Luka 22 - Le Nouveau Testament in Kele (Lokele) 1958

Yenga ya Elambɔ ya BaYuda

¹ Elambɔ ya lituma yayäkä tina, yao lotangomo Elambɔ ya Lieti.

² La kanga ebieti la batikasa loluka fofe yool’Inde; nde iyo lowanga to bato.

³ Limɔ Satana lɔɔtɛlɛ botema wa Yudasi wa Keliote oyatangomökö ɔmɔi wa eba liu la ambale.

⁴ Inde lɔkɛ okaongane la kanga ebieti la betoli oso ya basilikani litina mbo awambeke Yesu end’iyo.

⁵ Iyo loomala finɛ, la iyo lotikel’inde lisakä liofaef’inde bieto.

⁶ Yudasi lokulia loasɔ la inde lolukä fofe yowamba Yesu ani ekuke ya bato etiyale lau.

Elambɔ ya BaYuda

⁷ Limɔ lise lia elambɔ ya lituma loya, eloaakä lau ndoola bɔkɔkɔ wa Lieti.

⁸ Yesu lotoma Petelo la Yoane, Inde mbo— Kɛndɛkɛ okakomyel’iso Lieti mbo toleke liao.

⁹ Iyo lofel’Inde mbo— Olɛmbi mbo tokomyeke liao anima?

¹⁰ Inde loonga lau mbo— Toka, akaɔtɛk’ino nda okenge, lamao ototowana la botolome oyatoli tɛi ya balia, tutak’inde nda ndakɔ eyekaɔtɛk’inde.

¹¹ Limɔ ino koonga la ngɛnɛ wa ndakɔ-ao mbo— Boekesi asoonga laɛ mbo ¿Kuku ya ndakɔ eyetola’mi Elambɔ ya Lieti amamwito la baeki bami, anima to?

¹² Limɔ boto-ao atotamb’ino kuku efi ya likolo eyesotonjomo la baonga, komyielak’iso omao.

¹³ Iyo lɔkɛ, iyo lɔɛnɛ kwa aongiki Yesu lau, iyo lokomya Elambɔ ya Lieti.

Elambɔ ya Bɔkɔta

¹⁴ Ayäkä mbile ya bieka, Inde loyala se amamwito la batomomu liu la ambale,

¹⁵ Inde loonga lau mbo— Ko la yɛmɛ efi, ilɛmbi nde ndola Elambɔ-ye ya Lieti oso wa tokange etokokeke’mi;

¹⁶ isoonga nde lanu mbo— Itialek’imɔ liao kond’akakɔchɔmɔkɔ litina lia liao nda Bɔkɔta wa Mungu.

¹⁷ Limɔ Inde loaela kɔpɔ, Inde lofa Mungu kelekëlë, Inde mbo— Ɔsɔkɔ yao, kaelanaka yao, ino angɛnɛ;

¹⁸ eoka itoonga lanu mbo— Itiamwe imɔ liamɔ lia boliki kond’akayeke Bokota wa Mungu.

¹⁹ Lamao Inde lɔɔsɔ lituma, Inde lofa Mungu kelekëlë, Inde louna liao la Inde lofaef’iyo liao, Inde mbo— Liende bindo yami, ebifomu loasɔ loanu, kelaka ani ndoenyekela’mi.

²⁰ Inde lɔɔsɔ imɔ ko kɔpɔ ongoma mbisa yola, Inde mbo— E-kɔpɔ-ye yende Ngela Eyai eyetinyomu la bakila bami, ebatosendɔlɔmɔ eoka yanu.

²¹ Tɛnɛ ngo! Bosamba wa ona oyatowamba’mi bole eya amamwito lami nda lionga.

²² Wana wa Boto atɔkɛ okakɛ kwa atomökö loaso loande, nde aeko wale ende boto ona oyatowamb’Inde!

²³ Iyo loakola ndofelakana, iyo angɛnɛ, mbo ndai wau oyakakeleke eloasɔ-lo.

²⁴ La iyo lowesakana imɔ mbo ndai wau atotangomo ewoeta ebamɔi.

²⁵ Nde Yesu loonga lau mbo— Bɛkɔta ya biese yasi batokakales’iyo la eb’isosha likolo liau batotangomo mbo Bakelaolau.

²⁶ Kongo ko loti ongoma end’ino; nde oyo wanu oyaetami, ambo inde ayaleke kwa itungangɔlo, la botoli oso wanu, ayaleke kwa bosali.

