Luka 8 - Le Nouveau Testament in Kele (Lokele) 1958

Ebakɛndɛnëkë la Yesu nda kɛndɔ yande

¹ Mbisa ya mbile ɛmɔi, Yesu lotandekela yese, bokenge la bokenge l’ebofi l’ebɔkɛkɛ olo anangokoläka la aluwesäkä bato Mboli Ilau ya Bɔkɔta wa Mungu; la eba liu la ambale lɔkɛsɛnɛ lande amamwito

² la batomali bamɔi ebuwesäkä Yesu ouwes’iyo la belimo ebe la kambo, batomali bako— Maliya oyatangomu wa Mangandala oyasokolomökö belimo ebe bosambale,

³ la Yoana wali wa Chusa ako Bonyafala wa Bɔkɔta Helodi, la Susana la batomali basi wike ebasungäkä iyo ko la biengo (la bieto) yau angɛnɛ.

Bombila wa Bɔlɔi

⁴ Bokamu wa bato lolingelaka Yesu amamwito l’ebaɛ̈kɛ̈ ende Inde ba bekenge bitotina la Inde loekes’iyo ko la bombila-bo, mbo—

⁵ Bɔlɔi lɔkɛ okalɔɔ koto, alɔɔ̈kɔ̈ inde ongoma, koto bimɔi lokwa nda mboka la yao yamatelomökö limɔ nɔli lola yao.

⁶ Bimɔi lokwa nda batalɛ la kwa ɔtɔkɔ yao, lisasaya yao lobɛɛkɛlɛ fɛɛ eoka angwɛnɛ ɛfɔfya.

⁷ Bimɔi lokwa nda kɛ̈kɛ̈, la kɛ̈kɛ̈ lɔɔ̈tɔ̈ amamwito la yao, la kɛ̈kɛ̈ lɔnyɛlɛ koto.

⁸ Nde bimɔi lokwa nda nyɛlɛ ilau, yao lɔɔ̈tɔ̈, yao lota tuma, bimɔi kama liu. Aongäk’Inde wa, Inde loamama mbo— Oyale la batoi booka, okeke.

⁹ La baeki lofel’Inde litina lia bombila-bo.

¹⁰ Inde mbo— End’ino kongo njasɔ ebisoisomo ya Bɔkɔta wa Mungu, yao koisolomo; kongo ende bato basi ambo bembila kongo, eoka mbo batɔɛnɛ liɛnɛ̈lɛ̈ la batoka ko liokɛ̈lä; angoluwa litina.

¹¹ Kongo ko litina lia bombila lile mbo— Koto bile lioi lia Mungu.

¹² Ebakwäkä nda mboka, bende ebokaka lioi, limɔ Satana koya oyaɔnɔkɔlɔ lioi nda betema yau mbo bataimela la mbo batauwesomo.

¹³ Ebakwäkä nda batälɛ bende iyo ebokäkä lioi, iyo loaola liao la limɛngɔ, kongo ko bati la biili limɔ batoimela ko mbile bimɔi, nde atoya lisoshela limɔ batokwa se.

¹⁴ Ebakwäkä nda kɛ̈kɛ̈ bende iyo ebokäkä lioi nde atɔkɛ iyo eyau, batonyɛɛkɛlɔmɔ la bifembi la bieto la bamɛngɔ ya wenda-bo limɔ koto angota tuma tooku.

¹⁵ Nde ebakwäkä nda nyɛlɛ ilau, bende iyo ebokäkä lioi la botema ɔmwito wa bolau, la batotingana la liao la batota tuma ko la likɔkɔmɛlɛ.

¹⁶ Atoanesa oto paka, aitolinja yao la ɛɛngɔ; aitoisa yao ose ya tange, nde inde kosɛlɛ yao nda yɛnɛsɛlɔ mbo ebatɔɔtɔ ndakɔ bɛnɛkɛ liameli lia paka.

¹⁷ Angɔɛnɛ loasɔ loisami sakolo ko loao kɔɛnɛlɛ swa, angɔɛnɛ loasɔ loa wisakumbo, sakolo ko loao koisolomo mbo loluwaneke fololo.

