mbo ino angɛnɛ ɔlwɛkɛ hɔlɔoɔla wenganeke hele, angoomelo loasɔ angɔlɔmɔi.

⁵ Nde eya mbo ɔmɔi wanu eomelo wɛlï, afeleke ngo Mungu oyatofaekefa batotina lifaefela, angoimaima, ani wao bofaefomoko inde.

⁶ Nde afeleke ko la lilendelu, angota fee; eoka oyatotaka fee ende kwa litutu nda liyande elitoeyaeya la elitonyɛngɛnyɛngɛ la lomba.

⁷ Boto wa bɔfɔnɔ-bo atatanga nde mbo ɛɔlɔkɔ nde yeka ango ɛmɔi ende Ngɛnɛ,

⁸ eoka ale ko boto wa betema imbale l’ewa loeyaeyo nda biyaelo yande bitotina.

⁹ Etungani wa liikami se, aomaleke eoka ya lotalio loande;

¹⁰ nde ewa lifoka, ko l’eoka ya liikami se liande, eoka atosɛɛsɛlɛ kwa lɔfɔtɔtɔ loa elanga.

¹¹ Eoka löwa lososɔswa la efanga ya loao esobɛɛlɛsɛ elanga, limɔ fɔtɔtɔ nda yao bitowɛlɛkɛmɛ se, limɔ wano wa yao botosɛɛsɛlɛ fɛɛ. Ko ongoma ewa lifoka atosɛɛsɛlɛ oko nda kɛndɔ yande.

¹² Boto oyatokɔkɔmɔ nda likoteli ende la limɛngɔ fuu, eoka akasilek’inde ndokɔtɔlɔmɔ, inde kofomo iyoyo sha loiko eshatikaka Ngɛnɛ lisakä liofaef’iyo ebatosamak’Inde.

¹³ Atokɔtɔlɔmɔ boto, ataonga mbo— Isokɔtɔlɔmɔ ko la Mungu angɛnɛ; eoka Mungu atikɔkɔlɛ ndokɔtɔlɔmɔ nda njasɔ ibe, la Inde angɛnɛ aitososhela boto angɔmɔi;

¹⁴ kongo ko boto la boto asososhelomo ko la yɛmɛ yande angɛnɛ ebitokokɛl’inde kwa swi, la bitɔɔngɔl’inde kwa nyama.

¹⁵ Lamao mbisa yɛmɛ eyesoaelo lieme, koota litwanelo, la mbisa akaelyeke litwanelo, liao koota ngo liwa.

¹⁶ Olimbomöko, Bitungani yami!

¹⁷ Bafaefi batotina la bɛkɛɛ bitoti ebile bilau l’ebisoeliama, bisosekwa olo nda Use ende Sango wa baangangi oyaitokikwakikwa ango sinyo, la angwɛnɛ ango ndembe ya likikwi.

¹⁸ Asangaka ndokel’iso bana bande ko la Lioi lia wewe, mbo iso toyaleke sumbu eula ya yaatotina ebikakelek’Inde mbisa.

Boyaeli wa wewe wa bana ba Mungu

¹⁹ Bitungani ebisamomu lami, luwaka nde lioi-li, mbo— Boto la boto umamaka ndoka, nde ongaka l’imɔngi, somaka imɔ ko l’imɔngi kongo;

²⁰ eoka lisomi lia balomboki liitoeshel’iso liengani lia Mungu.

²¹ Eokao siamesaka njasɔ bitotina ya bɔwɛwɛ la sheteseli sha bobe bototina, limɔ aelaka wɛndi ebosolɔɔmɔ nda betema yanu ko la liikami se, eoka bosokɔkɔlɔ ndouwesa belimo yanu.

²² Nde litesaka wɛndi, oyalëke ko ebatokaka la batoi kongo ndolimbaka betema yanu angɛnɛ.

²³ Eya to mbo boto eokaka wɛndi, angolitesa wao, engani nde kwa boto oyatotichaka bɔmbɔ ewaotomoko lande, nda wɛli wa talatala,

²⁴ limɔ ani asolembeel’inde angɛnɛ, inde kosekwa, inde koosala kwa ayal’inde.

²⁵ Kongo ko inde oyatowɛlɛkɛ Bikela baiso, biko bikela ebisɔɔlwa l’ebisosɛlɛ boto iote angɛnɛ, limɔ ekɔkɔmɛlɛ kɔkɛ, angoosala ebisokak’inde, kangä bolitesi nda bekeeli yande, ambo boto ona atoyaimwaka la limɛngɔ nda yao ebitokel’inde.

²⁶ Boto kotanga mbo ayali oyatolitekesa njasɔ ya Mungu, ani aitoaesa lolamɛ se, inde nd’atolimbaka botema wande angɛnɛ, la lilitesi liande lile ngo ko wawa.

²⁷ Lilitesi lia njasɔ ya Mungu elile litanu, angwɛnɛ litwanelo ango limɔi nda baiso ba Mungu Sango lile ngo ko ano, mbo ndotingakanaka l’eba tika ya sango l’eba tika ya batolome nda mbile ya bifembi yau la ndoyala la botanu, angwɛnɛ ango liälö lia wenda-bo.