Malako 5 - Le Nouveau Testament in Kele (Lokele) 1958

Boto wa Bolimo obe

¹ Iyo loiya nda boili wasi wa eliya, boko yese ya BaKelasene.

² La asaowaka Yesu nda watɔ, lisasaya boto oyayalaka la bolimo obe inde lokuswa nda fowa biko sai oyatowana la Yesu.

³ Boto ona aaka la eyaelo yande omao nda fowa biko sai. Angwɛnɛ boto ango ɔmɔi kokɔkɔlɔ okand’inde la bɔnyɔlɔlɔ.

⁴ Akandomökö nde oso bakandomo wike kola bakala la bɛnyɔlɔlɔ, kongo ko inde lɔɔ̈mɔlɔ bɛnyɔlɔlɔ fɔi la bakala inde lotenakaka batena wike; angwɛnɛ oto oyale la bofoka wokakales’inde.

⁵ Becho betoti, la ocho la löwa inde loyalaka nda sai la nda föngo, ani inde loamamaka inde lotinyaka lokomba loande la batalɛ.

⁶ Nde ɛnɛkɛ inde wɛnɛ Yesu esika, inde lofata mangu okatulamel’Inde se;

⁷ inde loaamama la limiki lifi mbo— ¿Iso laɛ twende la loni loasɔ, Aɛ Yesu wana wa Mungu Oyalongeli? Itoomb’Aɛ la lina lia Mungu mbo wokesëke’mi bïale.

⁸ Eoka Yesu loonga lande mbo— Kuswaka ende oto-yo, aɛ bolimo obe.

⁹ Yesu lofel’inde mbo— Lina liaɛ liko ndai? Inde lomutola mbo— Lina liami liko Legione eoka tole bokamu (wa belimo)

¹⁰ la inde lolɔmbɔkɔlɔ Yesu finɛ mbo atasayëk’iyo nda yese-ye.

¹¹ Omao nda fangi ya löngo yaaka liyasa lifi lia ndei ani bitolaka bieka;

¹² belimo losombola Inde mbo— Kɛsɛk’iso nda ndei ina mbo toɔtɛlɛkɛ yao.

¹³ La Yesu lomachel’iyo la belimo ebe lokuswela oto, yao lɔɔtɛlɛ ndei la liyasa lia ndei lokwa mangu kola löngo konda eliya la yao lowa nda balia, loketi loa yao mbo bilɛfu imbale.

¹⁴ Limɔ betingani ya ndei lofata mangu ndokakambesa mboli nda bekenge la nda bilanga limɔ bato loya oyɛnɛ lona eloakelomoko.

¹⁵ Ayaka iyo ende Yesu, iyo lɔɛnɛ boto oyaiki la belimo ani ayali se, la awati esinda la ani ati’mɔ la loseka, ako boto oyaaka la Legione (bokamu wa belimo). Iyo lowänga finɛ.

¹⁶ Bato ebɛnɛkɛ loasɔ loluwes’iyo loasɔ loa boto wa belimo la eloa ndei;

¹⁷ iyo loakola ndosombola Yesu mbo asekweke nda yese yau.

¹⁸ Akwaka Yesu nda watɔ, boto oyaaka la belimo lofela Yesu mbo ayaleke lande.

¹⁹ kongo ko Yesu atiakuliaka, nde Inde loonga lande mbo— Kɛndɛkɛ nda ndakɔ ende ebaɛ la kangesak’iyo ebifi ebisokeela Mungu ende aɛ la ngandi eyesookel’Inde aɛ.

²⁰ La oto lɔkɛ eyande, inde loakola ndomelesa mboli nda Ndekapoli ya njasɔ bifi ebiakelaka Yesu ende inde, la batotina lomwaakala.

Wana otomali wa Yailo

²¹ Alekaka Yesu la watɔ konda boili wasi, windi wa bato lɔsɔngɔmɛlɛ Inde ani ayali nda ngɔngɛ.

