Luka 9 - Le Nouveau Testament in Kele (Lokele) 1958

Lɔkɛndɔ loa Baeki liu la bambale

¹ Asɔnjäkä Inde eba liu la ambale, Yesu lofaef’iyo bofoka la isosha shokakalesa belimo ebe bitotina la ndosäsesa ngwo;

² la mbo bateke boekï wa loyo loa Bɔkɔta wa Mungu la ndokasäsesa eba kambo;

³ Inde loonga lau mbo— Wilëke yeka ya lɔkɛndɔ ndɔkɛ la yao, inga itumbe, inga litanga, inga lituma, inga bieto, angosɛlɛ kanju imbale.

⁴ La ndakɔ eyekaɔtɛk’ino, yalakaka kw’amao kond’akasekwek’ino.

⁵ Nde olo atofeka bato ndonyangel’ino, akasokweke ino omao, fufolaka liunge elisowatema la batindi banu kwa ndembe end’iyo.

⁶ Baeki lɔkɛ lɔkɛndɔ nda bekenge bitimbi, iyo lokanangokole Mboli Ilau la iyo losäsekesa eba ngwo lolo lolo aɛk’iyo.

⁷ Bɔkɔta Helodi looka mboli ya bitotina-bi eyakelomökö la inde lowa tolöi nda botema, eoka mbo bato bamɔi loonga mbo Yoane Bolufi asokuswa nda liwa,

⁸ bamɔi mbo Eliya asɔɛnɛlɛ liasi, la basi mbo ɔmɔi wa batɔndɔli ba kwalakwala asokuswa liasi.

⁹ Nde Helodi mbo— Imi nd’atenäkä Yoane kingo; ¿Oyo to ndai oyasookaka’mi njasɔ-bi? La inde lolukä fofe yɔɛnɛ Yesu.

¹⁰ Ainwäkä batomomu, iyo loluwesa Yesu bitotina ebiakeläk’iyo. Inde lɔɔs’iyo okakɛ lau wisakumbo konda bokenge boko Betesaida.

¹¹ Nde aluwäkä bato ongoma, iyo lotut’Inde, la Yesu lonyangel’iyo, Inde loonga lau loasɔ loa Bɔkɔta wa Mungu, la Inde losäsekesa ebaenökö bosäsu.

Lilesi lia bato bilɛfu bɔɔmwi

¹² Aɔngɔ̈kɔ̈ buse litele, eba liu la ambale loyaonga lande mbo— Tamachaka ekuke ya bato baɛkɛ nda bekenge ya yese bitimbi okaingala la okala bieka ina, eoka tole onomono nda liɔmbɛlɛ.

¹³ Kongo ko Inde loonga lau mbo— Ino fak’iyo bieka yola. Iyo mbo— Toti la yeka, ko beila bɔɔmwi la swi imbale, sakolo ngo ko iso kɔkɛ okasombaka bieka eoka ya ebato-ba batotina; baäkä nde bato kwa bilɛfu bɔɔmwi.

¹⁴ Yesu loonga la baeki bande mbo— Yalesak’iyo se nda betükä ya bato kama bɔɔmwi, kama bɔɔmwi;

¹⁵ iyo lokelaka ongoma, iyo loyales’iyo yaatotina se.

¹⁶ Inde lɔɔsɔ beila bɔɔmwi la swi imbale, Inde loila baiso likolo, Inde losombola eoka ya yao, Inde loataka bao, limɔ Inde lofaekefa baeki mbo baokasɛlɛ yao oso wa ekuke ya bato.

¹⁷ Iyo lola la batotina lokanelo; la iyo loina twinyo twa yeka ebitikali lau, yao lotumesa bisaka liu la bimbale.

Yesu akuliomökö mbo Masiya

¹⁸ Lise limɔi aäkä Yesu atosombola Mungu, Inde angɛnɛ la baeki bande amamwito, Inde lofel’iyo mbo— ¿Bato batoonga mbo Imi yende ndai?

¹⁹ Iyo lomutoel’Inde mbo— Yoane Bolufi, nde bamɔi mbo Eliya, la basi mbo ɔmɔi wa batɔndɔli ba kwalakwala asokuswa liasi.

