Matayo 23 - Le Nouveau Testament in Kele (Lokele) 1958

Liɛngɔ ende BaFalusi la Batikasa

¹ Lamao Yesu loonga la eba bikuke la baeki bande,

² Inde mbo— Batikasa la BaFalusi basoyala se nda kɛ̈ka ya Mose;

³ eokao kelakaka la litesaka bitotina ebitoong’iyo eonga lanu, kongo ko, okelëke kwa atokel’iyo, eoka batoonga nde baitokela.

⁴ Batokandaka bekuku ya belito bewaü wotolaka, limɔ batotalia yao nda batotoko ba bato ani iyo angɛnɛ angolɛmbɛ okɛndɛsɛ yao ango la isangakala shau.

⁵ Nde bekeeli yau bitotina bile ko yɔɛnɛlɛ nda baiso ba bato kongo; batofalokola biuku ya kasa (ebitol’iyo nda bindo), batolongamesa basimbɛlɛ ba bisinda yau,

⁶ batolola bilela ya oso nda bilambɔ la kangala ya betoli oso nda bisɔngɔmɛlɔ,

⁷ la mbo balamokolomoko nda baöngo la ndotangomoko mbo Labi (Boekesi).

⁸ Nde ino angotangomo Labi eoka wende ko la Boekesi ɔmɔi la ino yaatotina wende beoto.

⁹ Otangëke boto wa wenda mbo sango, eoka ɔmwito kongo nd’ayali Sango ako Inde oyayali nda Use.

¹⁰ Otangomöko mbo Botoli-oso, eoka ko ɔmwito kongo nd’ayali Botoli-oso wanu, ako Masiya.

¹¹ Boto wanu oyalongeli, eyelaka bosali wanu,

¹² la oyatotaliaka inde angɛnɛ, ɛɔndwɛsɔmɔkɔ se hondwa, la oyatɔɔndwa se inde angɛnɛ, etaliomoko tala.

Baɛngɔ bawau ende BaFalusi

¹³ Aeko wale end’ino Batikasa la BaFalusi, balimbaki eoka ino nd’atolinjaka biome ya Bɔkɔta wa Use oso wa bato; ino angɛnɛ angɔɔtɔ la ino nd’atokufesa ebakɔɔtɔ ina.

¹⁵ Aeko wale end’ino Batikasa la BaFalusi, balimbaki eoka ino otolekaka wenda la balia ndokɔsɔ ɔmɔi oyatokinjwa kwa atoimel’ino angɛnɛ, limɔ akayalek’inde ewa, ino kokindol’inde wana wa Ngehena woeta boyaeli obe wanu angɛnɛ ko baeta bambale.

¹⁶ Aeko wale end’ino Betoli-oso eba betuku. Ino nd’atoonga mbo— Boto etinya ekanɔ ko la Ndakɔ ya Mungu, loti loasɔ; nde etinya ekanɔ ko la bieto ebile nda Ndakɔ ya Mungu, ambo ale la bolima wokamba.

¹⁷ Ino ba ebebe la etuku; ¿Eni to nd’aeti, kwa bieto, kwa Ndakɔ ya Mungu eyetosɛlɛ bieto la botanu?

¹⁸ Liasi, ino mbo— Boto etinya ekanɔ ko la etambelo ya lifaefi, ambo loti to loasɔ; nde boto etinya ekanɔ ko la lifaefi angɛnɛ, sakolo ko atokɔcha ekanɔ.

¹⁹ Ino b’etuku; ¿Eni to nd’aeti, kwa lifaefi, kwa etambelo eyetücha lifaefi?

²⁰ Boto oyasotinya ekanɔ la etambelo, asotinya yao ngo la etambelo la imɔ nda bieka ebiyali likolo lia yao lisanga;

²¹ la oyatatinya ekanɔ la Ndakɔ ya Mungu, atotinya yao ngo ko la Ndakɔ la imɔ ko la Inde oyayali nda yao;

²² oyatotinya ekanɔ ko la Use, atotinya ekanɔ ngo ko la kɛka ya Mungu, imɔ ko la Inde oyayali se nda yao lisanga.

²³ Aeko wale end’ino Batikasa la BaFalusi bako balimbaki, eoka ino kokusolaka likaɔ lia botüku wa liu nda kasakasa ya lɔɛtɛ, kongo ko osounga ndola yoeta la litina biko liengani, la booto, la liimeli; lole lanu ndokelaka, ani ebimɔi imɔ biti yoomelomoko.

²⁴ Ino betoli-oso ya etuku, otokangola balia ndosokola ikungu sikɛkɛ, nde botomɛlɛ ngamela mɛu.

²⁵ Aeko wale end’ino Batikasa la BaFalusi ba ko balimbaki, eoka ino kotanekesa lousa loa kɔpɔ la lɔfɛfɛ, nde nd’atiteni esotumaka la yeka ya wiya la bɔlɛfɛ.

²⁶ Aɛ BoFalusi wa botuku, tatanesaka atiteni ya kɔpɔ la lɔfɛfɛ limɔ lousa kotana lisanga.

²⁷ Aeko wale end’ino Batikasa la BaFalusi, eoka ino nd’atokwelomo la losai elososiyomoko la fɛmbɛ lousa; ani lousa losoɛnɛlɛ kwa tɔfɔfɔ, nde nd’atiteni bisotumaka la tokwa twa belyo la bɛwɛwɛ ya bɔlɛlɔ.

²⁸ Ino ko ongoma, lousa otoɛnɛlɛ bato ba liengani nde atiteni osobeba la bolimbakeli la batwanelo.

²⁹ Aeko wake end’ino Batikasa la BaFalusi, eoka otoswa sai ya batɔndɔli ba oso la otokomya kito y’ebaengani,

³⁰ nde koonga mbo— Twaäkä nda fɛtɔ ya bangau basu, ani totiasanganäkä lau ndosondola bakila ba batɔndɔli.

³¹ Ko ongoma osoaola mbo wende bana ba bato ebaoläkä batɔndɔli.

³² Eokao, ɔlɔlɔkɔ to ikweelo sha bangau banu.

³³ Ino wende njɔ, wende bana ba manga; ¿otolɔmwaka mbo otafomo se la okɛsɔmɔ nda Ngehena ya bösä?

³⁴ Tɛnɛngɔ, ko l’eokao Imi nd’atotomaka end’ino, la batɔndɔli la eba wɛlï la batikasa, kongo ko ino boolaka nde bamɔi, bowachaka bamɔi nda liyeka, bokuchaka bamɔi fimbo nda bisɔngɔmɛlɔ yanu, boengaka bamɔi ko nda okenge la okenge,

³⁵ ko mbo bakila ba batotina-ba ebawäkä l’angwɛnɛ litwanelo, bao bakungameke ko end’ino, bako bakila ba Abɛlɛ, konda bakila ba Sekalaya, wana wa Balakaya-oyaoläkä ino ool’inde tina la Euchelo la Etambelo ya lifaefi nda Ndakɔ ya Mungu—

³⁶ Isoonga lanu wewe mbo— Bitotina-bi bilaomanaka la nyongo ya efɛtɔ-ye y’ato.

³⁷ Aeko Yelusaleme; Yelusaleme ona oyaoläka batɔndɔli, oyakushakäkä batalɛ boola ebatomomökö end’ino. Aina mbile eyokäkä’mi yɛmɛ yosɔnjak’ino bana ba Yelusaleme kwa atokukya kɔkɔ bana bande ose ya bafafu bande, kongo ko ino angɔlɛmbɛ.

³⁸ Tɛnɛngo, bokenge waɛ bosomachana ko isimo,

³⁹ isoonga lanu wewe mbo otiangɔɛnɛ’mi imɔ konda eyekaongeke lanu mbo— Limɛngɔ liyeke lande oyatoya nde lina lia Ngɛnɛ.