²⁷ ¿Ndai to nd’atolongela, kwa inde oyatoyala se nda bieka kwa inde oyatokuwekel’inde nda lionga? Ati inde oyatoyala se ndola bieka? Kongo ko Imi yende sisi yanu kwa oyatokuwel’ino.

²⁸ Wende to ebasoumwaka lami nda bakɔtɔlɔmu bami;

²⁹ ongoma Imi nd’atof’ino isosha, kwa Sango wami nd’afäkä Imi Bɔkɔta,

³⁰ mbo ino boleke la bomweke nda lionga liami nda yakakaelo yami ya Bɔkɔta la ino bolayalaka nda kangala y’isosha ndokomya tukela liu la imbale ya BaIsalaele.

³¹ Simona, Simona, toka, Satana asofelak’ino mbo afɛfɛk’ino kwa atofɛfɔmɔkɔ bofonga,

³² kongo ko Imi nd’asosombola Mungu loasɔ loaɛ, mbo liimeli liaɛ litalewa, la akakalanganek’aɛ, wakɔkɔmɛsɛkɛ basaɔ baɛ.

³³ Petelo loonga lande mbo— Ngɛnɛ, yengani ndɔkɛ amamwito laɛ, angoko nda bɔnyɔlɔlɔ, ango nda liwa.

³⁴ Yesu mbo— Petelo, Imi nd’asoonga laɛ mbo kɔkɔ angotata lɔkɔ̈kɔ̈lɔ̈kɔ̈ louse-lo, oso ani okaanganyi’mi baanganya basatɔ mbo otiluwe’mi.

³⁵ Inde loonga lau mbo— ¿Atomäkä’mi ino lɔkɛndɔ angwɛnɛ litanga lia bieto, angwɛnɛ buku, angwɛnɛ tokwaka, waenökö nde yeka angɔmɔi? Iyo mbo— Totiaenöko yeka angɔmɔi.

³⁶ Inde loonga to lau mbo— Nde kwani, oyale la litanga lia bieto, ɔsɛkɛ liao la buku imɔ lisanga; nde oyati la chaka, atambeseke bisinda yande mbo asombeke ɛmɔi.

³⁷ Eoka isoonga lanu mbo biengani mbo yao ebiatomökö nda Lokasa bilakɔkɔmɔkɔ lami, biko mbo— Atangomökö nde ɔmɔi w’eba totefola twa bikela; eoka eyami bikɔchɔmɔkɔ nde.

³⁸ Iyo mbo— Ngɛnɛ, tɛnɛ to chaka bimbale-bi! Nde Inde loonga lau mbo— Sɛlɛkɛ eya!

Elanga ya Ngetesemane

³⁹ Akuswäkä Yesu, Inde lɔkɛ nda löngo loa Elaya, kwa akɛk’Inde lise la lise la baeki bande lotut’Inde.

⁴⁰ Iyäk’Inde nda elanga, Inde loonga lau mbo— Sombolaka mbo otakwa nda lisoshelomu.

⁴¹ Inde lɔkɛ sumbu isisika lau, kwa atokɔkɔlɔ okushomo lisasɛ, amao Inde loswa balui se, Inde losombola mbo—

⁴² Sango, bosanga ongoma, sokoelaka’mi ekɔpɔ-ye, inga to lisangi liami, kangä eliaɛ likelomoko.

⁴³ Lamao bokitomo oyasekwi nda use lɔɛnɛlɛ end’Inde, inde lɔɔlɛsɛ Yesu bofoka.

⁴⁴ Ayalak’Inde la bonui wa likama, Inde losombokola la bofiimbi, la bilungu lotɔnɔkɔ se nda nyɛlɛ kwa baongö ba bakila.

⁴⁵ Emaläk’Inde mbisa ya lisomboli, Inde lɔkɛ ende baeki bande, Inde loosh’iyo baingali ilɔ sha ikɛnɛnɛ;

⁴⁶ Inde loonga lau mbo— ¿Oingali nde moni? Emalaka la sombolaka mbo otaɔtɔ nda lisoshela.

Liwambomu la liundomu lia Yesu

⁴⁷ Aäkä Inde atoonga, kwaamao, ekuke ya bato loya amamwito lande oyatangomu Yudasi, ɔmɔi w’eba liu la ambale, inde lotol’iyo oso; inde losishana la Yesu okaumb’Inde ichɔu.

