Luka 24 - Le Nouveau Testament in Kele (Lokele) 1958

Litɛmwi lia Yesu nda Liwa

¹ Limɔ nda lise lia osooso, la nɔngɔnɔngɔ iyo loya nda losai, iyo loesha imɔ mwemwe la baningo ebitonji nd’iyo;

² iyo loosha litalɛ lisoundukolomo nda losai.

³ Iyo lɔɔtɔ atiteni ya losai nde batiaoshäkä bolyo wa Ngɛnɛ Yesu.

⁴ Aäkä iyo batoeumɛlɛ la loasɔ-lo, futuku iyo lɔɛnɛ batolome bambale bemali tina lau la bawati bisinda ya ngɛlingɛli,

⁵ la batomali lowangaka finɛ; atuliäkä biɔmbɔ se ndoticha nyɛlɛ, batolome loonga lau mbo— ¿Monito otoluka ewa liwawi sisi ya ebawi?

⁶ At’imɔ eyamaya, asotɛmwa; enyelaka kwa aongäk’Inde lanu ani akoyali nda Ngalilai,

⁷ mbo— Wana wa Boto ewambomoko nda besamba ya bato babe, eolomoko nda lieka, la mbisa ya bacho basatɔ etɛmwɛkɛ liasi.

⁸ Limɔ iyo loenyela baoi ebaongäk’Inde,

⁹ la iyo losokwa nda losai, iyo loinwa okenge okakambesa eba liu la ɔmɔi la basi batotina, enjasɔ-bi bitotina.

¹⁰ Batomali baäkä nde Malia wa Mangandala, la Yoana, la Malia nyango wa Yakobo, la batomali basi amamwito lau, iyo lokambesa batomomu bitotina-bi;

¹¹ baoi-ba baaka nda batoi bau kwa beongaonga la batiaimelaka batomali. (

¹² Kongo ko Petelo loemala, inde lofata mangu konda losai, inde loinama se, inde lɔɛnɛ bisinda bifufu biyali oko yao angɛnɛ wawa; inde lokuswa okakɛ eyande ani atomwaala njasɔ ebiakelomökö.)

Yesu lɔɛnɛlɛ ende bambale ba Emau

¹³ Nda lise-ao bambale bau bakɛndɛ̈kɛ̈ nda bokenge boko Emau ebole esika la Yelusaleme ko kilomɛta liu la ɛmɔi.

¹⁴ Iyo loonganaka loasɔ loa bitotina bina ebiakelomökö,

¹⁵ la aonganäk’iyo ndofelakana litina, Yesu angɛnɛ looshana lau, Inde lɔkɛsɛnɛ lau.

¹⁶ Nde baiso bau lokufesomo mbo bataluw’Inde.

¹⁷ Inde loonga to lau mbo— ¿Bani baoi ebatoongakanak’ino ani atoeta ino la mboka? Iyo losikama la yɔmbɔ yuno,

¹⁸ la ɔmɔi wau, lina liande liko Keleofa, inde lomutola lande mbo— ¿Ko Aɛ kongo w’eba fɛtɛti nda Yelusaleme oyatiluwe njasɔ ebisokelakomo ina la ebacho-ba?

¹⁹ Yesu mbo— ¿Bini to njasɔ? Iyo mbo— Eya Yesu wa Nasaleta oyasɔɛnɛlɛ Bɔtɔndɔli wa bofoka nda yao ebisokelak’Inde la ebisoongak’Inde imɔ nda baiso ba Mungu la eba bato lisanga;

²⁰ la kanga ebieti la biange yasu lɔkɛs’Inde nda liwa la iyo lool’Inde nda lieka;

²¹ la tokɛsiki nde iyɛli mbo Inde nd’atoendola BaIsalaele, kongo ko yao bisoeta la kwani louse lole lise lia asatɔ mbisa ya njasɔ-bi.

²² Nde to loasɔ lɔmɔi lole mbo batomali basu bamɔi lomwaales’iso eoka aɛ̈kɛ̈ iyo la nɔngɔnɔngɔ nda losai,

²³ batiɛnɛ̈kɛ̈ bolyo wande nde iyo loya oyakambes’iso mbo bɛnɛkɛ oko bakitomo ebaongaka lau mbo akoyali la liwawi,

²⁴ limɔ batolome bamɔi basu, iyo lɔkɛ konda losai, iyo lɔɛnɛ imɔ ongoma kwa aongaka batomali, kongo ko batiɛnɛkɛ to Inde angɛnɛ.

²⁵ Limɔ Inde ako Yesu loonga lau mbo— Ino ba elemolemo la botembu woimelaka baoi batotina ebaongäkä betɔndɔli;

²⁶ ¿Lotiaaka ende Masiya mbo okeke etokange-to limɔ ndɔtɔ nda tala yande?