¹⁸ Eokao tinganaka ani atook’ino, eoka end’inde oyale la yeka, efomoko nde yasi; nde oyati la yeka, yao eyetangi inde mbo asɔsɛlɛ, yao ina kɔɔnɔkɔlɔmɔ end’inde.

¹⁹ Limɔ nyango wande la bitungani yande loya end’Inde nde batiakɔkɔlɔ̈kɔ̈ oyatowana lande eoka ya ekuke ya bato.

²⁰ Nde bakambesäk’Inde mbo— Nyango waɛ la bitungani yaɛ baemakali lousa la balɛmbi ndɔɛnɛ Aɛ.

²¹ La inde lomutoel’iyo mbo— Nyango wami la bitungani yami bende ko iyo ebatooka lioi lia Mungu la ebatolitesa liao.

Yesu lɔɔngɛsɛ lomba nda Eliya

²² Lise limɔi Inde lokwa nda watɔ amamwito la baeki bande, la Inde loonga lau mbo— Tolekeke nda boili wasi wa eliya. Iyo loilia owale,

²³ nde aɛk’iyo, Yesu lokwa ilɔ, lomba lofi lokwaka nda eliya la watɔ loakola otuma la balia la basiäkä oliya.

²⁴ Iyo loyasisɔl’Inde, iyo mbo— Bokota, Bokota, tososɛɛsɛlɛ. Limɔ Inde loemala, Inde loimaka lomba loa lofofo la batutu ba balia la bao lotemba tembelele, lomba lolatema late.

²⁵ Inde loonga lau mbo— ¿Liimeli lianu anima? Iyo lowänga finɛ, iyo lomwaala ani iyo loongana mbo— ¿Ende to ndai-yo, eoka atoima ngomba la balia, la bao kolites’Inde?

Boto wa Bolimo Bobe

²⁶ Baiyäkä nda yese ya BaKelasene eyele owale wa eliya ya Ngalilai.

²⁷ Asaowäkä Yesu nda boili, oto ɔmɔi wa bokenge ona oyaɔtɛlɔmɔ̈kɔ la belimo ebe loyatowana lande; ko mbile yumwa atiawatäkä bisinda la inde angoyalaka nda ndakɔ, kangä nda fowa biko sai.

²⁸ Nde ɛnɛkɛ inde wɛnɛ Yesu, inde loamama, inde lokwa se oso wande, inde loonga la limiki lifi mbo— ¿Iso laɛ twende la loni loaso, Aɛ Yesu wana wa Mungu Oyalongeli? Itoomb’Aɛ mbo wokesëke’mi bïale.

²⁹ Eokao Yesu loonga la bolimo obe mbo akusweke ende boto, eoka bolimo obe loundes’inde baunda wike kwa atingakanomoko inde la bato ebakandakäk’inde la bɛnyɔlɔlɔ la bakala, nde inde lounyaka bakala, inde lokɛsɔmɔkɔ la bolimo konda liɔmbɛlɛ.

³⁰ Yesu lofel’inde mbo— ¿Lina liaɛ liko ndai? Inde mbo— Mbo Legione, litina mbo— Botükä, eoka botükä wa belimo bosɔɔtɛl’inde;

³¹ la yao losombola Yesu finɛ mbo atatel’iyo ekela yokɛ nda liyondo eliti la tungä.

³² Liyasa lifi lia ndei liaäkä nda löngo, bialäkä bieka ina la belimo losombol’Inde mbo akuliek’iyo mbo baɔtɛlɛkɛ ndei ina.

³³ Inde lokuliel’iyo, la belimo ibe lokuswela boto, yao lɔɔtɛlɛ ndei la liyasa lia ndei lokwa mangu kola löngo konda eliya, yao lowaka nda balia.

³⁴ Limɔ ɛnɛkɛ betingani ya ndei lona elokelomu, iyo lokwa otili, iyo lɔkɛ okakambesa mboli nda bikenge la nda bilanga,

³⁵ la bato ana loya oyɛnɛ eloakelomökö; ayäk’iyo ende Yesu, iyo loosha boto oyasokolomökö belimo ani ayali se nda bakolo ba Yesu, awati bisinda, l’ani ati’mɔ la loseka; iyo lowänga finɛ.

