Malako 16 - Le Nouveau Testament in Kele (Lokele) 1958

Litɛmwi lia Yesu nda Liwa

¹ Etaka lise lia osambale (Yenga ya BaYuda) Malia wa Mangandala la Malia nyango wa Yakobo, la otomali ako Salome, iyo losomba tuma twa liɛsɛ mbo baɛkɛ okalɔɔkɛsɛ bolyo wa Yesu.

² Lanɔngɔnɔngɔ la lise lia oso lia Yenga la yombe, iyo loya nda losai.

³ Nda mboka iyo loonganaka mbo— ¿Ndai to atoundukolel’iso litalɛ nda ɛɔtɛlɔ ya losai?

⁴ Atichak’iyo losai, iyo lɔɛnɛ oko litalɛ lisoundukolomo, liaaka nde litalɛ lifi fafo.

⁵ Ɔtɔkɔ iyo nda losai iyo lɔɛnɛ isenge oyawati esinda efufu ani ayali se nda faki y’olome, la batomali lotalimwa finɛ.

⁶ Inde loonga lau mbo— Otalimwëke. Otoluka nde Yesu wa Nasaleta oyaolomu nda lieka, nde asoemala liasi; at’imɔ eyamaya. Tɛnɛkɛ elela eyaingesomu Inde.

⁷ Nde kɛndɛkɛ okakambesa baeki bande la Petelo lisanga mbo asotakɛ oso wanu nda Ngalilai, wɛnɛkɛ nde Inde omao kwa aongaka Inde lanu.

⁸ Limɔ batomali lokuswaka nda losai ani bakwaka mangu eoka iyo lonyanga la liyaimweso fafo. Batiaongaka ango lioi la oto angɔmɔi eoka bawangaka nde.…

⁹ (Akuswaka Inde lanɔngɔnɔngɔ la lise lia oso lia Yenga, Inde lɔɛnɛlɛ oso ende Malia wa Mangandala oyakusola Yesu ekusol’inde belimo ibe osambale. Malia lɔkɛ okakambesa ebayalanaka la Yesu oso, ani basowel’Inde la lileli.

¹¹ Nde okaka iyo baoi-ba mbo Yesu akoyali liasi la mbo Malia asɔɛnɛ Inde, iyo angoimela.

¹² La mbisa, Inde lɔɛnɛlɛ la wɛnɛɛli wasi ende bambale bau nda mboka ani batɔkɛ nda bilanga.

¹³ Limɔ iyo loinywa okakambesa ebamɔi ebatikaläkä, kongo ko iyo imɔ angoimela.

¹⁴ Mbisa lamao Inde lɔɛnɛlɛ ende eba liu la ɔmɔi ani bayaläkä nda mɛsa. La Yesu loima iyo eoka ya fee la betema bewaü eoka batiaimeläkä bato ebɛnɛk’Inde mbisa ya litɛmwi liande.

¹⁵ Inde loonga lau mbo— Kɛndɛkɛ nda wenda bototina, okataka Mboli Ilau ende bato batotina ebale la liwawi.

¹⁶ Oyatoimela la atolufiomo, oyo nd’atouwesomo, nde oyaitoimela atofomo se.

¹⁷ Ndembe ya tokesa bitotutana la ebatoimela, biko, batokusola belimo ibe nda lina liami; batoonga baoi bayai; batoilaka njɔ;

¹⁸ ango bemwa lisäkä iyo angowa; batotalia besamba yau ende eba kambo, limɔ iyo kosäsa sasosaso.

¹⁹ Ongoma, mbisa ani Ngɛnɛ Yesu asoongana lau, Inde loilomo nda Use, Inde loyala se nda faki ya olome ya Mungu. Nde iyo loilaka kɛndɔ okataka Mboli nda fangi bitotina, la Ngɛnɛ lokelanaka lau likuwa la Inde lokɔkɔmɛsɛ Mboli ko la ndembe eyatutakanaka.)