Matayo 25 - Le Nouveau Testament in Kele (Lokele) 1958

Bombila wa Baseka Liu

¹ Lamao, Bɔkɔta wa Use botokwelomo la baseka liu ebaɔsɔ̈kɔ̈ paka yau, okatowana la botolome ɔmɔi oyaɛkɛ okɔsɔ bowai nda lisɔngɔni.

² Bɔɔmwi ba baseka baaka bibebe, la bɔɔmwi ba wɛlï;

³ eoka aɔsɔ̈kɔ̈ ebibebe paka yau, batiɔsɛ baita amamwito;

⁴ kongo ko eba wɛlï, iyo lotola baita basi nda kamaisonga amamwito la paka yau.

⁵ Nde ewa lisɔngi loumwaka oya, eokao iyo yaatotina lowa bolengelenge la iyo loingala ilɔ.

⁶ Nde la ɛsɔkɔ ya ocho lioi liaokomökö mbo— Itɔkɔ, Ewa lisɔngi-yo; kuswaka okatowana lande.

⁷ Lamao baseka batotina ana loemakala, iyo loanekesa paka yau la wɛlï,

⁸ Limɔ eba bibebe loonga la eba wɛlï mbo— Faef’iso sumbu baita bamɔi banu eoka paka yasu bisotiakama.

⁹ Nde eba wɛlï mbo— Bataengana lasu lanu imɔ; takɛndɛkɛ to ende baungekesi ba baita okasomba ebanu angɛnɛ.

¹⁰ Aɛk’iyo okasomba, ewa lisɔngi loya; limɔ baseka ebakɔmɔnyi la paka yau, iyo lɔtɔ amamwito lande nda elambɔ ya lisɔngɔni la bome wa ndakɔ lolinjomo.

¹¹ Mbisa, baseka ebamɔi loya imɔ, iyo mbo— Ngɛnɛ, Ngɛnɛ lioelak’iso.

¹² Nde inde lomutola lau mbo— Isoonga lanu wewe mbo itilüwe ino.

¹³ Eokao, lambaka la wɛlï, eoka otilüwe kwa bocho kwa saa.

Bombila wa bɛkɔwa ya lotimbana la ewa booshaosha

¹⁴ Lole nde kwa boto oyatɔkɛ lɔkɛndɔ esika, inde lota bɛkɔwa yande lioi, inde lofaef’iyo biengo yande.

¹⁵ Inde lofaefa ɔmɔi batanga bɔɔmwi ba bieto, inde lofa wasi batanga bambale, la wasi limwito, ende oto la oto inde lofa yao yoengana la wɛlï wande, limɔ inde lɔkɛ lɔkɛndɔ.

¹⁶ Kwaamao boto oyaɔlɔ̈kɔ̈ batanga bɔɔmwi, inde lɔkɛ okatimbesa bokalala wande la bao, inde lɔɔlɔ botalia wa bɔɔmwi basi.

¹⁷ Ko ongoma imɔ ewa ambale lɔɔlɔ basi bambale.

¹⁸ Kongo ko oyaɔlɔ̈kɔ̈ litanga limɔi, inde lɔkɛ okafuwa nda nyɛlɛ, inde loisa bieto ya ngɛnɛ wande omao.

¹⁹ Mbisa ya mbile yumwa, ngɛnɛ wa bɛkɔwa ana loinywa; akomiäk’inde lau belima,

²⁰ limɔ oyaɔlɔ̈kɔ̈ bɔɔmwi loyaesha basi bɔɔmwi imɔ, inde mbo— Ngɛnɛ, wafaefäkä’mi batanga bɔɔmwi, tɛnɛ, isɔɔlɛsɛ basi bɔɔmwi.

²¹ Ngɛnɛ wande loonga lande mbo— Bolau, wende bɔkɔwa olau wolendelomo, osokɔcha yao bimyɔ, isofaef’aɛ isosha likolo lia wike, ɔtɔkɔ limɛngɔ lia ngɛnɛ waɛ.

²² Limɔ oyaɔlɔ̈kɔ̈ ambale loya, inde mbo— Ngɛnɛ, wafaefäkä’mi batanga bambale, tɛnɛ isɔɔlɛsɛ basi bambale.

²³ Ngɛnɛ wande loonga lande mbo— Bolau, wende bɔkɔwa olau wolendelomo, osokɔcha yao bimyɔ, isofaef’aɛ isosha likolo lia wike, ɔtɔkɔ limɛngɔ lia ngɛnɛ waɛ.

²⁴ Limɔ oyaɔlɔ̈kɔ̈ ko litanga limɔi loya, inde mbo— Ngɛnɛ, yalüwäk’aɛ mbo wende boto owaü, ototwaka yao ebitilɔɛk’aɛ, otoinaka yao ebitifɛf’aɛ;

²⁵ yawangäkä la yaɛ̈kɛ̈ okaisa bieto yaɛ nda nyɛlɛ. Tɛnɛ, ɔsɔkɔ eyaɛ angɛnɛ.