⁴⁸ Nde Yesu loonga lande mbo— ¿Yudasi, ko la ichɔu otowamba nde Wana wa Boto?

⁴⁹ Limɔ ɛnɛ̈kɛ̈ ebakɛsɛni lande loaso eloyi oko tina, iyo mbo— Ngɛnɛ, Tosw’iyo la ambɔtɛ?

⁵⁰ Ɔmɔi wau loswa bɔkɔwa wa kanga eyeti, inde lotena litoi liande lia fangi y’olome.

⁵¹ Yesu mbo— Taofe, macha eya! Inde lomata litoi, Inde losäsesa liao.

⁵² Limɔ Yesu loonga la kanga ebieti la betoli oso ya basilikani ba ndakɔ ya Mungu la biange ebayäkä oyundes’Inde, Inde mbo— ¿Oyeli nde’mi la chaka la totumbe, kwa mbo yende booni?

⁵³ Ayaläkä’mi lanu lise la lise nda ndakɔ ya Mungu, otisisheke’mi besamba yanu; kongo ko mbile-ye ende fofe yanu la eya bofoka wa lilima.

Lianganyi lia Petelo

⁵⁴ Iyo loundesa Yesu, iyo lɔkɛs’Inde nda ndakɔ ya kanga eyeti; nde Petelo lotuta esika.

⁵⁵ Anesäk’iyo bösä atiteni ya lɔ̈mbɔ, iyo loyala se la Petelo loyala se amamwito lau.

⁵⁶ Nde boseka ɔmɔi lɔɛn’inde ani ayali se nda liangangi lia bösä, la boseka losw’inde bonono, limɔ inde mbo— Oyo imɔ ayaliki lande.

⁵⁷ Nde Petelo loanganya mbo— Botomali, itiluwe Inde.

⁵⁸ Mbisa ya mbile sinyo, wasi lɔɛnɛ inde, inde mbo— Aɛ imɔ wende ɔmɔi wau. Nde Petelo mbo— Boto, iti wau.

⁵⁹ Mbisa ya saa ɛmɔi, boto wasi loonga la boliliya mbo— Wewe, la boto-yo ayaliki imɔ lande, la ale imɔ wa Ngalilai.

⁶⁰ Kongo ko Petelo loonga mbo— Boto, itiluwe elosoonga aɛ. Kwaamao, ani Petelo akoonga, kɔkɔ lota lokɔ̈kɔ̈lɔ̈kɔ̈.

⁶¹ Ngɛnɛ lokikwa, Inde lotichaka Petelo, lamao Petelo loenyela lioi eliaongäkä Yesu lande, mbo— Oso ani kɔkɔ ekati lɔkɔ̈kɔ̈lɔ̈kɔ̈ louse-lo, otoanganya’mi baanganya basatɔ.

⁶² Inde lokuswa lousa, inde lolela kɛlɛlikɛlɛli.

⁶³ Limɔ batolome ebaundäkä Yesu lomuchamucha Inde, iyo lokuchak’Inde;

⁶⁴ limɔ alinjäk’iyo baiso bande, iyo lofelak’Inde mbo— Tɔndɔlɔkɔ; ¿Oyo ndai oyasokuch’Aɛ?

⁶⁵ Iyo losungakel’Inde la baoi basi wike.

⁶⁶ Atwäkä bonyanya, limɔ biange ya bato la kanga ebieti la baekesi ba Bikela losɔngɔkɔmɔ la iyo lɔkɛsɛ Yesu nda ikumbɛ shau, limɔ iyo mbo—

⁶⁷ Eya mbo wende Masiya, kambesaka to iso. Inde loonga to lau mbo— Yekambes’ino, ino angoimela;

⁶⁸ yefelak’ino, ino angomutoela’mi.

⁶⁹ Ko kwani Wana wa Boto eyalaka se nda bosamba w’olome wa bofoka wa Mungu.

⁷⁰ Batotina loonga mbo— ¿Aɛ wende to Wana wa Mungu? Inde loonga lau mbo— Ino nd’aongi mbo yende ongoma.

⁷¹ Limɔ iyo mbo— ¿Twende imɔ la boeno wa tɔtɔmbɔ twasi? Iso angɛnɛ, tosooka ko nda bɔnɔkɔ wande angɛnɛ.