Malako 6 - Le Nouveau Testament in Kele (Lokele) 1958

Yesu nda Nasaleta

¹ Inde losekwa omao; Inde loya nda tukela yande angɛnɛ la baeki bande lotut’Inde.

² Nda lise lia Yenga Inde loakola ndoekesa bato nda ɛsɔngɔmɛlɔ Okak’iyo likambesi liande, bato wike lomwaala, iyo mbo— Boto-yo asɔɔlɔ to liao anima? Boni wɛlï bosofomo boto-yo? Bisisho ya bofoka ebitokelomo la besamba yande yende la litina moni?

³ ¿Ati nde bɔkwɛti-yo, wana wa Malia, boloo wa Yakobo la Yose, la Yuda la Simona? ¿Baelo bande bati to eya lasu? La iyo lɔɛnɛ tale eoka yande.

⁴ Yesu loonga lau mbo— Bɔtɔndɔli atolitesomoko sakolo ngo ko nda bokenge wande angɛnɛ la nda bokulu wande la nda ndakɔ yande angɛnɛ.

⁵ Atiakɔkɔlɔkɔ okela bisisho ya bofoka omao sakolo ko mbo ataliaka besamba yande ende ebakambo bamɔi la auwesaka’iyo.

⁶ Inde lomwaala eoka batiaaka la liimeli. Limɔ Inde lɔkɛ nda kenge bikɛkɛ bitimbi okaekekesa bato omao.

Lɔkɛndɔ loa Baeki liu la Ambale

⁷ Inde lota baeki liu la ambale lioi; Inde loakola ndotom’iyo, bambale bambale, la Inde lof’iyo isosha likolo lia belimo ebe.

⁸ Inde lofekel’iyo ndotola yeka ya mboka, sakolo ko itumbe kongo, inga lituma, inga litanga, inga bieto,

⁹ kangä bawateke tokwaka nde Inde lofekel’iyo owata kanju imbale.

¹⁰ Inde loonga lau mbo— Olo atɔɔtɔ ino nda ndakɔ, yalaka kw’amao kond’akakusweke ino nda okenge ona;

¹¹ la olo atofeka bato ndonyangel’ino la ndok’ino, akasokwek’ino omao, fufolaka liunge elisowatema la batindi banu kwa ndembe ende iyo.

¹² Baeki lɔkɛ, iyo lotaka boeki mbo bato bakalanganeke,

¹³ iyo lokusokola belimo ebe wike, iyo lɔlɔkɛsɛ eba kambo baita, iyo losäsa.

Liwa lia Yoane Bolufi

¹⁴ Bɔkɔta Helodi (Antipas) looka loasɔ-lo eoka lokuku loa lina lia Yesu lookana finɛ, la bamɔi mbo Yoane asokuswa nda liwa eokao befoka bitokelaka bisisho ko lande.

¹⁵ Basi mbo Ende Eliya, la basi mbo Ende Bɔtɔndɔli kwa bɔfɔnɔ w’eba oso.

¹⁶ Okaka nde Helodi ongoma inde loonga mbo— Oyatinyaka’mi kingo ako Yoane, end’inde asokuswa nda liwa.

¹⁷ Eoka mbo Helodi atomaka bato okaundesa Yoane, inde lot’inde nda ndakɔ ya bɔnyɔlɔlɔ, loasɔ loa Helodia ako wali wa boloo wande ako Filipo, eoka Helodi asɔngɔkɔ inde.

¹⁸ Yoane aongaka lande mbo— Etiengane la bikela mbo ɔɔsɛkɛ wali wa bolo waɛ.

¹⁹ Ko ani Helodia loisel’inde ikufya mbo aolek’inde, kongo ko inde angokɔkɔlɔ,

²⁰ eoka Helodi angɛnɛ lowänga Yoane la aluwaka mbo ende oto wa liengani la ewa Mungu; ongoma Helodi lotingana lande. Okaka Helodi inango shande, botema wande lokwelo liyɛyɛ, nde inde look’inde la limɛngɔ.

²¹ Nde yose eyengani loya, Helodi nda lise lioenyela liotomu liande, inde lokenja elambɔ ende bafoka la benyafala yande la betolioso ya Ngalilai.

²² Boseka wa Helodia lɔɔtɔ nda elambɔ, inde loinel’iyo isha, inde loomalesa Helodi la ebayalaka lande. Limɔ Bɔkɔta Helodi longa la boseka mbo— Felaka’mi yeka eyekalɛmbɛkɛ aɛ, yefak’aɛ yao.

²³ Helodi lotel’inde tele mbo— Yeka eyetofel’aɛ, yefak’aɛ yao, ango yaki ya bɔkɔta wami.

²⁴ Limɔ boseka lokuswa okaonga la nyangɔ wande mbo— ¿Ifelek’iye? La nyango mbo— Botö wa Yoane Bolufi.

²⁵ Inde loinywa la mangu ende Bɔkɔta, inde lofel’inde mbo— Ilɛmbi nde mbo ofeke’mi ko kwanikwani, botö wa Yoane Bolufi nda lotufa.

²⁶ Helodi looka ikɛnɛnɛ sifi, kongo ko eoka ya tele yande la eoka ya ebayalaka lande, inde angolɛmbɛ ndotombola lisakä liande.

