Malako 12 - Le Nouveau Testament in Kele (Lokele) 1958

Bombila wa Balɔi babe

¹ Limɔ Inde loakola ndoonga lau ko la bembila. Inde mbo— Oto ɔmɔi alɔɔkɔ elanga ya tuma inde lolingela yao la likula, inde loswa liöndo liotwanga tuma, inde loemesa ndakɔ ya betingani, inde lomacha elanga ende balɔi, inde lɔkɛ yese yasi.

² Ayaka eula ya tuma, inde lotoma bɔkɔwa ende balɔi mbo aɔsɛkɛ tuma tɔmɔi twa elanga yande.

³ Iyo loundesa bɔkɔwa, iyo lokuchak’inde, iyo losaya inde besamba wawa.

⁴ Limɔ liasi inde lotomel’iyo bɔkɔwa wasi, iyo losw’inde nda otö, iyo lokeel’inde sɔni.

⁵ Inde lotoma wasi, iyo lool’inde. Inde lotomaka basi wike, iyo lokuchaka bamɔi, iyo loola bamɔi.

⁶ Atikalaka ko wana ɔmwito ewa losamɔ, inde lotomel’inde end’iyo liili, inde mbo— Batolitesa wana wami.

⁷ Nde balɔi ana loongana mbo— Oyo ende bosangesi wa botiko, yauku to, tooleke inde limɔ iso totɔɔlɔ botiko.

⁸ Ongoma iyo lound’inde, iyo lool’inde la iyo loumbola bolyo wande lousa loa elanga.

⁹ ¿Ngɛnɛ wa elanga ekelaka to iye? Eyaka nde la atosɛɛsɛlɛsɛ balɔi ana, la atofaefa basi elanga yande.

¹⁰ Okatangi lioi-li nda lokasa mbo— Litalɛ lina elisofeka baswi, Liao lisoyaswomo nda botö wa ndakɔ,

¹¹ Loasɔ-lo losoya ko l’eoka ya Ngɛnɛ, La nda baiso basu lole losemolomo.

¹² Iyo loluka fofe youndes’Inde kongo ko iyo lowanga windi wa bato, eoka iyo lolüwa mbo Yesu asotombol’iyo nda bombila-bo. Iyo lomach’Inde, iyo lɔkɛ eyau.

Bosombi wa Kaisala

¹³ Limɔ iyo lotomel’Inde bamɔi ba BaFalusi la bamɔi ebatutaka Helodi mbo bakweseke Inde nda baoi,

¹⁴ ayaka iyo end’Inde iyo mbo— Boekesi, tosolüwa mbo wende wewe la mbo oitowanga oto la oitolitesa isosha sha bato, nde otoekesa wewe wa mboka ya Mungu. Losoengana ofaefa Kaisala bosombi kwa angofa? ¿Tofaefeke kwa iso angofa?

¹⁵ Kongo ko Yesu lolembeela shɔngɔlɔ shau, Inde loonga lau mbo— ¿Otokotela’mi eoka iye? Eshelaka’mi lofalanga mbo yɛnɛkɛ loao.

¹⁶ Iyo loeshel’Inde lɔmɔi, limɔ Inde loonga lau mbo— ¿Bolendela-bo bole wa ndai? la lisɔni-li lile lia ndai? Iyo loonga lande mbo— Elia Kaisala.

¹⁷ Limɔ Yesu loonga lau mbo— Inolaka to ende Kaisala ko eya Kaisala la inolaka ende Mungu ko eya Mungu. Iyo lomwaala finɛ.

Litɛmwi nda Liwa

¹⁸ Lamao BaSadoke bamɔi loya ende Inde, baimelaka mbo angwɛnɛ imɔ litɛmwi nda liwa; iyo lofel’Inde mbo—

¹⁹ Boekesi, Mose atelak’iso lokasa mbo boloo ewa, ani amachi wali nde atiyale la wana, limɔ etungani atosangola lotika loa boloo mbo aoteleke boloo wana.

²⁰ Baaka batolome osambale, bana ba sango ɔmwito; ewa oso losɔngɔ wali la inde lowa, nde atimache wana,

²¹ ewa ambale losangola wali, la inde imɔ lowa angomacha wana, la ewa asatɔ ko ongoma,

²² la iyo osambale ko ongoma, angomacha wana; la otomali imɔ lowa liili.

²³ Nda litɛmwi nda liwa, atotɛmwa iyo, otomali atoyala wali wa ndai, eoka iyo batotina bosambale basɔngɔkɔ inde?

