Matayo 13 - Le Nouveau Testament in Kele (Lokele) 1958

Bembila ya Bɔlɔi

¹ Nda lise lina asekwäkä Yesu nda ndakɔ, Inde loyala se nda ngɔngɛ ya eliya,

² la bikuke bifi fafo lolingel’Inde; eokao Inde lokwa nda watɔ, Inde loyala se omao ani bato loemala nda ngɔngɛ.

³ Inde loekes’iyo njasɔ wike kola bembila, mbo— Tɛnɛ, bɔlɔi ɔmɔi lɔkɛ okalɔɔ koto;

⁴ alɔɔkɔ inde koto ongoma, bimɔi lokwa nda mboka, la nɔli loya oyala yao;

⁵ la yasi bimɔi lokwa nda elela olo ayali batalɛ, angwɛnɛ nyɛlɛ wike, yao lɔɔ̈tɔ̈ lisasaya eoka ya nyɛlɛ yotalangu.

⁶ Nde ayäkä löwa ifitika, yao lokofa la njöwa, yao lobɛɛkɛlɛ fɛɛ eoka angwɛnɛ biili.

⁷ La yasi bimɔi lokwa nda kɛ̈kɛ̈ limɔ kɛ̈kɛ̈ lɔɔ̈tɔ̈ la kɛ̈kɛ̈ lɔnyɛlɛ koto,

⁸ Nde yasi bimɔi lokwa nda nyɛlɛ ilau, yao lɔɔ̈tɔ̈, yao lota tuma, bimɔi kama liu, bimɔi kama liambɛ, bimɔi kama isatɔ.

⁹ Oyayali la batoi, okeke.

¹⁰ Lamao baeki loya end’Inde, iyo mbo— ¿Monito otoonga lau la bembila?

¹¹ Inde lomutola lau mbo— End’ino kongo, njasɔ ebisoisomo ya Bɔkɔta wa Use, yao koisolomo, kongo ko ende iyo bitiisolomo.

¹² Eoka boto oyaɔli efomoko nde yasi, la eyalaka nde la ngɔnyi; nde boto oyatiɔlɛ ɛɔnɔkɔlɔmɔkɔ yao ebiɔliki inde.

¹³ Eokao itoonga lau la bembila, eoka batɛnɛ ko liɛnɛ̈lɛ̈; batoka liokɛ̈lä, angolüwa litina.

¹⁴ End’iyo litɔndɔli lia Yesaya lisokɔchɔmɔ, mbo— La batoi, ino bokaka, nde angolüwa litina; La baiso, ino botichaka, nde angotɛnɛ swa.

¹⁵ Eoka betema ya etukela-ye bisokwelo itɔka, La batoi bau batooka ko ilao kongo, La basolinjaka baiso bau ndi, Mbo bataɛnɛ la baiso, la bataoka la batoi, Batalüwaka batina la betema la batakalangana, La mbo itauwes’iyo.

¹⁶ Nde baiso banu nd’asofota eoka basɔɛnɛ; la batoi imɔ, eoka basooka.

¹⁷ Wewe, isoonga lanu mbo— Batɔndɔli wike la eba liengani wike balɛmbɛkɛ finɛ ndɔɛnɛ ebisɔɛnɛ ino, nde batiɛnɛ̈kɛ̈ yao; la ndooka ebisook’ino, nde batiaokäkä yao.

¹⁸ Okaka to litina lia bombila wa bɔlɔi.

¹⁹ Atooka boto lioi lia Bɔkɔta wa Use, angoosha to litina, limɔ Ewa Obe ako Satana atoyaɔnɔkɔlɔkɔ koto ebilɔɔmuku nda botema wande. Wao end’inde oyalɔɔmɔkɔ nda mboka.

²⁰ Inde oyalɔɔmɔkɔ nda elela ya batalɛ ende oto oyatooka lioi lisasaya la limɛngɔ;

²¹ kongo ko ati la biili ndatiteni yande nde koumwaka ko mbile sinyo; limɔ atoya tale la likongolomu eoka ya Lioi, lisasaya atokwa se.

