Matayo 11 - Le Nouveau Testament in Kele (Lokele) 1958

¹ Asilaka Yesu ndoekesa baeki bande liu la bambale, Inde losekwa nda elel’ao okanangola la okekesa nda bekenge yau.

Wɛndi wa Yoane Bolufï nda bɔnyɔlɔlɔ

² Okakä Yoane olo nda ndakɔ ya bɔnyɔlɔlɔ, bekeeli eyakeläkä Masiya, inde lotoma wɛndi la baeki bande, okafel’Inde mbo—

³ ¿Aɛ nd’ale Inde oyakayeke, kwa mbo tolukeke wasi?

⁴ Yesu lomutola lau mbo— Kɛndɛkɛ la kambesaka Yoane ebisoɛnɛ ino la ebisook’ino,

⁵ mbo eba betuku batɔɔlɔ liɛni, eba bikoti basokɛndɛ fii, eba baɛndi basotanesomo, eba biokö basooka, ebawi basoemesomo, la eba touwe basonangoelomo Mboli Ilau;

⁶ limɛngɔ lile la oto ona oyaitoɛnɛ tale eoka yami.

⁷ Atangwäkä eba wɛndi, Yesu loakola ndoonga la bikuke ya bato loasɔ loa Yoane, Inde mbo— ¿Ino waɛkɛ nda liɔmbɛlɛ okɛnɛ iye? ¿Mbo liangala elisolɛlɛlɛlɛ la lofofo?

⁸ ¿Waɛkɛ nde okɛnɛ iye to? ¿Mbo oto oyawati bisinda ya bɔfɛkɔ? Tɛnɛ ngo, ebatowata bisinda ya bɔfɛkɔ bayali nda ndakɔ ya bɛkɔta.

⁹ ¿Nde ino waɛkɛ eoka iye to? ¿Okɛnɛ bɔtɔndɔli? Eingo ko, isoonga lanu mbo asolongela bɔtɔndɔli.

¹⁰ End’inde oyatelomoko nda lokasa mbo— Tɛnɛ, itotoma wɛndi wami oso waɛ, Oyatokakomya mboka yaɛ oso waɛ.

¹¹ Wewe, isoonga lanu mbo angwɛnɛ boto oyasootomo la otomali asoɛnɛlɛ wolongela Yoane Bolufi, kongo ko inde oyayali ewa liili nda Bɔkɔta wa Use asolongela nde Yoane.

¹² Konda bacho ba Yoane Bolufi konda kwani Bɔkɔta wa Use bosɔɔtɔmɔ ko la botatulu l’eba botatulu batundesa wao tafi.

¹³ Eoka Batɔndɔli batotina la Bikela yatɔndɔlɔmɔkɔ ko ende Yoane,

¹⁴ la eyambo bɔlɛmbɛ ndoimela ongoma ambo ende Eliya oyakayeke.

¹⁵ Oyale la batoi, okeke.

¹⁶ ¿Itokweela to nde efɛtɔ-ye l’iye? Yende kwa bana ebasoyalaka se nda liongo, batotakana la baina lau lioi mbo—

¹⁷ Tosoomel’ino bofilingi, nde otiineke bisha, tosoleel’ino etondo, nde otiomakeke yɛlɔ nda ewa.

¹⁸ Nde Yoane asoya, angola la angomwa, limɔ basoonga mbo ale la bolimo obe;

¹⁹ Wana wa boto asoya, ani atola la atomwa limɔ basoonga mbo— Tɛnɛ ngo, ende afofa la bowi bänä, lisaɔ lia basɔnji ba bɛsɔmbi la bato abe. Nde Wɛlï bosoluwana olau ko la bekeeli ya wao.

Lofomo se loa bekenge ya Ngalilai

²⁰ Lamao Yesu loakola ndofaka bekenge liɛngɔ olo akelomökö wike wa bisisho yande, eoka batiakalanganakä, Inde mbo—

²¹ Aeko Kolasini, aeko Betesaida; eya to mbo bisisho eyakelomökö eyanu, kokelomo nda Tulo la Sidona, ani bakalanganäkä ko kwalakwala la bakonia nda bindo la bala nda lokomba.

²² Imi mbo— Simbi to elianu likuchi litoeta elia Tulo la Sidona nda lise lia likomyi.

²³ ¿L’aɛ moni Kafenauma? ¿Mbo aɛ kotaliomo konda use? Mba, otoumbolomo nda liöndo lia liwa; eoka eya mbo bisisho ebisokelomo eyaɛ, yakelomökö nda Sodomo, ani wao koyalaka kond’eweuse.

²⁴ Nde Imi nd’asoonga lanu mbo— Yese ya Sodoma angooka likuchi lifi elikokeke ino nda lise lia likomyi.

²⁵ Nda mbile-ao Yesu loonga mbo— Sango, isoaola la kelekëlë end’Aɛ ako Ngɛnɛ wa Use la se, eoka mbo osoisa enjasɔ-bi ende eba wɛlï la eba liluwani, nde osoisola yao ende bana’oli.

²⁶ Eingo ko Sango, eoka loao lɔɛnɛlɛ nde lolau nda lisangi liaɛ.

²⁷ Bitotina bisofomo’mi ko la Sango wami; angwɛnɛ ango ɔmwito oyatolüwa Wana sakolo ngo ko Sango la angwɛnɛ oyatolüwa Sango sakolo ngo ko Wana, la inde imɔ oyatosanga Wana ndɔɛnɛsɛ inde.

²⁸ Yauku to ende’mi ino batotina ebasolewa la bonui la ebasolɛkwa la belito, la Imi nd’atof’ino lwɛumɔ.

²⁹ Tolaka njɛmbɛ yami, yekesek’ino; yende la bɔfɔu la lilatemi nda botema, la otɔɔlɛlɛ belimo yanu lwɛumɔ.

³⁰ Eoka njɛmbɛ yami yende la bɔfɔu la bokuku wami wende la bɔfɛfu.