²⁰ Inde loonga lau mbo— ¿Nde ino nd’atoonga mbo Imi yende ndai? Petelo lomutola mbo— Masiya wa Mungu.

²¹ Nde Yesu loimak’iyo la Inde loonga lau mbo batakambesa boto angɔmwito loasɔ lona.

²² Inde mbo— Lole loa Wana wa Boto ndooka biale wike la ndofekelomo la biange la kanga la batikasa, la ndoolomo imɔ, la nda lise lia asatɔ ɛtɛmwɛsɔmɔkɔ liasi.

²³ Limɔ Yesu loonga lau batotina mbo— Boto ɛlɛmbɛ mbo atuteke’mi, atafekelak’inde angɛnɛ, atatolaka lieka liande lise la lise la atuteke’mi.

²⁴ Eoka oyatosanga ndoikesa liwawi liande angɛnɛ, atolefesa nde liao, kongo ko oyatolefesa liwawi liande eoka yami, inde nd’atoikesa liao.

²⁵ Boto ɛɔlɔ bitotina ya wenda-bo nde kolefesa liwawi liande angɛnɛ, ambo kosɛɛsɛlɛ, asɔɔlɔ to iye?

²⁶ Boto oyatofekaka’mi la baoi bami ko l’eoka ya sɔni, ambo Wana wa Boto imɔ, efekak’inde imɔ la sɔni eyekayek’Inde nda tala yande la eya Sango wande amamwito la bakitomo batanu.

²⁷ Nde isoonga lanu wewe mbo— Bato bamɔi ebemali eyamaya, batiawëkë konda akɛnɛk’iyo Bɔkɔta wa Mungu.

Eliya la Mɔsɛ loyaongana la Yesu

²⁸ Loäkä nde mbisa ya becho ango ko bonanɛi mbo Yesu lɔɔsɔ Petelo la Yoane la Yakobo, Inde lokɛsɛnɛ lau nda löngo, okasombola omao.

²⁹ La asomboläk’Inde, boyaeli wa bɔmbɔ wande lokinjwa bɔfɔnɔ wasi, la bisinda yande lofufwa kwa ibalibali.

³⁰ Kwaamao bato bambale loongana lande, bako Mɔsɛ la Eliya,

³¹ ebɛnɛlɛ̈kɛ̈ la tala, iyo loonga loaso loa losokwo elokasokwek’Inde nda Yelusaleme.

³² Nde Petelo la ebaäkä lande lowa bolengelenge la asiswak’iyo, iyo loɛnɛ tala yande la bato bambale ebemali lande.

³³ Asɛnyanäkä ebambale osenyana la Yesu, Petelo loonga la Yesu mbo— Bokota, bolau end’iso oyala eyamaya, tosweke kumbo isato, emɔi yaɛ, ɛmɔi ya Mɔsɛ, la ɛmɔi ya Eliya, atialuwäkä baoi ebaongäk’inde.

³⁴ Aongäk’inde ongoma, lifita lolinjak’iyo la aɔtɔ̈k’iyo nda lifita, iyo lowänga;

³⁵ limɔ limiki lookana nda lifita mbo— Oyo ende Wana wami wa losamɔ, okak’Inde.

³⁶ Asiläkä limiki oonga, Yesu lɔɛnɛlɛ ko Inde angɛnɛ. La baeki loyala tau, batiakambesäkä boto angɔmɔi nda bacho bana njasɔ eyɛnɛ̈k’iyo.

Louweso loa wana oyaaka la Olimo Obe

³⁷ Lɛlɛngɔ, asulwäk’iyo se nda löngo, ekuke ya bato wike loyatowana la Yesu.

³⁸ Futuku, boto ɔmɔi wa ekuke loamama mbo— Boekesi, itosombol’Aɛ mbo oticheke wana otolome wami eoka ale wana wami ɔmwitoto,

³⁹ la tɛnɛ, atoundaka bolimo eund’inde, atoamama futuku, atowanj’inde la atokusola fulofulo nda bɔnɔkɔ, angomach’inde sakolo ko asotulung’inde finɛ.

⁴⁰ Imi losombola baeki baɛ mbo bakusoleke boimo, nde batikɔkɔlɛ.

