Matayo 9 - Le Nouveau Testament in Kele (Lokele) 1958

¹ Limɔ Inde lokwa nda watɔ, Inde loleka, Inde loiya nda okenge wande angɛnɛ.

Boto wa Lonyango

² Omao iyo loeshel’Inde boto wa lonyango, aingalaka tambelele nda tange; ɛnɛkɛ Yesu liimeli liau Inde loonga la ewa lonyango mbo— Wana, sambolaka botema, njasɔ ibe yaɛ bisomɛsɛlɔmɔ.

³ Lamao batikasa bamɔi loonganaka mbo— Boto-yo asosɛɔlɔ Mungu.

⁴ Aluwäkä Yesu baenyeli ba betema yau, Inde mbo— ¿Monito otoenyela obe nda betema yanu?

⁵ Loni losoeta la ɔlɛmbu, kwa ndoonga mbo— Njasɔ ibe yaɛ bisomɛsɔlɔmɔ, kwa ndoonga mbo— Emalaka la tangwaka?

⁶ Kongo ko mbo boluweke mbo Wana wa Boto ende la isosha shomɛsɛlɛ njasɔ ibe ono se, limɔ Inde loonga la ewa lonyango mbo— Emalaka, ilaka tange yaɛ, la kɛndɛkɛ nda ndakɔ yaɛ.

⁷ Boto loemala yai, inde lɔkakɛ nda ndakɔ yande.

⁸ Nde ɛnɛkɛ windi wa bato ongoma, iyo lowanga, iyo loinela Mungu oyasofa bato isosha sha bɔfɔnɔ-bo.

Lotomo-lioi loa Lewi

⁹ Etaka Yesu omao Inde lɔɛnɛ boto ako Matayo, ani ayaläkä se nda ɛsɔnjɛlɔ ya bɔsɔmbi, la Inde loonga lande mbo— Tutaka’mi. Inde loemala la inde lotuta Yesu.

¹⁰ Lamao ayalaka Yesu nda mɛsa nda ndakɔ, bɛsɔnji ya bɛsɔmbi la bato ba njasɔ ibe wike loya oyayalaka la Yesu la baeki bande.

¹¹ Nde ɛnɛkɛ BaFalusi ongoma, iyo loonga la baeki bande mbo— ¿Monito Boekesi wanu atola bieka amamwito la bɛsɔnji la bato abe?

¹² Okäkä Yesu ongoma, Inde loonga lau mbo— Ebale la bosasu baitolüka bonganga kangä eba kambo.

¹³ Kɛndɛkɛ okeka litina lia elioi-li liko mbo— Ilɛmbi nde booto, inga nyama yoolomu; eoka itiye oyata eba liengani lioi, kangä eba njasɔ ibe.

¹⁴ Lamao baeki ba Yoane loya ende Inde, iyo mbo— ¿Monito la iso la BaFalusi, totokilaka ndola bieka mbile la mbile, kongo ko baeki baɛ baitokila?

¹⁵ Yesu loonga lau mbo— ¿Atoyalaka tolesani amamwito la oyatosɔngɔ, batokɔkɔlɔ ndolelaka? Bacho beyaka nde ani bɔsɔngi atɔɔnɔkɔlɔmɔ end’iyo, limɔ iyo kokila bieka.

¹⁶ Boto aitowamba esinda ya liɔmbɔ la yaki ya esinda eyai, eoka mbamba ya esinda eyai etosalaka eya liɔmbɔ limɔ lifola litofalwa.

¹⁷ Boto aitoangola banä bayai nda biuku ebisoumwa eoka mbo banä bataacha biuku, limɔ banä batowɛlɛmɛkɛ se la biuku kowa; nde banä bayai batowɛlɔmɔ nda biuku biyai, l’ani yao imbale kotekama.

Wana Otomali wa Yailo

¹⁸ Aongäkä Yesu baoi-ba, bokumi ɔmɔi loya oyakwa balui se oso wande, inde mbo— Wana otomali wami asokwela se ko kwani, kongo ko yauku oyatalia inde bosamba waɛ, limɔ ewawaka.

¹⁹ Yesu loemala, Inde lotut’inde la baeki bande lisanga.

²⁰ Limɔ botomali oyayalaka la lisendwi lia bakila ko miaka liu la imbale; inde loya ombisa ya Yesu, inde lomata lisɛmbɛlɛ lia esinda ya Yesu,

²¹ eoka inde loonga nda botema wande mbo— Yemata ango esinda yande imi kouwesomo.

²² Lamao Yesu lokikwa, Inde lɔɛnɛ otomali, Inde mbo— Wana otomali, sambolaka botema, liimeli liaɛ lisouwes’aɛ. Ko la mbile-ao otomali ona louwesomo.

²³ Iyäkä Yesu nda ndakɔ ya bokumi, Inde lɔɛnɛ ebatoomaka tofonge la limbilititi lia bato batofichaka etondo efi,

²⁴ Inde loonga lau mbo— Sokwaka eya, boseka atiwe, aingali ilɔ! limɔ iyo losɛkɛlɛ Inde finɛ.

²⁵ Nde asokolomökö windi wa bato, Inde lɔɔtɔ ndakɔ, Inde lounda boseka la lingasa, inde loemala yai.

²⁶ Lokuku loa eloasɔ-lo lofafana nda yese ena etotina.

Bato bambale ba botuku

²⁷ Etaka Yesu omao bato bambale ba botuku lotutak’Inde, iyo loamama mbo— Welak’iso shota, Aɛ Wana wa Dawidi.

²⁸ Ɔtɔkɔ Inde nda ndakɔ, iyo loya end’Inde; limɔ Yesu loonga lau mbo— ¿Oimeli nde mbo isokɔkɔlɔ okeel’ino eloasɔ-lo? Iyo mbo— Eingo Ngɛnɛ.

²⁹ Limɔ Inde lomata baiso bau, Inde mbo— Lokeelomoko ino kwa ayali imɔ ko liimeli lianu.

³⁰ Limɔ baiso bau loliolomo. Yesu loimak’iyo mbo— Otaluwesëke boto angɔmɔi.

³¹ Nde iyo losokwa omao, limɔ iyo lofafanesa lokuku loande nda yese ena etotina.

³² Atangwäkä ebato-ba, tɛnɛ boto weuma oyaɔtɛlɔmɔ̈kɔ̈ imɔ la bolimo obe!

³³ Asokolomökö bolimo obe eweuma loongaka, la windi wa bato lomwaala, iyo mbo— Lotitɛnɛlɛkɛ kɔni ongoma nda Isalaele.

³⁴ Kongo ko BaFalusi loakola ndoonga mbo— Ende ko la bɔkɔta wa belimo ebe eyetokusol’Inde belimo ebe.

Kɛndɔ ya Yesu yonangola Mboli Ilau

³⁵ Yesu lɔkɛndɛkɛndɛkɛ nda kenge bifi la ebikɛkɛ bitotina bitimbi ndokaekese nda bisɔngɔmɛlɔ yau, Inde lonangokolaka Mboli Ilau ya Bɔkɔta la Inde louwekekesa bato ba ngwo la kambo ya bɛfɔnɔ bitotina.

³⁶ Nde ɛnɛk’Inde biindi ya bato Inde lookel’iyo ngandi, eoka baeyaeyäkä, batekukumäkä kwa bɛkɔkɔ ebiti la botingani.

³⁷ Limɔ Inde loonga la baeki bande mbo— Eula yende efi nde ebatotwaka yao bende bamyɔ,

³⁸ eokao sombokolaka Ngɛnɛ wa eula mbo atomeke batwi nda eula yande.