Matayo 16 - Le Nouveau Testament in Kele (Lokele) 1958

BaSadoke la BaFalusi

¹ BaFalusi la BaSadoke loya ende Inde ndoyakotel’Inde; bafelak’Inde mbo ɛnɛsɛk’iyo ikesa sha Use kwa ndembe.

² Inde mbo— Nda baɔndwɛlɔ ba use otoonga mbo— Lɛlɛngɔ buse botosangwa eoka kwani olikolo liende litelu.

³ Ango ko la nɔngɔ, otoonga mbo— Louse buse botofinyaka eoka olikolo liende litelu la shɔmbɛ. Oluwi nde ndolembeela ndembe ya buse, nde otikɔkɔlɛ ndolembeela ndembe ya mbile-ye.

⁴ Fɛtɔ-ye ya obe la lieyaeya batolukaka ndembe, nde angwɛnɛ angɔmwito kofomo iyo, sakolo ngo ko ndembe ya Yona. Limɔ Inde lomach’iyo, Inde lɔkɛ.

⁵ Alekäkä baeki nda fangi yasi, iyo loosala ndotola lituma.

⁶ Limɔ Yesu loonga lau mbo— Tɛnɛkɛ la wɛlï mbo oengweke lisoo lia lituma lia BaFalusi la BaSadoke.

⁷ Iyo lofelana mbo— Eoka totitole lituma?

⁸ Aluwäkä Yesu ongoma, Inde loonga lau mbo— Ee, ino ba liimeli likɛkɛ, ¿Monito otofelana mbo oti la lituma?

⁹ Okaluwi kɔni litina? Otienyele batuma bɔɔmwi bokaela bato bilɛfu bɔɔmwi, wainäkä bisaka yanga?

¹⁰ ¿Otienyele imɔ batuma bosambale bokaela bato bilɛfu inɛi, wainäkä belanga yanga?

¹¹ ¿Monito otiluweke mbo itionge lanu loasɔ loa lituma? Kangä mbo oengweke lisoo lia lituma lia BaFalusi la BaSadoke.

¹² Limɔ iyo loluwaka mbo Yesu ationge lau mbo baengweke lisoo lia lituma angɛnɛ, kangä liekesi lia BaFalusi la BaSadoke.

Yesu akuliomökö mbo Masiya

¹³ Iyaka Yesu nda yese ya Kaisalia ya Filipo, Inde lofela baeki bande mbo— ¿Bato batoonga mbo Wana wa Boto ende ndai?

¹⁴ Iyo mbo— Bamɔi mbo Yoane Bolufi, bamɔi mbo Eliya, basi mbo Yelemaya ango ko ɔmɔi wa batɔndɔli.

¹⁵ Inde loonga lau mbo— ¿Nde ino nd’atoonga mbo Imi yende ndai?

¹⁶ Simona Petelo lomutola mbo— Aɛ wende Masiya, Wana wa Mungu wa Liwawi.

¹⁷ Yesu lomutola lande mbo— Wende la limɛngɔ Simona, wana wa Yona, eoka ati boto wa bindo la bakila oyasoluwes’aɛ loasɔ-lo, kangä Sango wami oyayali nda Use.

¹⁸ La Imi nd’atoonga laɛ mbo— Aɛ wende to Petelo la nda litalɛ-li itoswa Etanda yami, la biome ya eyaelo ya ebasowa biitolongela yao.

¹⁹ Itofaef’aɛ fungola ya Bɔkɔta wa Use, la yeka ena eyekakandek’aɛ ono nda wenda, yao ekandomoko nda Use, la yeka ena eyekafaikol’aɛ ono nda wenda, yao efaikolomoko nda Use.

²⁰ Lamao Inde loima baeki bande mbo bataluwesa boto angɔmwito mbo Inde ende Masiya.

²¹ Ko nda mbile ena Yesu loakola ndoisoela baeki bande mbo lole end’Inde mbo atakɛndɛkɛ nda Yelusaleme la ndokesomo biale wike kola biange la kanga ebieti la batikasa la ndoolomo imɔ la mbo atɛmwɛsɔmɔkɔ mbisa ya becho isato.

²² Limɔ Petelo lounda Yesu, inde loakola ndoimak’Inde mbo— Ngɛnɛ, lɔmɛsɛlɔmɔkɔ end’Aɛ, mbo loasɔ-lo lotaya end’Aɛ.

²³ Limɔ Yesu lokikwa ende Petelo, Inde mbo— Etaka ombisa yami Satana, otoola’mi likulya eoka botema waɛ botienyele njasɔ ya Mungu kangä eya bato.

²⁴ Lamao Yesu loonga la baeki bande mbo— Boto ɛlɛmbɛ mbo atuteke’mi atafekelek’inde angɛnɛ, atatolaka lieka liande la atuteke’mi.

²⁵ Eoka mbo oyatolɛmbɛ ndoikesa liwawi liande angɛnɛ, atolefesa nde liao; kongo ko oyatolefesa liwawi liande eoka yami, inde nd’atoikesa liao.

²⁶ ¿Boto ɛɔlɔkɔ bitotina ya wenda-bo, nde kolefesa liwawi liande angɛnɛ, asɔɔlɔ to iye? ¿Boto afeke eni to yeka yofangola la liwawi liande angɛnɛ?

²⁷ Eoka Wana wa Boto elayaka la tala la liomala lia Sango wande amamwito la bakitomo bande; lamao Inde atɔɔlɛsɛ boto la boto bondanda woengana la bekeeli yande.

²⁸ Isoonga lanu wewe mbo— Bato bamɔi ebemali eyamaya, batiawëkë konda akɛnɛk’iyo Wana wa Boto oyaɔsɔ Bɔkɔta.