Luka 23 - Le Nouveau Testament in Kele (Lokele) 1958

Yesu la Pilato

¹ Lamao ikumbɛ sitotina loemala, iyo lɔkɛsɛnɛ lande ende Pilato.

² Iyo loakola ndowanjel’Inde, iyo mbo— Tosoosha eboto-yo ani atoengolesa bato ba tukela yasu; atofekel’iyo ndofa bɔsɔmbɔ ende Kaisala la atoonga mbo Inde angɛnɛ ale Masiya ako Bɔkɔta.

³ Pilato lofel’Inde mbo— ¿Aɛ wende to Bɔkɔta wa BaYuda? Yesu lomutoel’inde mbo— Aɛ nd’aongi ongoma.

⁴ Pilato loonga la kanga ebieti la bikuke ya bato mbo— Itiɛnɛ litwanelo ango limɔi ende eboto-yo.

⁵ Kongo ko iyo lofëfë ndoonga mbo— Atofɔɔkɔlɔ bato la liekesi liande la nda Yudea, konda Ngalilai ko eyamaya.

⁶ Okäkä Pilato ebaoi-ba, inde lofela kwa mbo boto-yo ayali nde wa Ngalilai.

⁷ Aluwäk’inde mbo Yesu ale wa yakakaelo ya Helodi, inde lotom’Inde ende Helodi oyayaläkä imɔ nda Yelusaleme nda bacho bana.

Yesu la Helodi

⁸ Ɛnɛkɛ Helodi wɛnɛ Yesu, inde loomala finɛ, eoka ko la yumwa, inde looka yɛmɛ yɔɛnɛ Yesu loasɔ loa lokuku elook’inde; inde lɔlɛmbɛ imɔ ndwɛnɛ esisho eyekakeleke Yesu.

⁹ Inde lofelaka to Yesu felo wike kongo ko atimutoel’inde lioi ango limɔi.

¹⁰ Kanga ebieti la baekesi ba Bikela loemakala ina, iyo lowanjakel’Inde la bolengi.

¹¹ La Helodi la basilikani bande losɛɔkɔl’Inde, iyo lomuchamucha Inde, iyo lowates’Inde bisinda ya bɔfɛkɔ finɛ, limɔ iyo loinol’Inde ende Pilato liasi.

¹² La lise-ao Pilato la Helodi losukana basaɔ, eoka oso iyo loiyelanaka.

BaYuda la Pilato lofa Yesu se

¹³ Lamao Pilato losɔngɔmɛsɛ kanga ebieti la betoli oso la bato imɔ

¹⁴ inde loonga lau, mbo— Oeshiki eboto-yo oso wami oyawanjel’Inde mbo atoengolesa bato, tɛnɛ ngo, isokɔtɔl’Inde oso wanu, itiɛnɛ litwanelo ango limɔi ende boto-yo nda njasɔ eyawanjelak’ino Inde;

¹⁵ imɔ ko la Helodi ongoma eoka asoinol’Inde end’iso. Tɛnɛ ngo, angwɛnɛ loaso ango lɔmɔi loengana liwa lokelomu lande.

¹⁶ Eokao, itokuch’Inde, limɔ itofaikol’Inde.

¹⁷ Nda mbile ya Elambɔ to, inde loyala la eyaelo yofaikoel’iyo ɔmɔi wa bɔnyɔlɔlɔ.

¹⁸ Bato batotina loanjanja la limiki limwito mbo— Sokola eboto-yo; faikoelak’iso Balaba!

¹⁹ Balaba atomökö nda bɔnyɔlɔlɔ eoka ya bosho la lioli lia bato.

²⁰ Eokao Pilato loonga la bato liasi eoka alɛmbɛkɛ ndofaikola Yesu.

²¹ Kongo ko bato loanjanja mbo— Olak’Inde nda lieka, Olaka!

²² Inde lofel’iyo to lifela lia asatɔ, mbo— ¿Eoka iye to; boni obe ebosokel’Inde? Itiɛnɛ Inde la loasɔ ango lɔmɔi loengana la liwa; eokao itokuch’Inde, limɔ itofaikol’Inde.

²³ Nde iyo loanjanja la bofiili la bamiki bafi; iyo lofelak’inde mbo aolomoko nda lieka. Bamiki bau la eba kanga ebieti lolongela bofoka bofi.

²⁴ Pilato loluwes’iyo likomyi mbo lokelomoko kwa asosang’iyo.

²⁵ Inde lofaikoel’iyo ona oyafel’iyo ako boto wa bosho la lioli la boto oyatomökö nda bɔnyɔlɔlɔ, kongo ko inde lofaef’iyo Yesu mbo bakeelek’Inde kwa asosang’iyo.

Liwa nda lieka

²⁶ Akɛndɛ̈k’iyo la Yesu, nda mboka iyo loundesa Simona oto wa Kulene ani atosekwa nda bilanga, iyo lotalia lieka nda batotoko bande mbo atoleke liao ombisa ya Yesu.

²⁷ Ekuke efi ya bato lotuta Inde, la batomali loomaka beküku la iyo loleel’Inde.