²⁴ Yesu mbo— ¿Oisounga eoka mbo oitolüwa Kasa ya Mungu la bofoka wande imɔ?

²⁵ Atotɛmwa ato nda liwa, batolome angosɔngɔ, la batomali angosɔngɔmɔ imɔ, nde beyalaka kwa bakitomo nda use.

²⁶ La loasɔ loa ebawaka la litɛmwi liau, okatangi kɔni nda Lokasa loa Mose nda loasɔ loa isasandu esitiafyaka, mbo Mungu loonga la Mose mbo— Imi, yende Mungu wa Abalayama, Mungu wa Isaka, la Mungu wa Yakobo; okatangi ongoma?

²⁷ Mungu ati Mungu wa ebawi, kangä wa ebale la liwawi. Eokao ino osoungaka finɛ.

Bikela ebieti

²⁸ Limɔ botikasa ɔmɔi loya ende Yesu la okaka inde kwa asofenyana iyo la mbo Yesu asomutoel’iyo sandelele, inde lofela Yesu mbo— ¿Eni ekela etolongela bitotina?

²⁹ Yesu lomutola mbo— Eyesolongela ende mbo, Tokaka, ino BaYisalaele, Bɔkɔta Mungu wasu ende Bɔkɔta ko ɔmwito;

³⁰ Samaka Bɔkɔta Mungu waɛ la botema bototina, la bolimo waɛ bototina, la baenyeli baɛ batotina, la bofoka waɛ bototina.

³¹ Eya imbale ende mbo— Samaka boyalani laɛ kwa ani otosama aɛ angɛnɛ. Angwɛnɛ imɔ ekela nde kolongela ebi.

³² Limɔ Botikasa ona loonga lande mbo— Eingo ko Boekesi, osoonga wewe mbo Mungu ende ko ɔmwito la wasi atiyale, ko Inde angɛnɛ,

³³ la ndosama Inde la botema bototina la baenyeli batotina la bofoka bototina, la ndosama boyalani laɛ kwa aɛ angɛnɛ, ndokelaka ongoma losolongela lifaefi lia nyama yofechomo.

³⁴ Okaka Yesu ani amutolaka inde la wɛlï, Inde loonga lande mbo— Aɛ oti esika la Bɔkɔta wa Mungu. Limɔ angwɛnɛ oto lotendela ofela Inde lofelo loasi.

³⁵ Aaka Yesu atoekesa nda Ndakɔ ya Mungu, Inde mbo— ¿Monito batikasa batoonga mbo Masiya ende wana wa Dawidi?

³⁶ Dawidi angɛnɛ, ko la Bolimo Botanu loonga mbo— Ngɛnɛ loonga la Ngɛnɛ wami mbo Yalaka se nda osamba wami wa olome, Kond’atosɛlɛ’mi baiyani baɛ ose ya batindi baɛ.

³⁷ Dawidi angɛnɛ atangak’Inde mbo Ngɛnɛ, ¿Ale to wana wande la moni? Ongoma windi wa bato lookaka Yesu la limɛngɔ.

³⁸ Aekesaka Inde bato, Yesu mbo— Lambaka batikasa ebalɛmbi okɛndɛkɛndɛ la bisinda bisa la mbo balamolomoko nda baongo,

³⁹ la mbo bafomoko kangala ya betolioso nda bisɔngɔmɛlɔ la bilela ya oso nda bilambɔ.

⁴⁰ Batɔɔsɔkɔ ndakɔ ya ebawelu olome, limɔ batosombolaka basomboli ba yumwa ko la bolimbake wau; kongo ko belafomoko se la likuchi lioeta.

Lifaefi lia Oyawelu Olome

⁴¹ Limɔ Yesu loyala se tina la ɛsɔnjɛlɔ ya bieto la Inde lɔɛnɛ bato ani batotaka bieto nda sanduku ya lifaefi, la bato wike ba bafoka lotaka bieto wike,

⁴² otomali oyawelu olome ko iuwe, inde loya oyata ko bakute bambale kongo.

⁴³ Yesu lota baeki bande lioi, Inde mbo— Isoonga lanu wewe mbo Otomali-yo oyawelu olome ale iuwe nde asota lifaefi liolongela batotina ebasokusola bieto nda sanduku,

⁴⁴ eoka iyo ana batotina basokusola sinyo sha lilya liau, kongo ko inde oyale la boenu asokusola eyande bitotina, ango yao ebilendeluku inde.