Tomo Ya Batomomu 3 - Le Nouveau Testament in Kele (Lokele) 1958

Louweso loa boto wa ekoti

¹ Aɛkɛ to Petelo la Yoane nda Ndakɔ ya Mungu nda mbile ya lisomboli lia lilongolongo,

² boto ɔmɔi oyaaka la ekoti ko nda sɔlɔ ya nyango wande lotolomo la bato bamɔi, iyo losɛlɛ inde se lise la lise tina la bome wa Ndakɔ ya Mungu ewatangomoko mbo Bɔfɛkɔ, mbo ömbakeke sumbu bieto ende ebatɔɔtɔkɔ nda Ndakɔ.

³ Ɛnɛk’inde Petelo la Yoane batɔɔtɔ nda Ndakɔ ya Mungu, inde lömbel’iyo sumbu bosombo.

⁴ Nde Petelo la Yoane lotichak’inde, Petelo mbo— Wɛlɛk’iso baiso!

⁵ Inde lowɛl’iyo bonono ani atoumbakela mbo atɔɔlɔ bieto end’iyo.

⁶ Nde Petelo loonga mbo— Iti ango la bieto ebikɛkɛ kwa ebifi, kongo ko yao eyele lami, itofaef’aɛ ngo ko yao; nda lina lia Yesu wa Nasaleta, tangwaka.

⁷ Petelo lounda bosamba wande wa olome, inde loemes’inde, kwaamao batindi la bakakalaka bande lowangema.

⁸ Limɔ inde lotondwa likolo, inde loemesana, inde loakola ndɔkɛndɛ, inde lɔɔtɔ nda Ndakɔ ya Mungu amamwito lau ani atokɛndɛkɛndɛ, l’ani atotondwatondwa, l’ani atoinakela Mungu.

⁹ Bato batotina lɔɛnɛ ani atotangwak’inde l’ani atoinakel’inde Mungu,

¹⁰ iyo lolembeel’inde mbo ende boto ona oyayaliki ndömba bosombo nda bome ofi wa Ndakɔ ya Mungu boko Bɔfɛkɔ, iyo lowanga finɛ la limwaali lifi eoka ya loasɔ elosoyel’inde.

¹¹ Boto lokuamela Petelo la Yoane, limɔ bato batotina losɔngɔkɔmɔ bokamu nda lilɛlɛ eliatangomokö mbo Elia Solomo, iyo lomwaala finɛ.

¹² La ɛnɛkɛ̈ Petelo ongoma, inde loonga lau mbo— ¿Bato ba Isalaele, monito osomwaala la osowɛl’iso bonono kwa mbo iso angɛnɛ ko la bofoka wasu, ango ko la liengani liasu, tosokɛndɛsɛ inde?

¹³ Mungu wa Abalayama la wa Yisaka la wa Yakobo, Mungu wa batata banu asotalia Wana wande tala, ako Yesu, oyawambak’ino, la oyafekak’ino oso wa Pilato ani Pilato losanga ofaikol’Inde,

¹⁴ kongo ko ino nd’afekak’Indë ewa Botanu la Wengani la wafelaka mbo boli wa bato afomoko ino,

¹⁵ nde waolaka Bɔkɔta wa Liwawi; kongo ko Mungu nd’atɛmɔlɔk’Inde nda liwa, la iso nd’ale baɛni ba loasɔ-lo.

¹⁶ Yende ko la liimeli oimela lina liande mbo boto-yo asowangema oyasɔɛnɛ la oyasoluw’ino; la liimeli liande lisouwes’inde la bosasu bototina-bo oso wanu yaatotina.

¹⁷ Kwani to beoto, isoluwa mbo ino wakelaka ongoma ko la botutuku, kwa akelaka imɔ ko benyafala yanu.

¹⁸ Nde ongoma Mungu asokɔcha lona eloaongak’Inde kwala ko la bɛnɔkɔ ya batɔndɔli, loko mbo Masiya wande okaka nde tokange twa liwa.

¹⁹ Kalanganaka to la kikwaka, mbo batwanelo banu bafanjakomoko,

²⁰ mbo Ngɛnɛ Mungu afek’ino baɛumɛlɔ, mbo atomek’ino Masiya, Yesu oyatomelomoko ino.

²¹ Loengani nde mbo Use bonyangelek’Inde konda mbile eyekakɔchɔmɔkɔ bitotina eyaongaka Mungu ko la bɛnɔkɔ ya batɔndɔli bande kwalakwala.

²² Mɔsɛ nd’aongaka mbo— Ngɛnɛ Mungu wanu atotaliel’ino ɔmɔi wa beoto yanu Bɔtɔndɔli, Kwa ataliaka Inde imi angɛnɛ. Bolailaka bitotina ebikaongek’Inde lanu,

²³ la batotina ebaitolaila Bɔtɔndɔli ona Belasɛɛsɛlɛsɔmɔkɔ sisi ya bato.

²⁴ Eingo, batɔndɔli batotina imɔ ko Samwele ko eba mbisa yande, bataka boeki wa e-bacho-ba.

²⁵ Ino wende bana ba batɔndɔli la ba Ngɛla eyatinyaka Mungu la batata banu, ani aongak’Inde la Abalayama mbo— Nda lioti liaɛ befindi bitotina ya wenda bifotesomoko.

²⁶ Ataliaka Mungu otalia Wana wande, Inde lotoma Inde end’ino oso, mbo afotesek’ino ko la likikwi liosokol’ino nda batwanelo banu.