Tito 3 - Le Nouveau Testament in Kele (Lokele) 1958

Boyaeli w’eba Etanda nda wenda-bo

¹ Enyelesak’iyo mbo baliteseke bɛkɔta l’ebale l’isosha likolo liau, kuliaka baiti bau, la umamaka okela bakuwa balau batotina,

² la mbo batatɔngɔ boto angɔmɔi, batawesana, kangä mbo bayaleke la bɔfɔɔmu ani batoyalana la batu batotina la bɔɔngu.

³ Osooso iso nd’ayalaka imɔ ko bibebe, totefola, twalimbokomöko nda loeyaeyo, twalitesaka yɛmɛ ibe la bamɛngɔ ba bɛfɔnɔ wike, twatimbanaka nda bobe la luno, twaiyomoko la basi la twaiyanak’imɔ;

⁴ kongo ko ɛnɛlɛkɛ̈ to booto bofi la losamɔ lofi loa Mungu Bouwesi wasu,

⁵ Inde louwes’iso, inga eoka ya bekeeli ya liengani eyakelak’iso, kangä ko l’eoka ya booto wande angɛnɛ, Inde louwes’iso ko la lisooli la liotomu liyai eliafomoko iso la Bolimo Botanu,

⁶ oyawɛlɛkɛmɛ end’iso ko l’eoka ya Yesu Masiya Bouwesi wasu,

⁷ litina mbo toenganesomoko ko la booto wande, la tosangoleke botiko wa iɛli sha loiko loa layalaya.

⁸ Liölo-li lile wewe la isangi nde mbo wekesek’iyo mbo ebasolendelo Mungu batimbaneke la wɛli nda bakuwa balau, ongoma lole lolau la lotosungaka bato finɛ.

⁹ Kongo ko kufaka otakana fee litela, ango ko loasɔ loa tunya ya fɛto ya oso, ango ko loasɔ loa bosho wa Bikela eoka fee bina bitisung’iso la bile ko beongaonga wawa.

¹⁰ Sɛnyanaka la boto oyatolɛmbɛ ko ndokomya njasɔ ko inde angɛnɛ, ani osotaf’inde boimo ɔmɔi ango imbale;

¹¹ luwaka mbo bɔfɔnɔ-bo wa boto asofenya ebisomel’iso la batwanelo, la asof’inde angɛnɛ se.

Wɛndi la liseeli lia losilo loa lokasa

¹² Eyakatomeleke’mi Alutema, ango ko Tukiko end’aɛ, umamaka oya ende’mi nda bokenge wa Nikopoli, eoka isosanga ndokayalaka omao nda tengai ya bondiya.

¹³ Kotaka sumbu ndokɛsɛ Sena oyale ikomya, la Apolo, nda lɔkɛndɔ loau la mbo bataomelo yeka.

¹⁴ Bato ebasu imɔ bekeke ndokelaka bakuwa balau bosilesa beeno yau mbo batalengeela bieka.

¹⁵ Batotina ebale ono amamwito lami basoseelak’aɛ; seelaka eba Etanda ebasami nd’iso. Booto wa Mungu boyaleke lanu yaatotina.