²² La ɔmɔi wa bekumi ya ɛsɔngɔmɛlɔ loya, lina liande liko Yailo, ɛnɛkɛ inde ɔɛnɛ Yesu inde lokwa balui se,

²³ inde losombola Inde finɛ, mbo— Wana otomali wami ɔkɛkɛ asoya oko tina lowa, Yauku oyatalia inde osamba waɛ mbo uweke la mbo aikeke imɔ.

²⁴ Yesu lɔkɛsɛnɛ lande, la windi wa bato lotutak’inde, iyo lowamakana lande.

²⁵ Bɔtɔmali ɔmɔi aaka omao oyaaka la lokambo loa likila ko miaka liu la imbale;

²⁶ okäkä wäle finɛ ende kanga wike, la asilesaka bieto yande bitoti, angosäsa ango sinyo, lokambo lɔkɛ la oso.

²⁷ Okäkä inde lokuku loa Yesu, otomali loya nda windi wa bato ombisa ya Yesu, inde lomata esinda yande,

²⁸ eoka aongaka mbo— Yemata ango bisinda yande, imi kouwesomo.

²⁹ Lisasaya likila löma tɔu la otomali looka nda lokomba mbo asosäsa loo loande.

³⁰ Yesu imɔ looka mbo bofoka bouwesa oto bosokuswel’Inde, Inde lokikwa nda bokamu, Inde mbo— Ndai amatiki bisinda yami?

³¹ La baeki bande loonga lande mbo— Osɔɛnɛ bokamu wa bato basowamaka’Aɛ, nde kofela mbo— Ndai amatiki’mi?

³² Limɔ Yesu loɛlɛlɛ, mbo ɛnɛkɛ oyasokela ongoma.

³³ Botomali lowänga, inde lonyanga finɛ, eoka aluwi loao elosokelomo end’inde, otomali loya oyakwa se oso wa Yesu la inde loluwesa Yesu bitotina wewe.

³⁴ Nde Yesu loonga lande mbo— Wana otomali, liimeli liaɛ lisouwes’aɛ, kɛndɛkɛ la lilatemi la säsesomoko lokambo loaɛ.

³⁵ Atitasilaka Inde ndoonga, bato ebasekwaka nda ndakɔ ya Bokumi wa ɛsɔngɔmɛlɔ loya oyaonga lande mbo— Wana otomali waɛ asowa; ¿Otookesa Boekesi likati imɔ monito?

³⁶ Nde Yesu looka lioi elisoongomo, kongo ko Inde loonga la Bokumi wa ɛsɔngɔmɛlɔ mbo— Owangëke, imelaka kongo.

³⁷ Yesu atiakuliaka oto angomwito mbo atutaneke lande, sakolo ko Petelo la Yakobo la Yoane, etungani ya Yakobo.

³⁸ Iyaka iyo nda ndakɔ ya Bokumi wa ɛsɔngɔmɛlɔ Inde lɔɛnɛ limbilititi lia bato la etondo efi ya bato ebatolelaka finɛ.

³⁹ Aɔtɔkɔ Inde, Inde loonga lau mbo— ¿Otokela etondo la otolelalela monito? Wana atikwele se, aingali ilɔ.

⁴⁰ Limɔ iyo losɛkɛlɛ Inde finɛ. Inde lumes’iyo atotina lousa, limɔ Inde lɔɔsɔ la sango la nyango ba wana la ebaaka lande angɛnɛ Inde lɔɔtɔ olo aingali wana.

⁴¹ Aundaka Inde wana bosamba, Inde loonga lande mbo— Talita kumi; litina mbo— Wanaotomali, Imi mbo, Emalaka.

⁴² Kwaamao wanaotomali loemala, inde lɔkɛndɛ, aaka nde la miaka liu la imbale. Bato losisimwa finɛ.

⁴³ Limɔ Inde lotel’iyo ekela mbo bataluwesa oto angomwito, limɔ Inde loonga lau mbo bafeke wanaotomali bieka yola.