Malako 1 - Le Nouveau Testament in Kele (Lokele) 1958

¹ Liakoli lia Mboli Ilau ya Yesu Masiya, Wana wa Mungu.

² Kwa yatomoko nda lokasa loa Bɔtɔndɔli ako Yesaya, mbo— Tɛnɛ, itotoma wɛndi wami oso waɛ ndokakomya mboka yaɛ.

³ Limiki litoamama nda liɔmbɛlɛ mbo— Komyaka mboka ya Ngɛnɛ la longamesaka biëli yande.

⁴ Yoane Bolufi ayaka nda liɔmbɛlɛ la anangolaka njasɔ ya lilufi lia lɔmɛsɛlɔmɔ loa njasɔ ibe ko eoka ya likalangani.

⁵ Bato batotina ba kenge ya Yudea la eba Yelusaleme bakuswaka ndokɛnɛ inde. Aoläkä iyo njasɔ ibe yau, balufiomökö lande nda liyande liko Yaladene.

⁶ Yoane awataka esinda ya fuu ya ngamela, la bɔkɔli wa lokofo loa nyama nda lɔtɛta, la alakaka bakelele la wee wa lokonda.

⁷ Inde lonangola mbo— Ɔmɔi atoya liili liami oyasoeta’mi la bofoka. Imi itiengane ndofomo isosha shotulama se ndofaikola ikulu sha tokwaka twande.

⁸ Imi nd’asolufia ino nda balia kongoko Inde elufiaka ino la Bolimo Botanu.

Lolufiomo loa Yesu

⁹ Nda becho ena Yesu losokwa nda Nasaleta ya Ngalilai, la Inde lolufiomo la Yoane nda Yaladene.

¹⁰ Aeswaka Yesu nda balia, kwamao Inde lɔɛnɛ buse bosoatomo la Inde lɔɛnɛ Bolimo botoaa se kwa ekükü

¹¹ la limiki lookana nda use mbo— Aɛ wende wana bosamomu wami. Aɛ nd’atoomalesa’mi finɛ.

¹² Limɔ Bolimo lɔkɛsɛ Inde nda liɔmbɛlɛ.

¹³ Ayalaka nda liɔmbɛlɛ becho kama inɛi ani atososhelomo la Satana. Ayalanaka la nyama omao, la bakitomo lokukya Inde.

¹⁴ Akandomökö Yoane nda bɔnyɔlɔlɔ Yesu lɔkɛ nda Ngalilai ndokakambesa bato Mboli Ilau ya Mungu.

¹⁵ Inde mbo— Mbile esoengana, Bɔkɔta wa Mungu bosoya tina, kalanganaka, imelaka Mboli Ilau.

Lotomo lioi loa Baeki ba oso

¹⁶ Akɛndɛkɛ Yesu nda ngɔngɛ ya Eliya ya Ngalilai, Inde lɔɛnɛ Simona la Andelo, etungani yande ani batoluwa wɛngɔ eoka baaka baluwi ba swi.

¹⁷ Yesu loonga lau mbo— Tütaka’mi la itoyales’ino baluwi ba bato.

¹⁸ Lisasaya iyo lomacha wɛngɔ wau, iyo lotüta Inde.

¹⁹ Akɛndɛkɛ Inde sumbu liasi, Inde lɔɛnɛ Yakobo wana wa Sebedayo la Yoane etungani yande, nda watɔ ani batowamba wɛngɔ wau.

²⁰ Kwamao Inde lot’iyo lioi la iyo lomacha sango wau la bakuwi bande nda watɔ, la iyo lotüta Inde.

Kafenauma

²¹ Limɔ baɛkɛ nda Kafenauma. La nda lise lia Yenga Inde lɔɔtɔ nda ndakɔ ya ɛsɔngɔmɛlɔ la Inde loekes’iyo.

²² Iyo lomwaala liekesi liande finɛ eoka liekesi liande liaaka la isosha, inga kwa elia batikasa.

²³ Omao nda ɛsɔngɔmɛlɔ aaka oto ɔmɔi la bolimo obe.

²⁴ Inde loamama mbo— Iso laɛ, twende la loni loasɔ, Aɛ Yesu wa Nasaleta? Osoya oyasɛɛsɛlɛsɛ iso? Isoluwa Aɛ, wende oyo Botanu wa Mungu.

²⁵ Yesu loima inde mbo— Yalaka tau, kuswaka ende inde.

²⁶ Bolimo obe lowanj’inde lokomba, wao loamama la limiki lifi, wao lokuswa ende inde.

²⁷ Batotina lomwaala, iyo lofelakana mbo— Ende to iye? ¿Mbo liekesi liyai-li? Ko la isosha atoima belimo ebe la yao kolitesa Inde.

²⁸ Kwamao lokuku loande lofafana nda bekenge bitotina ebitimbi ya Ngalilai.

²⁹ Akuswaka Inde nda ɛsɔngɔmɛlɔ, iyo la eba Yakobo la Yoane, lɔɔtɔ nda ndakɔ ya Simona la Andelo.

³⁰ Nyango wa wali wa Simona aingalaka la etao nda bindo la lisasaya iyo lokambesa Yesu loasɔ loande.

³¹ Yesu lɔkɛ ende otomali, Inde lound’inde bosamba, Inde loemes’inde la etao lomacha inde, la otomali lokuwel’iyo.

³² La likɔlɔse, ilaka buse litele, bato loesel’Inde eba kambo batotina la ebaaka la belimo ebe.

³³ Bato batoti ba okenge losɔngɔmɔ nda bome.

³⁴ Inde losäsola bato wike ba loo loa bɔfɔnɔ la bɔfɔnɔ la inde lokusola belimo wike. Inde lofekela belimo ndoonga eoka baluwaka Inde.

³⁵ Lanɔngɔ asiswaka la yombe, Inde lokuswa ndokakɛ nda elela eyetiaka la bato la Inde losombola omao.

³⁶ La Simona la ebaaka lande, iyo lotuta Yesu,

³⁷ iyo loosha’Inde, iyo mbo— Bato batotina batoluk’Aɛ.

³⁸ Yesu lomutola lau mbo— Tɔɛkɛ konda bekenge yasi mbo ikookamelese mboli imɔ komao, eoka iyeli nde loao.

³⁹ La Inde lɔkɛ okanangokole nda Ngalilai etotina nda bisɔngɔmɛlɔ la Inde lokusokola belimo ebe.

Boto wa Baɛndi

⁴⁰ Boto wa baɛndi loya oyasombokol’Inde, inde lokwa bakulusembe oso wande, inde mbo— Bɔlɛmbɛ, aɛ kokɔkɔlɔ ndotanesa’mi.

⁴¹ Yesu lookel’inde ngandi finɛ, Inde lonanola bosamba, inde lomata inde, Inde loonga lande mbo— Ilɛmbi nde ongoma; tanesomoko to.

⁴² Lisasaya baɛndi losekwa, inde lotanesomo.

⁴³ Yesu loima oto, Inde lotom’inde ani asoonga lande la boimo mbo— Okambesëke oto angomwitoto.

⁴⁴ Kɛndɛkɛ okatamba bindo yaɛ ende kanga la faefaka Mungu lifaefi kwa ataka Mɔsɛ ekela eoka ya lotaneso loaɛ, kwa ndembe ende bato.

⁴⁵ Kongoko inde lɔkɛ, inde loakola ndokambesa bato la ndomelesa mboli ina, eokao Yesu angokɔkɔlɔ imɔ ndotɛmwa nda okenge. Inde loyalaka nda liɔmbɛlɛ, la iyo lokaeshakane end’Inde nda fangi bitotina.