²⁷ Limɔ Yesu loakola ko la lokasa loa Mɔsɛ la kasa ya bɛtɔndɔli yasi, Inde losanoel’iyo baoi batotina ebatomökö loasɔ loande angɛnɛ.

²⁸ Asishanäk’iyo tina la okenge olo atɔkɛ lau, Inde asiakoetaka nde iyo

²⁹ lolɔmbɔkɔl’Inde, iyo mbo— Tikalaka lasu, likɔlɔse lisoya to tina la löwa losɔkɛ. Limɔ Inde lɔtɔ lau ndakɔ, Inde lotikala lau.

³⁰ Ayaläk’Inde se ndola bieka amamwito lau, Inde lɔɔsɔ lituma, Inde lofa Mungu kelekëlë, Inde louna liao, limɔ Inde lofaef’iyo liao,

³¹ la baiso bau loliolomo, iyo lolembeel’Inde, limɔ Inde angɔɛnɛlɛ’imɔ nda baiso bau.

³² Iyo loongana mbo— ¿Betema yasu betiyaimweke atiteni yasu ani Inde atoonganaka lasu nda mboka, l’ani alioelak’iso litina lia baoi ba lokasa loa Mungu?

³³ Nda mbile-ao, iyo loemala, iyo loinwa nda Yelusaleme, omao iyo loosha eba liu la ɔmɔi basɔngɔmɔ̈kɔ̈ etunda amamwito la basi, iyo ana loonga l’eba bambale mbo—

³⁴ Ngɛnɛ asɔtɛmwa wewe la asɔɛnɛlɛ ende Simona.

³⁵ Limɔ ebambale lokambes’iyo atotina ebiakelomökö la mboka l’ani asolembeel’iyo Yesu ko la bounyeli lia lituma.

Yesu lɔɛnɛlɛ ende baeki bande

³⁶ Aongäk’iyo baoi-ba, Yesu angɛnɛ loemala sisi yau, Inde loonga lau mbo— Lilatemi end’ino!

³⁷ Nde iyo losisimwaka, iyo lowanga finɛ, iyo lotanga mbo basɔɛnɛ bolimo.

³⁸ Inde loonga lau mbo— ¿Monito osowa tolöi? ¿Monito bototanaka fee nda betema yanu?

³⁹ Tichaka bangasa bami la batindi bami mbo yende Imi angɛnɛ; matakaka’mi la ɛnɛkɛ, mbo bolimo ati la winyo la tokwa ebiyali lami kwa atɔɛnɛ ino.

⁴⁰ Aongäk’Inde ongoma, Inde lotamb’iyo bangasa bande la batindi bande.

⁴¹ Aäk’iyo batitaimeläkä kɔni eoka ya limɛngɔ la asisimwäk’iyo, limɔ Inde loonga lau mbo— ¿Wende la yeka yola eyamaya?

⁴² Lamao iyo lof’Inde botüku wa swi botumbe,

⁴³ la Inde lɔɔsɔ, Inde lola oso wa baiso bau.

Yesu losanoela baeki baoi ba Lokasa loa Mungu

⁴⁴ Inde loonga lau mbo— Baoi-ba bami ebaongäkä’mi lanu, eyayaeläkä’mi amamwito lanu, bende mbo losoengana mbo bitotina ina bikɔchɔmɔkɔ kɔkɛ, biko eyatomökö loasɔ loami nda Bikela ya Mɔsɛ la nda kasa ya batɔndɔli, la nda Bɛɛlɛ ya BaYuda.

⁴⁵ Limɔ Inde loliola baenyeli bau mbo baluweke litina lia kasa ya Mungu;

⁴⁶ Inde loonga lau mbo— Losotomo nda lokasa ongoma, mbo loengani nde ende Masiya mbo okeke tokange la mbo atɛmwɛkɛ nda liwa nda bocho wa isatɔ,

⁴⁷ la mbo likalangani la limɛsɛli lia njasɔ ibe binangolomoko nda lina liande ende bato ba biese bitotina. Akakolek’ino nda Yelusaleme,

⁴⁹ ino wende ebasɔɛnɛ njasɔ-bi la Imi nd’atotomel’ino lisakä elia Sango wami end’ino; ino nd’atotikala nda bokenge-bo konda akawatesomoko ino la bofoka ebotosokwa nda Use.

⁵⁰ Yesu lɔkɛsɛnɛ imɔ lau ko tina la Betania, la Inde loilaka besamba yande, Inde loongel’iyo baoi ba lifoti,

⁵¹ la aongäk’Inde ongoma, Inde losenyana lanu, Inde loilomo nda Use.

⁵² Iyo lotulamel’Inde se, iyo loinwa nda Yelusaleme la limɛngɔ fuu,

⁵³ iyo lokayalake nda ndakɔ ya Mungu ani bainakelak’Inde.