²⁸ Kongo ko Yesu lokikwel’iyo, Inde mbo— Baseka ba Yelusaleme olelëke’mi, leelak’ino angɛnɛ la bana banu.

²⁹ Tɛnɛngo, becho belayaka ebelaongaka la bato mbo— Bende la limɛngɔ bako eba bikomba la sɔlɔ ebitiote bana, la baɛlɛ ebatimwese bana.

³⁰ Limɔ batoakola ndoonga la föngo mbo— Wɛlɛkɛmɛkɛ se olikolo liasu, la nda tolöngolöngo mbo— Linjakak’iso.

³¹ Eya to mbo bekela njasɔ-bi nda isandu shesi, bini bikakelomoko to nda eshomi?

³² Bato basi bambale, bato babe finɛ, bakɛsɔmɔkɔ imɔ amamwito lande ndokaolomo.

³³ Ayäk’iyo nda elela eyatangomökö mbo Longö, iyo loanyemesa Yesu nda lieka, l’ebato babe lisanga, ɔmɔi nda osamba wa olome la oyɔmɔi nda osamba wa wali.

³⁴ Limɔ Yesu loonga mbo— Sango, mɛsɛlɛk’iyo, eoka batiluwe kwa atokel’iyo. Iyo lokaana bisinda yande ko ndota ngongo nda likaɔ.

³⁵ Bato loemesana ko ndotichaka, la betoli oso imɔ lomuchamuchel’Inde, mbo— Auwekesäkä basi, auweseke Inde angɛnɛ to, eya mbo ende Masiya, Boaomu wa Mungu.

³⁶ Basilikani imɔ losungakel’Inde ani bayäkä end’Inde oyatamb’Inde bänä ba ngai amweke,

³⁷ iyo mbo— Boyala Bɔkɔta wa BaYuda, uwesaka to Aɛ angɛnɛ.

³⁸ Lionga liäkä imɔ olikolo lia botö wande elisɔnɔmu mbo— Oyo ende Bɔkɔta wa BaYuda.

³⁹ Ɔmɔi wa ebabe ebakakemäkä nda lieka, inde losungakel’Inde, mbo— ¿Aɛ, oti to Masiya? Uwesaka l’Aɛ angɛnɛ lasu lisanga!

⁴⁰ Kongo ko oyɔmɔi lof’inde liɛngɔ mbo— ¿Aɛ otiwange ango Mungu, ani aɛ imɔ okowa la likuchi-ao?

⁴¹ Iso nd’afomu se la litina, eoka tosokuchomo litina lia batwanelo basu, nde eboto-yo atikele shasɔ ango simɔi sibe.

⁴² Ona loonga mbo— Yesu, enyelaka’mi ani akayeke Aɛ nda Bɔkɔta waɛ.

⁴³ La Yesu loonga lande mbo— Wewe, isoonga laɛ mbo louse-lo otoyala lami nda Use (Paladiso).

⁴⁴ Ayäkä ifitika tina, lilima lokwa nda yese etotina konda lilongolongo,

⁴⁵ la löwa lotufaka’la esinda (yolinjaka Euchelo) ya Ndakɔ ya Mungu losalya yaki imbale.

⁴⁶ Yesu loamama la limiki lifi, Inde mbo— Sango, isota bolimo wami nda besamba yaɛ. Limɔ aongäk’Inde ongoma, Inde lokusola luli nda liwa.

⁴⁷ Ɛnɛ̈kɛ̈ to Komanda wa basilikani eloakelomökö, inde loinela Mungu, inde mbo— Eingo, eboto-yo ayali nde wa liengani.

⁴⁸ Bato batotina imɔ ba ekuke ebasɔngɔmɔ̈kɔ̈ okatichaka ilombo, ɛnɛ̈kɛ̈ iyo ebikelomu, iyo loinwa okenge ani batoomaka bekükü.

⁴⁹ Nde basaɔ bande la batomali ebatutäk’Inde konda Ngalilai, iyo loɛnɛ bitotina-bi ani bemaläkä esika.

Liombomu lia Yesu

⁵⁰ Aäkä omao boto, lina liande liko Yosefa, ayaläkä wa ikumbɛ, boto olau wa liengani oyatiakuliäkä likeli la kuko ya ikumbɛ; aäkä wa bokenge wa BaYuda, boko Alimatayo, awɛlɛ̈kɛ̈ loyo loa Bɔkɔta wa Mungu baiso.

⁵² Boto-yo lɔkɛ ende Pilato okaömba bolyo wa Yesu;

⁵³ inde losulola wao se, inde lolingela wao la bisinda, limɔ inde loingesa wao nda losai eloafuwomökö nda batalɛ, olo angotaömbomo kɔni boto.

⁵⁴ Lise lina liäkä elia litonji lia Elambɔ la Yenga ya Mungu esamboya.

⁵⁵ Limɔ batomali ebasokwäkä nda Ngalilai amamwito la Yesu, iyo lotuta mbisa ya Yosefa, iyo lɔɛnɛ losai la boömbeli wa bolyo wande omao.

⁵⁶ Limɔ iyo loinwa okenge, iyo lotonja yeka ya shokana kwa mwemwe la baningo ba bolyo. Nde la lise lia Yenga, iyo loɛuma kwa atäkä Bikela.