Matayo 21 - Le Nouveau Testament in Kele (Lokele) 1958

Yesu loiya nda Yelusaleme

¹ Iyäk’iyo tina la Yelusaleme, la ayäk’iyo nda Betefange nda löngo loa Elaya, limɔ Yesu lotoma baeki bambale oso, Inde loonga lau mbo—

² Kɛndɛkɛ nda bokenge ebole oso wanu, kwaamao o’toosha punda ekandomu amamwito la efembeli yande; faikolaka yao limɔ eshaka yao ende’mi.

³ Boto eonga lanu, ino koonga mbo— Ngɛnɛ asoeno yao, limɔ atoinola yao lisasaya.

⁴ (Lona losokelomo mbo lioi eliaongäkä bɔtɔndɔli likɔchɔmɔkɔ, mbo—

⁵ Kambesaka boseka wa Siona mbo— Tɛnɛ, Bɔkɔta waɛ asoya end’aɛ La bɔfɔmu, l’ani atalemi nda punda, Ango wana, efembeli ya punda.)

⁶ Baeki lɔkɛ, iyo lokela kwa akambesäkä Yesu ekambes’iyo,

⁷ iyo loesha punda la efembeli, iyo lotalia bisinda yau nda bɔkɔngɔ wa yao, lamao Yesu loyala se nda yao.

⁸ Bato wike ba ekuke lofalola bisinda yau se nda mboka, basi lotenaka bafifa ba tosandu nda bilanga la iyo lota bao imɔ nda mboka.

⁹ La bikuke ebietelaka oso l’ebatutaka mbisa, iyo lɔwɛlɛ lielo mbo— Hosana, ende Wana wa Dawidi, Limɛngɔ end’Inde oyasoya nda lina lia Ngɛnɛ, Hosana nda elela ya tala.

¹⁰ Ɔtɔkɔ’Inde nda Yelusaleme, bato batotina loilima loasɔ loande, iyo mbo— ¿Oyo ende ndai?

¹¹ limɔ bikuke mbo— Oyo ende Yesu, Bɔtɔndɔli wa Nasaleta ya Ngalilai.

Lotaneso loa balɛlɛ ba Tempelo

¹² Lamao Yesu lɔɔtɔ nda ndakɔ ya Mungu, la Inde lokusola iyo batotina ebatoungesa la ebatosomba omao nda Ndakɔ, Inde loukokola baonga ba bafetekwani ba bieto la kangala ya ebaungesäkä bikuku,

¹³ Inde loonga lau mbo— Losɔnɔmu nda lokasa mbo Ndakɔ yami etotangomo ndakɔ ya lisomboli, nde ino nd’asokela la yao, ko lisɛkɔ lia eba biya.

¹⁴ Limɔ bato ba betuku l’eba bikoti loya end’Inde omao nda Ndakɔ ya Mungu, la Inde losäses’iyo.

¹⁵ Nde, ɛnɛ̈kɛ̈ kanga ebieti la batikasa tolombo etosokel’Inde la ɛnɛ̈k’imɔ iyo bainɛngɛ basoamama nda Ndakɔ ya Mungu mbo— Hosana ende Wana wa Dawidi, iyo losoma finɛ,

¹⁶ iyo loonga la Yesu mbo— ¿Osooka elotoonga e-bana-ba? Inde loonga lau mbo— Eingo nde; ¿Otitange lise ango limɔi, mbo— Ko la bɛnɔkɔ ya bainɛngɛ la banaoli osɔɔlɔlɔ lisemoli?

¹⁷ Limɔ Inde lomach’iyo, Inde losekwa nda Yelusaleme, Inde lɔkɛ nda Betania okaingala omao.

Bokumo ebotiäkä la tuma

¹⁸ Ainwäk’Inde la nɔngɔ nda bokenge Inde looka isiye,

¹⁹ ɛnɛ̈k’Inde bokumo la mboka, Inde lɔkɛ tina la wao nde atiosheke yeka nda wao ko kasa ko kasa, Inde loongela wao mbo— Tuma totiangɔ̈tɔ̈ imɔ ina layalaya.

²⁰ Kwaamao kongo, bokumo lobɛɛkɛlɛ fɛɛ. La ɛnɛ̈kɛ̈ baeki ongoma, iyo lomwaala, iyo mbo—? Bokumo bosoumama ɔbɛɛkɛlɛ lisasaya moni?

²¹ Yesu lomutola lau mbo— Isoonga lanu wewe mbo eyambo boyala la liimeli, angota fee ani ino kokelaka ani asokelomo nda bokumo la liasi imɔ, boonga nde la e-longo-lo mbo— Ilomoko la umbolomoko tubu nda balia, ambo lokelomoko nde.

²² Bitotina ebitolɔmbɔkɔl’ino nda lisomboli ko la liimeli, bɔɔlɔkɔ nde yao.