²⁷ Bɔkɔta lotoma bosilikani ɔmɔi mbo aesheke botö wande. Inde lɔkɛ, inde lotenel’inde kingo nda ndakɔ ya bɔnyɔlɔlɔ,

²⁸ inde loesha botö nda lotufa, inde lofa boseka wao, la boseka lɔkɛ okafa nyango wande.

²⁹ Okaka baeki bande ongoma, iyo loya, iyo loila engulunguma, iyo loomba yao nda losai.

Lilesi lia Bato Bilɛfu bɔɔmwi

³⁰ Ainwaka batomomu ende Yesu, iyo loluwes’Inde bitotina ebiakelaka iyo la ebiaekesaka iyo.

³¹ Limɔ Yesu loonga lau mbo— Yauku, ko ino angɛnɛ konda elela eyele elämbä, ndoyaeuma sumbu. Eoka bato wike loetaetaka la iyo batiɛnɛkɛ ango fofe yola bieka.

³² Limɔ iyo lɔkɛ la watɔ konda elela eyaaka elämbä ko iyo angɛnɛ.

³³ Kongo ko bato loɛnɛ iyo la lolembeel’iyo; bato ba kenge bitoti lokwa mangu la boili, iyo loetelel’iyo oso.

³⁴ Asaowaka Yesu, Inde loɛnɛ windi bofi wa bato, la Inde lookel’iyo ngandi, eoka baaka kwa bɛkɔkɔ ebiti la botingani; la Inde loakola ndoekes’iyo njasɔ wike.

³⁵ Aɔngɔkɔ buse litele, baeki bande loyaonga lande mbo— Elela-ye ende ko isimo la buse bosɔɔngɔ.

³⁶ Machak’iyo baɛkɛ nda bilanga la bekenge bitimbi okasomba bieka yola.

³⁷ Yesu lomutoel’iyo mbo— Ino angɛnɛ faefak’iyo bieka yola. Iyo mbo— Tɔɛkɛ nde okasomba beila la falanga mia imbale mbo tofaef’iyo bieka yola?

³⁸ Yesu mbo— Ole la beila yanga? Kɛndɛkɛ okɛnɛ. Limɔ aluwak’iyo, iyo lomutola mbo— Bɔɔmwi la swi imbale.

³⁹ Limɔ Yesu loonga lau mbo bayalesɛk’ato batotina se nda twingi twesi, botuka la botuka;

⁴⁰ iyo loyalaka se, ebotuka mia, mia; ebotuka kama bɔɔmwi, kama bɔɔmwi.

⁴¹ Inde lɔɔsɔ beila bɔɔmwi la swi imbale, Inde loila baiso likolo, Inde losombola limɔ Inde loataka beila. Inde lofaekefa baeki bande mbo basɛlɛkɛ yao oso wa bato; la swi imbale imɔ. Inde lokaela yao ende batotina.

⁴² Batotina lola la iyo lokanelo.

⁴³ Iyo loina twinyo twa beila totumesa bisaka liu la imbale la twinyo twa swi lisanga.

⁴⁴ Bato ana ebalaka beila baaka batolome bilɛfu bɔɔmwi.

Yesu lotanda likolo lia balia

⁴⁵ Kwaamao Inde loonga la baeki bande mbo bakweke nda watɔ la mbo balekeke oso wande ko nda boili wasi nda Betesaida, ani Inde atomelesa bato.

⁴⁶ Asenyanak’Inde la bato, Yesu lɔkɛ nda löngo okasombola omao.

⁴⁷ Ilaka buse likɔlɔse, watɔ wa baeki waaka owale la Yesu Inde angɛnɛ nda boili,

⁴⁸ ɛnɛkɛ Inde wɛnɛ iyo basolewa olukaka kai eoka lofofo losonana lau, Inde loyel’iyo nda mbile ya lilamba lia anɛi lia ocho. Inde lotanda olikolo lia balia la asangaka oeta iyo.

⁴⁹ Ɛnɛkɛ iyo Inde atandaka olikolo lia balia, iyo loenyela mbo ende bosoko, iyo loamama;

⁵⁰ eoka iyo batotina loɛnɛ Inde la iyo lowänga finɛ. Nde Inde loonga lau lisasaya, mbo— Sambolaka betema, yende Imi angɛnɛ, owangëke!

⁵¹ Inde lokwa nda watɔ amamwito lau, la lofofo lotemba. Iyo loilima finɛ la bɔwa

⁵² eoka batialuwaka loasɔ loa beila la wɛlï la betema yau yaaka betembu.

⁵³ Alekaka iyo, iyo loiyela Ngenesaleta, iyo loelamesa watɔ nda ngɔngɛ.

⁵⁴ Asaowaka iyo lisasaya batotina lolembel’Inde

⁵⁵ la iyo lokwa mangu nda yese etotina ndokatola bato ba kambo nda tange konda elela olo ayali Inde.

⁵⁶ Nda bilela bitotina olo akɛndɛkɛ Inde, kwa nda kombo, angoko bekenge, angoko bilanga, iyo loingesaka eba kambo nda baongo, iyo lolɔmbɔkɔlɔ Inde mbo bamateke ango litamba lia esinda yande, la batotina ebamataka Inde, iyo louwesomo.