³⁶ La bato ebɛnɛ̈kɛ̈ imɔ loaso, lokambesa bato ani auwesomökö boto oyaɔtɛlɔmɔ̈kɔ̈ la belimo.

³⁷ Lamao bato batotina ba yese ya BaKelasene lofel’Inde mbo asokweke ende iyo, eoka bakuwanelomökö la bɔwa finɛ. Limɔ akwäkä Yesu nda watɔ, Inde loinywa liasi.

³⁸ Kongo ko boto oyakusolomökö belimo, inde losombola Yesu mbo ayaleke lande, kongo ko Yesu loinol’inde, Inde mbo—

³⁹ Inwaka nda ndakɔ yaɛ, kambesaka bato ebifi ebisokeela Mungu okeel’aɛ. Inde lɔkɛ, inde lokanangokole nda bokenge bototina loasɔ lofi eloakeeläkä Yesu okeel’inde.

Wana otomali wa Yailo

⁴⁰ Ainwäkä Yesu, ekuke ya bato lonyangel’Inde la limɛngɔ eoka batotina loumbakel’Inde.

⁴¹ Lamao boto ɔmɔi loya ako Yailo, inde ayaläkä bokumi wa ɛsɔngɔmɛlɔ, inde loswa balui se oso wa Yesu, inde losombola Inde mbo aɛkɛ nda ndakɔ yande,

⁴² eoka mbo aäkä la wana ɔmwitoto otomali oyale tina lowa. Aäkä Yesu atɔkɛ la mboka, bikuke ya bato lowamakana lande,

⁴³ la botomali ɔmɔi oyayaläkä la lokambo loa likila ko miaka liu la imbale la oyasilesäkä bieto yande bitotina ndofaefa eba kanga nde angokɔkɔlɔ ndouwesomo lau;

⁴⁴ inde loya ombisa, inde lomata lisɛmbɛlɛ lia esinda ya Yesu, lisasaya likila loöma tau.

⁴⁵ Yesu mbo— ¿Ndai nd’amati Imi? Anganyäk’iyo yaatotina, Petelo mbo— Bɔkɔta, bikuke ya bato bisolingel’Aɛ la basowamak’Aɛ.

⁴⁶ Kongo ko Yesu mbo— Boto nd’amatiki’mi eoka iluwi nde mbo bofoka bokuswiki nde ende’mi.

⁴⁷ Nde ɛnɛ̈kɛ̈ botamali mbo asoisolomo, inde loya, inde lonyangaka finɛ, inde lokwa se oso wa Yesu, inde lokambesa bato batotina fololo, litina eliamatäk’inde omata Yesu, l’ani asäsesomökö inde lisasaya.

⁴⁸ Limɔ Yesu loonga lande mbo— Wana otomali, liimeli liaɛ lisouwes’aɛ, kɛndɛkɛ la lilatemi.

⁴⁹ Atitaɛiläk’Inde ndoonga, boto loya oyasokwäkä nde nda ndakɔ ya bokumi wa ɛsɔngɔmɛlɔ, inde mbo— Wana otomali waɛ asowa, ookesëke Boekesi imɔ likati.

⁵⁰ Kongo ko okäkä Yesu ongoma, Inde mbo— Owangëke, imelaka kongo limɔ euwesomoko nde.

⁵¹ Iyäk’Inde nda ndakɔ, atiakuliäkä oto angɔmwito mbo aɔtɛkɛ amamwito lande, sakolo ko Petelo la Yoane, la Yakobo, la sango wa wana la nyango wande.

⁵² Batotina baleeläk’inde, iyo loomakaka bekükü nda etondo, kongo ko Yesu loonga mbo— Okelëke etondo ani, atikwele se, aingali ilɔ.

⁵³ Limɔ iyo losɛkɛlɛ Inde finɛ, baluwi nde mbo akweli nde se.

⁵⁴ Nde Inde lounda wana la bosamba, Inde loamama mbo— Wana, emalaka.

⁵⁵ Bolimo wande loinwa end’inde, inde loemala lisasaya, la Yesu loonga lau mbo bafek’inde yeka yola.

⁵⁶ La ebaoti wana otomali losisimwa, nde Yesu lotel’iyo ekela mbo batakambesa oto angɔmwito lona elokelomuku.