Lofelo eoka ya isosha sha Yesu

²³ Aɔtɔ̈kɔ̈ Inde nda Ndakɔ ya Mungu, kanga ebieti la biange loosh’Inde ani atoekesa bato, iyo lofel’Inde mbo— ¿Otokelaka njasɔ-bi la sini isosha? ¿Ndai afäk’Aɛ isosha sina?

²⁴ Yesu loonga lau mbo— Itofel’ino imɔ ko lioi limɔi, ino bokambesa’mi, Imi imɔ kokambes’ino isosha esitokela lami njasɔ-bi;

²⁵ ¿Lilufi lia Yoane losekwa to nd’anima, kwa nda Use, kwa ende bato? Iyo angɛnɛ lotafelanäka, mbo— Eyambo toonga mbo liaka lia Use, limɔ Inde koonga lasu mbo ¿Eokao, monito otiaimeläkä inde?

²⁶ Nde toonga mbo— Elia bato… tosowänga ekuke ya bato eoka batotina basotanga mbo Yoane aaka bɔtɔndɔli.

²⁷ Iyo lomutoela Yesu mbo— Totilüwe. Limɔ Inde loonga lau mbo— La Imi imɔ angokambes’ino isosha esitokela’mi la njasɔ-bi.

Wana oyakalanganäkä

²⁸ ¿Nde, ino oenyeli moni? Boto ayaläkä la bana atolome bambale, inde lɔkɛ ende ewa oso, inde mbo— Wana, takɛndɛkɛ louse okakela likuwa nda elanga yami ya tuma.

²⁹ Inde mbo— Itikulie; kongo ko mbisa inde lokalangana, inde lɔkɛ.

³⁰ Sango lɔkɛ ende ew’ambale, inde loonga imɔ ko ongoma; wana lomutola mbo— Eingo ko Fafa.

³¹ Nde atikɛ. ¿Ndai wau ambale akeli lisangi lia sango? Iyo mbo— Ewa oso. Yesu loonga lau mbo— Isoonga lanu wewe, mbo basombesi la batomali ba olëfë batɔtɔkɔ nda Bɔkɔta wa Mungu oso wanu.

³² Eokao Yoane loya oyɛnɛs’ino mboka ya liengani, nde ino otiimelek’inde; kongo ko basombesi la batomali ba olëfë loimel’inde la kwa ɛnɛk’ino ongoma, otiangokalanganaka mbo wimelek’inde.

Bombila wa Balɔi babe

³³ Okaka bombila wasi. Yaaka nde oto ɔmɔi, wange wa okenge, oyalɔɔ̈kɔ̈ elanga ya tuma. Inde lolingela yao la likula, inde lofuwa liyöndo liotwangela tuma, inde loemesa ndakɔ ya betingani, inde lomachela balɔi elanga, limɔ inde lɔkɛ yese yasi.

³⁴ Ayäkä mbile ya eula ya tuma, inde lotoma bɛkɔwa yande ende balɔi mbo baɔsɛkɛ tuma;

³⁵ lamao balɔi loundesa bɛkɔwa, iyo lokuchak’ɔmɔi, iyo loola wasi, iyo lokushela wasi batälɛ.

³⁶ Lamao inde lotoma bɛkɔwa yasi wike, wolongela eba oso, la iyo lokeela iyo ana ko ongoma.

³⁷ Liili, inde lotoma wana wande angɛnɛ end’iyo, inde mbo— Batolitesa nde wana wami.

³⁸ Kongo ko ɛnɛ̈kɛ̈ balɔi wɛnɛ wana, iyo loongana mbo— Oyo ende bosangesi wa botiko, yauku to, toolek’inde, limɔ iso kɔɔlɔ botiko wande.

³⁹ Iyo loundes’inde, iyo loumbol’inde lousa loa elanga, iyo lool’inde.

⁴⁰ ¿Eokao, akayeke ngɛnɛ wa elanga, ekeelaka balɔi ana iye to?

⁴¹ Iyo mbo— Atosɛɛsɛlɛsɛkɛ bato bana babe la liwa libe, emachaka elanga ende balɔi basi ebatofaef’inde tuma nda eula.

⁴² Yesu loonga lau mbo— ¿Otitange lise ango limɔi nda lokasa (loa Mungu) mbo— Litalɛ lina elisofeka baswi, Liao lisoswomo nda botö wa ndakɔ; Loasɔ-lo losoya ko l’eoka ya Ngɛnɛ; La nda baiso basu lole losemolomo?

⁴³ Eokao Imi isoonga lanu mbo— Bɔkɔta wa Mungu bosokolomoko end’ino, la bofaefomoko tukela ebatoesha tuma twa wao.

⁴⁴ Boto oyatokwa likulya nda litalɛ-li, inde kounya; kongo ko litalɛ-li likwa ende boto, liao komiak’inde kwa fututi.

⁴⁵ Okäka kanga ebieti la BaFalusi bembila-bi ya Yesu, iyo loleembela mbo asoongel’iyo angɛnɛ.

⁴⁶ Nde akotäk’iyo ndoundes’Inde, iyo lowänga bato ba ekuke, eoka iyo lotang’Inde mbo bɔtɔndɔli.