Tito 1 - Le Nouveau Testament in Kele (Lokele) 1958

¹ Imi Paulo bɔkɔwa wa Mungu la Botomomu wa Yesu Masiya, eoka yokondesa lilendelu lia ebasoaomo la Mungu, la yokondesa liluwani liau lia wewe wa njasɔ ya Mungu,

² ko la iɛli sha liwawi lia layalaya eloatikaka Mungu lisakä ko oso wa lotango loa mbile, (Mungu aitota lolanga).

³ Nda lisho elienganaka, Inde loɛnɛsɛ Lioi liande ko la linangoli lia wɛndi ebosofomo ende’mi ko la isosha sha Mungu Bouwesi wasu.

⁴ Ende Tito wana wami wa wewe oyasangani lami nda lilendelu limɔi, booto la lilatemi lia Mungu Sango la Masiya Yesu ako Bouwesi wasu.

Boyaeli wa Betoli oso ya Etanda ya Mungu

⁵ Yatikak’aɛ nda bosanga wa Kulete ko la litina-li, liko mbo wenganeseke la wɛlï njasɔ ina ebimachani la mbo oteke Bekumi nda okenge la okenge kwa atelaka’mi angɛnɛ otel’aɛ ndola.

⁶ Boto oyati la litwanelo, oyasɔngi wali ko ɔmɔi, oyale la bana ebasoimela Yesu, ebatiwanjelomo mbo bale bifembesi la totefola;

⁷ eoka loondu nde mbo Bokumi w’Etanda oyale kwa Bonyafala wa bofindi wa Mungu, ayaleke boto oyati la loasɔ ango lɔmɔi, ango ichocho la etenge, inga boto wa bosho nda bänä kwa boto bolola bieto wike.

⁸ Kongo ko ayaleke oyatonyangela bɛɛnda, oyasami nde bolau, oyaluwi nde njasɔ la wɛlï, wa liengani ende bato la ende Mungu, la oyatokakalesa botema wande angɛnɛ;

⁹ boto oyatokɔkɔmɛlɛ liekesi lia wewe elisoimel’iso mbo akɔkɔlɛkɛ, inde angɛnɛ, ndoekekesa basi liekesi eliengani la ndotombola bato ebatotefokola liao.

¹⁰ Eoka eba totefola la beongaonga la belimbake bende wike, asa kɔni ebasoimela liteni lia totombe.

¹¹ Loengani nde mbo balinjomoko bɛnɔkɔ eoka basoeyaeyesa befindi bitotina bimɔi ani asoekekes’iyo liekesi eliti lau l’isosha shoekesa, mbo bɔlɛkɛ bieto kongo.

¹² Ɔmɔi wau angɛnɛ ako bɔtɔndɔli wau loonga mbo— Eba Kulete bende bato ba nanga, nyama ibe, bafofa bieka eba bowandu ko mbile bitotina.

¹³ Liölo-li liande lile ngo ko wewe; eokao fak’iyo liɛngɔ liwau mbo bakɔkɔmɛkɛ nda lilendelu lilau,

¹⁴ la mbo batalaila bishä ya BaYuda la baiti ba bato ebasolota mboka ya wewe.

¹⁵ Ende ebasotana betema, bitotina bisosäsa la botanu, kongo ko ende bato ba bɔwɛwɛ la ebati la lilendelu, ambo loasɔ ango lɔmɔi loti lotanu, nde baenyeli bau la bienyelo yau bile la bɔwɛwɛ.

¹⁶ Basoaolaka mbo basoluwa Mungu, kongo ko batoangany’Inde ko la bekeeli yau, bende bato ba efu, ba litefoli la basoomekelo bakuwa balau batotina.