²² Inde imɔ oyalɔɔmɔkɔ nda kɛ̈kɛ̈, atooka Lioi, bifembi ya wenda la lilimbi lia bieto, bitoyanyɛɛlɛ Lioi, angota tuma.

²³ Nde inde oyalɔɔmɔkɔ nda nyɛlɛ ilau atooka Lioi, atoosh’imɔ litina lia Lioi, atota tuma, bimɔi kama liu, bimɔi kama liambɛ, bimɔi kama isatɔ.

Koto ilau la Koto ibe

²⁴ Yesu lotamb’iyo bombila wasi, Inde mbo— Bɔkɔta wa Use kokwelomo la boto oyalɔɔkɔ koto bilau kwa bangwindi nda elanga yande,

²⁵ nde aingalaka bato tɔlɔ, wiyani lande loya oyalɔɔ baoköoko ko omao nda koto ya bangwindi, limɔ inde lotangwa eyande.

²⁶ Nde ɔtɔkɔ yao batɔmbɔ, lamao ko baoköoko imɔ lɔɛnɛlɛ.

²⁷ La bɛkɔwa ya ngɛnɛ w’elanga loya ayaonga lande mbo— ¿Ngɛnɛ, mbo aɛ otialɔ̈ɔ̈kɔ̈ koto ilau nda elanga yaɛ? ¿Baoköoko basokwi to nde lonima?

²⁸ Inde mbo— Wiyani nd’asokela ongoma. Lamao bɛkɔwa loonga lande mbo— Olɛmbi to mbo iso tɔɛkɛ okasɔnjaka bao?

²⁹ Nde inde mbo— Mbayɔ, eoka mbo atosɔnjak’ino baoköoko, otauwokola imɔ ko bangwindi lisanga.

³⁰ Machaka yaambale bikondakaneke konda mbile ya eula, lamao nda eula, imi koonga la ebatotwa mbo— Tasɔnjakɛ baoköoko, ndokandaka bao bekuku yofechomo limɔ sɔnjaka bangwindi nda ekukelo yami.

Bembila yasi yokweekela Bɔkɔta wa Use

³¹ Inde lotamb’iyo bombila wasi, Inde mbo— Bɔkɔta wa Use bole kwa lokoto loa mbase, boto lɔsɔ loao, inde lolɔɔ loao nda elanga yande;

³² lole lokoto lokɛkɛ loeta bitoti la bɔkɛkɛ, kongo ko atokonda loao, lotolongela tosasandu tototina, lotoya isandu angɛnɛ mbo nɔli biyeke oyakelaka bikalingo yau nda beta ya shao.

³³ Inde lokambes’iyo bombila wasi, mbo— Bɔkɔta wa Use wende kwa fulofulo eyundi otomali ndokaisa nda kilo isato ya lɔkɛ̈kɛ̈ (eoka yokela lituma) mbo bitotina biulweke la fulofulo.

³⁴ Bitotina-bi Yesu loonga ende bikuke ya bato ko la bembila, la Inde angoonga lau sakolo ko la bombila

³⁵ ongoma lioi eliaongaka bɔtɔndɔli liakɔchɔmɔkɔ mbo— Itoasola bɔnɔkɔ wami ko ndokusola bombila, Itoongaka yao ebiisamiki konda liako lia wenda ko louse.

³⁶ Lamao Inde lomacha bikuke ya bato, Inde lɔɔtɔ ndakɔ la baeki bande loya end’Inde, iyo mbo— Sanoelak’iso litina lia bombila eoka ya baoköoko nda elanga.