²⁶ Nde ngɛnɛ wande lomutoel’inde mbo— Bɔkɔwa obe wa booshaosha, ¿walüwäkä to mbo itotwaka yao ebitilɔɛkɛ’mi, la mbo itoinaka yao ebitifɛfɛ’mi?

²⁷ Eokao loenganiki laɛ ofa bieto yami ende ebatoisa yao la bɔsɛɛli, mbo akainyweke’mi, yaɔlɔ eyami bieto la bɔsɛɛli lisanga.

²⁸ Eokao, ɔnɔkɔlɔkɔ litanga liami end’inde la faefaka ewa batanga liu.

²⁹ Eoka, oyasɔɔlɔ, efomoko nde yasi la atoyala la lilya, nde oyati la yeka, ambo eyele lande, yao kɔɔnɔkɔlɔmɔ end’inde.

³⁰ Nde umbolaka e-bɔkɔwa w’ɛkwɛlɛ lousa nda lilima, olo atookana bileli la ngɛlɛtɛ ya bainyo.

Ebale la Booto la ebati la Booto

³¹ Nde elayalaka Wana wa Boto nda tala yande amamwito la bakitomo batotina, eyalaka se nda kɛka ya tala yande;

³² Bato ba wenda bototina belasɔngɔmɔkɔ oso wa bɔmbɔ wande,

³³ limɔ Inde kosɛnyanɛsɛ bato shɛi, kwa atokela botingani wa bɛkɔkɔ la mbuli, inde kosɛlɛ bɛkɔkɔ nda bosamba wande wa olome nde mbuli nda ewa wali.

³⁴ Limɔ Bɔkɔta eongaka nde l’eba bosamba wande wa olome, mbo— Yauku, ino ba lɔkɛmɔ loa Sango wami, sangolaka bɔkɔta ewakomyelomoko ino konda bakelelo ba wenda,

³⁵ eoka yayaläkä la isiyɛ la wafäkä Imi bieka; yokäkä yɛmɛ ya balia, la wamwesäkä’mi; yayaläkä bɔɛnda la waɔtɛsɛ̈k’mi nda ndakɔ;

³⁶ yayaläkä wase, la wawatesäkä’mi bisinda; yayaläkä la loo la wayäkä fɛtɛti ende’mi; yakandomökö bɔnyɔlɔlɔ la wayäkä ende’mi.

³⁷ Lamao eba liengani bemutoelaka Inde mbo— ¿Ngɛnɛ, twɛnɛ̈k’Aɛ la isiyɛ l’eni to mbile, ani iso lof’Aɛ bieka? Ango la yɛmɛ ya balia, nde kof’Aɛ yomwa?

³⁸ ¿Twɛnɛ̈k’Aɛ bɔɛnda, nde kɔɔtɛsɛk’Aɛ ndakɔ, ango wase, nde twawates’Aɛ?

³⁹ ¿Eni mbile twɛnɛ̈k’Aɛ la loo, kwa nda bɔnyɔlɔlɔ, nde koya fɛtɛti end’Aɛ?

⁴⁰ Limɔ Bɔkɔta emutoelak’iyo mbo— Isoonga lanu wewe mbo ko l’eoka mbo wakeläkä ongoma ende ɔmɔi wa beoto yami oyakɛli se, ambo shooto kongo, wakeeläkä’mi ongoma.

⁴¹ Lamao eongäkä lau eba bosamba wa wali imɔ mbo— Sokwaka ende’mi, ino ebasendomu bieo, konda bösä wa likati ebosokomyelomo Satana la bakitomo bande;

⁴² eoka yayaläkä la isiyɛ, nde otiafäkä’mi yeka, yokäkä yɛmɛ yomwa, nde otiafäkä’mi yomwa;

⁴³ yayaläkä bɔɛnda, nde otiaɔtɛsɛ̈kɛ̈’mi ndakɔ, yayaläkä wase, nde otiawatesäkä’mi bisinda; yayaläkä la loo la nda bɔnyɔlɔlɔ, nde otiayäkä fɛtɛti ende’mi.

⁴⁴ Iyo imɔ bemutoelak’Inde mbo— ¿Ngɛnɛ, twɛnɛ̈k’Aɛ la isiyɛ, kwa la yɛmɛ yomwa, kwa bɔɛnda, kwa wase, kwa la loo, kwa nda bɔnyɔlɔlɔ, nde iso angowɛl’Aɛ lisungi liasu?

⁴⁵ Lamao Inde elamutoelak’iyo mbo— Itoonga lanu wewe mbo— ko l’eoka mbo otiakeläkä ongoma ende ɔmɔi wa beoto yami oyakɛli se, ambo otiakeeläkä’mi imɔ ongoma.

⁴⁶ La iyo ana balakɛndɛkɛ konda likuchaki lia layalaya, kongo ko eba liengani kɔkɛndɛ konda liwawi lia layalaya.