Luka 21 - Le Nouveau Testament in Kele (Lokele) 1958

Lifaefi lia Oyawelu Olome

¹ Iläk’Inde baiso likolo, Inde lɔɛnɛ bato ani batotaka lifaefi liau nda sanduku ya lifaefi, bamɔi bafoka,

² nde Inde lɔɛnɛ imɔ ko otomali oyawelu olome iuwe ani atota bakute ambale ina.

³ Yesu mbo— Wewe itoonga lanu mbo lotika-lo ende iuwe nde asota yao yoeta eya batotina;

⁴ eoka iyo ana batotina, basokusola sinyo sha lilya liau nda lifaefi, kongo ko inde oyale la iuwe asokusola bitotina, ango yao imɔ ebilendeluku inde.

Lambaka la wɛlï-Boimo wa Yesu

⁵ Aongäkä bamɔi loasɔ loa ndakɔ ya Mungu mbo eswomu nde la batalɛ bafi ba bɔfɛkɔ la biengo ebikusolomu nda lifaefi, Yesu mbo—

⁶ Yao ina ebisomwaal’ino, ambo mbile elayaka olo angwɛnɛ litalɛ ango limɔi lilamachomoko likolo lia liasi, batotina belaukolomoko.

⁷ Iyo lofelak’Inde mbo— ¿Boekesi, eni to mbile eyekayeke njasɔ-bi la eni ndembe yolembeela mbo bisamboya?

⁸ Inde loonga to mbo— Lambaka la wɛlï mbo botalimbomo, eoka bato wike batoya nda lina liami, ani batoonga mbo— Imi yende Inde; la mbo— Mbile esamboya. Otutëke to iyo!

⁹ Nde atook’ino mboli ya bita la liyɛyɛ lifi, owëke la iwaesa eoka yao bilayaka nde, kongo ko losilo loitoya lisasaya.

¹⁰ Limɔ Inde loonga lau mbo— Yese la yese bitowesana, la bɔkɔta la bɔkɔta batowesana;

¹¹ lotukeso loa nyɛlɛ lofi la elela la elela, fondo la tɔtɔ̈kɔ twa loo la towaesa la tokesa twa use toyaka.

¹² Nde oso wa ebitotina-bi batotel’ino njala yau, batokongolak’ino, batokɛs’ino nda bisɔngɔmɛlɔ la nda bɛnyɔlɔlɔ, batosulyak’ino oso wa bɛkɔta la bakomanda eoka ya lina liami.

¹³ Yao nd’atoya la fofe yanu yoongela’mi oso wau.

¹⁴ Enyelaka to, otakelëke to olenda eoka ya baoi bomutoel’iyo,

¹⁵ eoka Imi nd’atofaef’ino liasala la wɛlï ebitialonge biyani bitoti lanu ofenyakana ango ofekela.

¹⁶ Kongo ko otowambomo ko l’ebaot’ino la bitungani yanu l’eba bɛkɔ̈kɔ yanu la baina lanu la bamɔi banu batoolomo lau;

¹⁷ batotina batoiyana lanu eoka ya lina liami.

¹⁸ Nde angwɛnɛ loswee ango lɔmɔi loa betö yanu kosɛɛsɛlɛ.

¹⁹ Ko la boliliya wanu ino bolakɔkɔmɛsɛ balimo banu la liwawi.

²⁰ Akɛnɛk’ino wɛnɛ Yelusaleme bolingelomu la bikuke ya bita, limɔ waluwa mbo bɔlɛlɔ wa liömä bosamboya.

²¹ Lamao eba Yudea bakweke mangu konda föngo la ebatoyalaka atiteni ya okenge bakuswakusweke la ebatoyalaka nda lousa nda bilanga bainwëk’imɔ okenge.

²² Eoka ebacho-ba bende bacho ba likundeli la likuchi, nda bao bitotina eyatomökö nda Lokasa loa Mungu bilakɔchɔmɔkