Matayo 22 - Le Nouveau Testament in Kele (Lokele) 1958

Bombila wa Elambɔ ya Lisɔngɔni

¹ Yesu loongana lau liasi ko la bembila, mbo—

² Bɔkɔta wa Use bole kwa bɔkɔta wa yese oyakenjäka elambɔ ya lisɔngi lia wana wande,

³ inde lɔkɛsɛ bɛkɔwa yande ɔkɔsɔ ebatomökö lioi nda elambɔ ya lisɔngi; nde iyo lofeka ndoya.

⁴ Limɔ inde lotoma bɛkɔwa yasi, inde mbo— Kambesaka ebatomökö lioi mbo— Tɛnɛ ngo, bieka ya elambɔ bisoela, mbolo yami la bana ba mbolo ya bonuku bisoolomo, bitotina bisoengana, yauku nda elambɔ ya lisɔngi.

⁵ Nde iyo lolemola loasɔ, iyo lɔkɛndɛ, ɔmɔi nda elanga yande, ɔmɔi nda bokalala wande;

⁶ ebamɔi loundesa bɛkɔwa, iyo lokeelak’iyo sɔni, iyo lool’iyo.

⁷ Okäkä bɔkɔta ongoma, inde losoma la bolengi, inde lotomaka basilikani bande okasɛɛsɛlɛsɛ baoli ba bato bana, iyo lofechaka okenge wau la ösä.

⁸ Limɔ inde loonga la bɛkɔwa yande mbo— Elambɔ ya lisɔngi esotonjomo, nde ebatomökö lioi batiengane,

⁹ eokao kɛndɛkɛ to nda bau ba balabala la eshaka ono nda elambɔ bato ebakoshek’ino omao.

¹⁰ Bɛkɔwa ina lɔkɛ nda balabala; iyo losɔngɔmɛsɛ batotina eboshak’iyo, bato babe l’ebalau lisanga, ongoma elambɔ lotumaka l’ato.

¹¹ Nde aɔtɔ̈kɔ̈ bɔkɔta otichak’iyo ebatola bieka, inde lɔɛnɛ boto omao oyatiwate esinda yoengana elambɔ ya lisɔngɔni.

¹² Bɔkɔta loonga lande mbo— ¿Wina, osɔɔtɔ ono ani otiwate esinda ya elambɔ ya lisɔngi moni? Nde boto angomutola ango lioi.

¹³ Limɔ bɔkɔta loonga la basali mbo— Kandak’inde la besamba la bakolo, umbolak’inde lousa nda bounduundu wa mbi; omao bitookana la bileli la ngɛlɛtɛ ya bainyo.

¹⁴ Eoka bato wike nd’asotomo lioi, nde ko bamyo kongo basoaomo.

Bɔsɔmbi wa Kaisala

¹⁵ Lamao BaFalusi lɔkɛ okɔtɔ ikumbɛ sha loasɔ lokwes’Inde nda liekesi liande.

¹⁶ Iyo lotoma baeki bau amamwito l’eba Helodi ende Yesu, iyo mbo— Boekesi, tosolüwa mbo wende wewe, la mbo otoekekesa mboka ya Mungu la wewe, la mbo oitowänga oto la oitotichaka bɔmbɔ wa bato;

¹⁷ Kambesaka to iso kwa atoenyel’Aɛ; ¿Mbo losoengana ofaefa Kaisala bɔsɔmbi, kwa angofa?

¹⁸ Kongo ko Yesu lolembeela bobe wau, Inde mbo— ¿Otokotela’mi eoka iye, ino balimbaki?

¹⁹ Tambaka’mi bieto yokamba bɔsɔmbi. Iyo loeshel’Inde lofalanga.

²⁰ Limɔ Yesu loonga lau mbo— ¿Bolendela-bo la lisɔni-li bile ya ndai?

²¹ Iyo mbo— Ya Kaisala. Lamao Inde loonga lau mbo— Inolaka to ende Kaisala ko eya Kaisala la inolaka ende Mungu ko eya Mungu.

²² Okäkä bato ongoma, iyo lomwaala, iyo lomach’Inde, iyo lɔkɛ eyau.

Litɛmwi nda Liwa

²³ La lise-ao BaSadoke bamɔi loya ende Inde, ebaimeläkä mbo angwɛnɛ imɔ litɛmwi nda liwa; iyo lofela Yesu mbo—

²⁴ Boekesi, Mose mbo boto ewa, angoota wana, limɔ etungani yande atosɔngɔ lotika loa boloo mbo aoteleke boloo wana.

²⁵ Toka, eyasu tole la bana batolome bosambale ba sango ɔmɔi; boloo losɔngɔ wali la inde lowa, nde atimache wana, etungani yande losangola wali.

²⁶ Ewa ambale ko ongoma; imɔ ko ewa asatɔ, ko ewa osambale, batotina ko ongoma.

²⁷ Mbisa, otomali imɔ lowa liili.

²⁸ Eokao nda litɛmwi nda liwa, otomali atoyala wali wa ndai wau osambale, eoka iyo batotina basɔngɔ̈kɔ̈ ko inde.

²⁹ Yesu lomutoel’iyo mbo— Osotwanelo, eoka otilüwe Kasa ya Mungu la bofoka wande imɔ.

³⁰ Eoka nda litɛmwi nda liwa, batolome angosɔngɔ, la batomali angosɔngɔmɔ imɔ, nde beyalaka kwa bakitomo nda use.

³¹ Nde loasɔ loa litɛmwi lia ebawi, okatangi kɔni eloaongäkä Mungu lanu, mbo—

³² Imi yende Mungu wa Abalayama, Mungu wa Isaka, Mungu wa Yakobo, otitange ongoma? Mungu ati Mungu wa ebawi, kangä wa ebale la liwawi.

³³ Okäkä eba bikuke ongoma iyo lomwaala liekesi liande.

Bikela Bieti

³⁴ Nde okäkä BaFalusi mbo Yesu akandiki bɛnɔkɔ ya BaSadoke, iyo losɔngɔmɔ nda loasɔ-lo,

³⁵ la ɔmɔi wau ako bosanokoli wa Bikela lofel’Inde lofelo lokotel’Inde, inde mbo—

³⁶ ¿Boekesi, nda Bikela, eni ekela eyeti fafo?

³⁷ Yesu loonga lande mbo— Samaka Bɔkɔta Mungu waɛ la botema bototina, la bolimo waɛ bototina, la baenyeli baɛ batotina.

³⁸ Eyele ekela ya oso la eyeti fafo,

³⁹ la eya imbale eyengani la yao eko mbo— Samaka boyalani laɛ kwa ani otosama aɛ angɛnɛ.

⁴⁰ Bikela bitotina la Baoi ba Batɔndɔli basoomana la bikelabi bimbale.

⁴¹ Asɔngɔmɔ̈kɔ̈ BaFalusi ongoma, Yesu lofel’imɔ ko iyo lofelo, mbo—

⁴² ¿Otoenyela iye loasɔ loa Masiya, mbo ende wana wa ndai? Iyo mbo— Wana wa Dawidi.

⁴³ Yesu loonga lau mbo— ¿Eya ongoma, monito Dawidi kotang’Inde mbo Ngɛnɛ ko la Bolimo, ani Dawidi mbo—

⁴⁴ Ngɛnɛ loonga la Ngɛnɛ wami mbo— Yalaka se nda bosamba wami wa olome, Kond’atɔsɛlɛ’mi baiyani baɛ ose ya batindi baɛ?

⁴⁵ ¿Eya to mbo Dawidi atangäk’Inde mbo Ngɛnɛ, Ale to wana wande imɔ la moni?

⁴⁶ Angwɛnɛ boto wokɔkɔlɔ ndomutoel’Inde lioi ango limɔi, la mbisa ya lise-ao, oto angɔmɔi angotendela imɔ ofela Inde felo.