Luka 3 - Le Nouveau Testament in Kele (Lokele) 1958

Likuwa lia Yoane Bolufi

¹ Nda mwaka wa liu la bɔɔmwi w’isosha sha Tibelia Kaisala wa Loma, l’ani Pontio Pilato aäkä Komanda wa Yudea, la Helodi aäkä Komanda wa Ngalilai, la etungani yande ako Filipo aäkä Komanda wa Itulaya la Tulakoniti, la Lusania aäkä Komanda wa Abilene,

² l’ani Ana la Kayafa baäkä bakanga ebaeti, limɔ lioi lia Mungu liayäkä ende Yoane, wana wa Sekalaya, nda liɔmbɛlɛ.

³ Limɔ Yoane lɔkɛ nda yese etotina ya Yaladene, okanangokole lolufio loa likalangani ko la lɔmɛsɛlɔmɔ loa njasɔ ibe,

⁴ kwa yatomökö nda lokasa loa baoi ba Yesaya ewa bɔtɔndɔli, mbo— Limiki litoamama nda liɔmbɛlɛ mbo— Komyaka mboka ya Ngɛnɛ, Longamesaka biëli yande,

⁵ Sɛlɛlɛ bitotina bitotumesomoko la nyɛlɛ, Föngo bitotina la bikole bitowɛlɔkɔmɔ se kwa loanyake, Mboka ebilingakami bitolongamesomo, Toloto twa twakotwako totolalyomo.

⁶ Balomboki batɔɛnɛ liuwesi lia Mungu.

⁷ Eokao Yoane aongakäkä la bikuke ya bato ebayäkä end’inde ndoyalufiomo lande, mbo— Ino lioti lia njɔ; ¿Ndai asokambes’ino mbo bokweke otili nda efango eyekayeke?

⁸ Eokao biyaelo yanu bienganeke la likalangani lianu. Wakolëke ndoonga nda betema yanu mbo— Abalayama ende ngau wasu, eoka isoonga lanu mbo— Mungu asokɔkɔlɔ ko la batalɛ-ba kongo ndoemesela Abalayama bana.

⁹ Kwani shondo sisotomo oko nda biili ya tosandu la isandu la isandu esiitoota tuma tolau, shao kotindomo, shao koumbolomo nda bösä.

¹⁰ Bato ba bikuke bafeläk’inde mbo— ¿Tokeleke to moni?

¹¹ Inde lomutoel’iyo mbo— Boto oyayali la bisinda imbale ya likolo, afek’inde oyati la esinda ɛmɔi ya likolo, la boto oyayali la bieka yola, akaeleke inde oyati la yao.

¹² Lamao basombesi imɔ loya oyalufiomo, iyo loonga mbo— ¿Boekesi, tokeleke moni?

¹³ Inde loonga to lau, mbo— Wɔnɔkɔlɛ̈kɛ bieto yoetela loketi lona elosotinyomo bɔsɔmbi.

¹⁴ La basilikani imɔ lofel’inde mbo— ¿La iso imɔ, tokeleke moni? Inde loonga lau mbo— Owangatalesëke oto la lisusumani, owanjakalëke oto mbo ɔsɛkɛ bieto yande, laka ko bieto ya likuwa lianu la wɛlï.

¹⁵ Bato baenyakeläkä la tɔɛli la batakanäkä fee nda betema loasɔ loa Yoane, mbo eluwa atayala Masiya kwa ndai,

¹⁶ eokao Yoane lomutokolak’iyo mbo— Imi nd’asolufia ino la balia, kongo ko oyatoya liili liami nd’asoeta’mi la bofoka; itiengane ndofomo isosha shofaikola ikulu sha tokwaka twande; Inde elufiaka ino la Bolimo Botanu la bösä.

¹⁷ Lüngu loande lole nda bosamba wande mbo afɛfɛkɛ bofonga; atɔɔmbɔ ɛfɛfyɛlɔ tanelele, atosɔnja befonga nda ekukyelo yande, kongo ko atofechaka mboso nda bösä wa loiloi ebotilatiamëkë.

¹⁸ Ko la tonango wike la baoi basi imɔ, inde lonangoela bato Mboli Ilau.

¹⁹ Kongo ko Bɔkɔta Helodi oyafomökö liengo la Yoane loasɔ loa Helodia, wali wa boloo wande, la loasɔ loa bebe bitotina ebiakelak’inde;

²⁰ atalieläkä nde eloeta loko mbo akandäkä Yoane nda bɔnyɔlɔlɔ.

Lolufiomo loa Yesu

²¹ Asiläkä bato batotina ndolufiomo, la alufiomökö Yesu imɔ, aäkä Inde atosombola, kwaamao use loliolomo,

²² la Bolimo Botanu loaa se ende Inde la bɔfɔɔnɔ kwa ewa ekükü, la limiki lookana nda use mbo— Aɛ wende Wana bosamomu wami, Aɛ nd’atoomalesa’mi finɛ.

²³ Akoläkä Yesu angɛnɛ ndoekekesa bato, ayaläkä la miaka kama isatɔ, batangäk’Inde mbo wana wa Yosefa,

²⁴ wa Elia, wa Matita, wa Lewi, wa Melekia, wa Yanai, wa Yosefa,

²⁵ wa Matatia, wa Amosa, wa Nahuma, wa Asalia, wa Nanga,

²⁶ wa Mata, wa Matatia, wa Simei, wa Yoseke,

²⁷ wa Yuda, wa Yoana, wa Lesa, wa Selubabela, wa Salatiele,

²⁸ wa Nelia, wa Meleka, wa Adi, wa Kosama, wa Elemodada,

²⁹ wa Eli, wa Yosua, wa Elieseke, wa Yolima, wa Matata,

³⁰ wa Lewi, wa Simeona, wa Yuda, wa Yosefa, wa Yoname,

³¹ wa Eliakima, wa Melea, wa Matata, wa Natana,

³² wa Dawidi, wa Yese, wa Obede, wa Boasa, wa Salamona,

³³ wa Nasona, wa Aminadaba, wa Adamini, wa Alana, wa Eselone, wa Pelese,

³⁴ wa Yuda, wa Yakobo, wa Yisaka, wa Abalayama, wa Tela, wa Nayolo,

³⁵ wa Selungu, wa Leu, wa Pelenge, wa Ebele,

³⁶ wa Sela, wa Kenana, wa Alufasada, wa Sheme, wa Noa,

³⁷ wa Lemeke, wa Metusala, wa Enoka, wa Yalete, wa Mahalalele,

³⁸ wa Kenana, wa Sete, wa Adamu, wa Mungu.