³⁷ Yesu loonga mbo— Bɔlɔi wa koto bilau ende Wana wa Boto,

³⁸ elanga ende ewenda-bo, koto bilau bende bana ba Bɔkɔta wa Use; nde baoköoko bende bana ba Ewa obe;

³⁹ wiyani oyalɔɔkɔ bao ale Satana; eula yende basilelo ba wenda, ebatotwa eula bende bakitomo.

⁴⁰ Kwa asɔnjɔmɔkɔ baoköoko ndokafechomo nda bosä, ko ongoma akakelomoko nda basilelo ba wenda.

⁴¹ Wana wa Boto elatomaka bakitomo bande la iyo belasɔnjaka nda yakakaelo yande bitotina ebitobebekesa bato la ebatokelaka obe,

⁴² la belaumbokolaka iyo nda bosa wa litumbo, olo elayalaka bileli la ngɛlɛtɛ ya bainyo.

⁴³ Lamao bato ba liengani belaangangaka kwa löwa nda Bɔkɔta wa Sango wau. Oyale la batoi, okeke.

Yeka ya loketi lofi fafo

⁴⁴ Bɔkɔta wa Use bole kwa bieto ya mbiso ebisoisomo nda elanga; aisoläkä oto oisola yao, inde loisa yao liasi, limɔ eoka ya limɛngɔ, inde lɔkɛ okaungesa biengo yande bitotina, inde kosomba elanga ena.

⁴⁵ Liasi imɔ, Bɔkɔta wa Use bole kwa botimbi wa bokalala oyatokalüke maka (eko sheka sha loketi lofi fafo);

⁴⁶ limɔ ɛnɛ̈kɛ̈ inde lomaka loa loketi loa likama, inde lɔkɛ okatambesa biengo bitotina, inde losomba loao.

⁴⁷ Liasi imɔ, Bɔkɔta wa Use bole kwa wɛngɔ ebosotomo nda balia, wao loobyamela swi ya befɔnɔ bitotina,

⁴⁸ akatumeke wao, iyo kosamba nda ngɔngɛ, iyo loyala se mbo baönyeke ebilau nda bembeya, ani iyo koumbola ebibe tubu.

⁴⁹ Lolayalaka ko ongoma nda basilelo ba wenda; bakitomo bekuswaka ndoönya bato babe la eba liengani shɛi,

⁵⁰ la beumbolaka iyo nda bosä wa litumbo, olo elayalaka bileli la ngɛlɛtɛ ya bainyo.

⁵¹ Yesu loonga lau mbo— Osoluwa litina lia bitotina-bi? Iyo mbo— Eingo.

⁵² Lamao Yesu loonga lau mbo— Eokao luwaka mbo Botikasa oyale boeki wa Bɔkɔta wa Use, ende kwa ngɛnɛ wa ndakɔ oyatokusokola boindä wa oso la biɛngɔ biyai imɔ, nda bondanda ebole lande.

Fee ya eba Nasaleta

⁵³ Asiläkä Yesu ndotel’iyo bembila-bi, Inde losekwa omao.

⁵⁴ Iyäkä Inde nda tukela yande angɛnɛ, Inde loekekes’iyo nda ɛsɔngɔmɛlɔ yau, iyo lomwaala, iyo mbo— ¿Boto-yo asɔɔlɔ wɛlï-bo la bisisho ya bofoka ko anima to?

⁵⁵ ¿Ati nde bɔkwɛti-bo? ¿Nyango wande ati to la lina liko Maliya? ¿Bitungani yande bati to eba Yakobo la Yosefa la Simona la Yuda?

⁵⁶ ¿Baelo bande batotina bati to lasu eya? ¿Boto-yo asɔɔlɔ bitotina-bi ko anima?

⁵⁷ La iyo lɔɛnɛ ko tale eoka yande. Nde Yesu loonga lau mbo— Bɔtɔndɔli atolitesomo sakolo ngo ko nda bokenge wande angɛnɛ la nda ndakɔ yande angɛnɛ.

⁵⁸ Atiakeläkä bisisho ya bofoka wike omao eoka batiäkä la liimeli.