⁴¹ Yesu lomutola mbo— E-fɛtɔ-ye eti la liimeli, esofenyakana nde; ¿Itoumwaka lanu ko mbile yanga, itokɔkɔmɛl’ino konda eni mbile? Eshaka wana waɛ l’ono.

⁴² Kwa ayäk’inde ende Yesu, bolimo obe lokwes’inde se, lowanj’inde finɛ. Nde Yesu loimaka bolimo obe, Inde losäsesa wana, Inde loinola inde ende sango.

⁴³ La batotina lotwa liena eoka ya bofoka l’isosha sha Mungu.

⁴⁴ Nde amwaaläk’iyo yaatotina ebiakeläk’Inde, Yesu loonga la baeki bande mbo— Ɔtɛsɛkɛ nda batoi banu ko ebaoi-ba, mbo Wana wa Boto ewambomoko nda besamba ya bato.

⁴⁵ Kongo ko batialüwäkä litina lia lioi-li, liao loisamel’iyo mbo baluwëke litina la iyo lowänga ndofel’Inde loasɔ loa lioi-li.

⁴⁶ Limɔ baeki loakola ndofenyakana baoi mbo ndai wau kolongela baina.

⁴⁷ Nde aluwäkä Yesu tofenya nda betema yau, Inde lounda wana ɔkɛkɛ, Inde loemes’inde nda fangi yande,

⁴⁸ Inde loonga lau mbo— Oyatonyangela ambo e-wana-yo ko l’eoka ya lina liami, atonyangela nde Imi la oyatonangela’mi, ambo atonyangela nde Inde oyatomäkä Imi; eoka inde wanu yaatoti oyaɔndwi se, ambo ona ale ofi.

⁴⁹ Limɔ Yoane loonga lande mbo— Bɔkɔta, twɛniki oto ɔmɔi oyatokusola belimo ebe nda lina liaɛ, la twaimäk’inde eoka aitotutana lasu.

⁵⁰ Yesu loonga lande mbo— Oimëk’inde, eoka oyaitoiyel’ino, oyo ale wanu.

⁵¹ Aäkä bacho ebakainweke lande nda Use basoya tina, Yesu lokɔkɔmɔ kɔkɛ oila lɔkɛndɔ nda Yelusaleme,

⁵² la Inde lotoma batomomu bamɔi oso wande; la iyo lɔkɛ, iyo lɔɔtɔ nda bokenge wa BaSamalia okakomiel’Inde eingaelo omao.

⁵³ Kongo ko batianyangeläk’Inde omao eoka Yesu losanga okakɛ nda Yelusaleme.

⁵⁴ Limɔ ɛnɛ̈kɛ̈ baeki bande bako Yakobo la Yoane ongoma, iyo mbo— ¿Ngɛnɛ, otisange mbo toteke bösä lioi, bokweke se nda use oyasɛɛsɛlɛs’iyo, kwa akeläk’imɔ ko Eliya?

⁵⁵ Kongo ko Yesu lokikwel’iyo, Inde loim’iyo.

⁵⁶ Limɔ iyo lokakɛ okenge wa boyaeli wasi.

Lioi lia Yesu ende basangiotut’Inde

⁵⁷ Aɛk’iyo la mboka, boto ɔmɔi loonga la Yesu mbo— Itutek’Aɛ l’olo atɔkɛ laɛ.

⁵⁸ Yesu loonga lande mbo— Bɛlɛndɛ bile la baonda, la nɔli bile la bikalingo, nde Wana wa Boto ati ango la elela yoingesa botö se.

⁵⁹ Yesu loonga la boto wasi mbo— Tütaka’mi; nde inde mbo— Ngɛnɛ, tamachaka’mi mbo ikɛkɛ okaomba sango wami.

⁶⁰ Yesu loonga lande mbo— Machaka ebasowa baombakeke ebawi lau, nde aɛ angɛnɛ kɛndɛkɛ okamelekesa mboli ya Bɔkɔta wa Mungu.

⁶¹ La wasi imɔ loonga mbo— Itotüt’Aɛ, Ngɛnɛ, nde tamachaka’mi mbo ikɛokasɛnyana la bofindi wami eyasu.

⁶² Nde Yesu loonga lande mbo— Boto eunda wɛmbɛ nda osamba, nde kota iyɛɛ, angoengana nda Bokota wa Mungu.