Malako 13 - Le Nouveau Testament in Kele (Lokele) 1958

Lambaka la wɛlï-Boimo wa Yesu

¹ Akuswaka Yesu nda Ndakɔ ya Mungu boeki ɔmɔi wande loonga lande mbo— Boekesi, tɛnɛ; boni bɔfɔnɔ wa batalɛ-ba la aina bosweli-bo!

² La Yesu loonga lande mbo— ¿Wɛni nde bosweli-bo bofi? Angwɛnɛ litalɛ ango limɔi lilamachomoko likolo lia liasi nde batoti belaukolomoko.

³ Ayalaka Inde se nda löngo loa Elaya, fangi ya Ndakɔ ya Mungu, eba Petelo la Yakobo la Yoane la Andelo lofel’Inde wisakumbo mbo—

⁴ Kambesaka iso mbile eyekayeke njasɔ-bi la ndembe yolembela mbo bisamboya.

⁵ Limɔ Yesu loakola ndoonga lau mbo— Lambaka la wɛlï mbo botalimbomo,

⁶ eoka wike batoya nda lina liami ani batoonga mbo— Imi yende Inde la batoengola basi wike.

⁷ Atook’ino mboli ya bita la iwaesa sha bita, owangëke, eoka bilayaka nde, kongo ko losilo lokayi kɔni.

⁸ Yese la yese bitowesana, la bɔkɔta la bɔkɔta batowesana, lotukeso loa nyɛlɛ la elela la elela, la fondo bilayaka, yao ina bile ko liakoli lia ielo.

⁹ Ino angɛnɛ lambaka to eoka bekɛsɛk’ino ende eb’ikumbɛ la nda bisɔngɔmɛlɔ, beomakak’ino la fimbo, bemesak’ino oso wa bekumi la bɛkɔta ko l’eoka yami, mbo okulieke’mi oso wau.

¹⁰ la oso wa yao, Mboli Ilau konangolomo nda biese bitotina.

¹¹ Atoiliakomo ino ndokakɛsɔmɔ ende bekumi, otakelëke olenda eoka ya baoi boonga nde baoi ebakafomoko ino nda mbile-ao, ongaka ko bao, eoka bati ino angɛnɛ nd’atoonga kangä Bolimo Botanu.

¹² Boloo atowamba etungani nda liwa, la sango atowamba wana, la bana batowesana la ebaot’iyo mbo bakɛsɛk’iyo nda liwa;

¹³ la batotina batoiyana lanu eoka ya lina liami. Nde inde oyatokɔkɔmɔ konda losilo, inde elauwesomoko.

¹⁴ Akɛnɛkɛ ino wɛnɛ bɔlɛlɔ wa lioma bosoyala olo eyeti elela ya liao, (oyatotanga aluweke litina), limɔ eba Yudea bakweke mangu konda föngo,

¹⁵ boto eyala olikolo lia ndakɔ imɔ, angotasulwa se okaluke biengo nda ndakɔ;

¹⁶ boto eyala nda elanga, angoinywa imɔ okenge okɔsɔ esinda.

¹⁷ Aeko, wale ende batomali ba lieme nda bacho ana la ebatomwesa bana baɛlɛ imɔ.

¹⁸ Sombolaka mbo lotaya nda tengai ya bɔfɛfyɔ,

¹⁹ eoka nda bacho ana bifembi belayaka kwa ebitiayäkä oso, angoko nda baakoelo ebakelaka Mungu wenda konda kwani la botilayeke imɔ liasi ongoma. Aenaka Ngɛnɛ atungesaka bacho ana, ani angwɛnɛ ango ɔmwito oyatouwa, kongo ko asotungesa bacho ana ko l’eoka ya ebaaomoko lande.

²¹ Nda mbile ena, eyambo boto eonga lanu mbo— Tɛnɛ Masiya eyamaya. Tɛnɛ ale onamona, wimelëke,

²² eoka baMasiya ba nanga la bɛtɔndɔli ya nanga beyaka nde la tokesa la ndembe ya isosha mbo bekɔkɔlɔkɔ ndolimba ango ebasoaaomo angɛnɛ.

²³ Lambaka to la wɛlï, Imi nd’asokambes’ino bitotina oso.

²⁴ Kongo ko nda bacho ana, mbisa ya bifembi ina, liso lia use litotufatufa la tengai angoanyema,

²⁵ la tolonge totokwaka se la befoka ya use betotukatuka.

²⁶ Lamao belɛnɛkɛ Wana wa oto atoya nda bafita la bofoka bofi la bɔfɛkɔ.

²⁷ Limɔ atotoma bakitomo bande okasɔnjak’iyo ebasoaaomo l’olo l’olo fangi bitotina, konda liko lia ose ko nda liko lia use.

²⁸ Ekaka litina lia bombila wa bokumo; atofɛtɛ wao la atɔ̈tɛkɛ batɔmbɔ ba wao, otolüwa mbo eula esamboya.

²⁹ Ko ongoma akɛnɛkɛ ino wɛnɛ njasɔ-bi lüwaka mbo Inde asoya tina ango nda bome.

³⁰ Itoonga lanu wewe mbo e-fɛtɔ-ye eitosila oso ani e-njasɔ-bi bitotina bikayi.

³¹ Buse la se bilawanjwaka bao, kongo ko baoi bami batilawanjweke imɔ.

³² Angwɛnɛ oto angɔmwito alüwi lise lina kwa saa ina, bakitomo angolüwa, Wana angolüwa, sakolo ko Sango Inde angɛnɛ nd’alüwi.

³³ Lambaka la wɛlï, tinganaka imɔ, oitolüwa yose ena.

³⁴ Ende kwa oto oyakɛndɛkɛ esika, inde lomacha ndakɔ yande la inde lofa bakuwi bande isosha la likuwa liande, oto la oto, la inde lokambesa botingani wa bome mbo alambeke la wɛlï.

³⁵ Lambaka to, eoka otiluwe mbile eyekayeke Ngɛnɛ wa ndakɔ, angoko la litele, angoko la ɛsɔkɔ, angoko la yombe, angoko la bonyanya booku,

³⁶ ataya futuku la mbo ataosh’ino nda tɔlɔ.

³⁷ La kwa atoonga’mi end’ino, itoonga ko ende batotina, mbo— Lambaka.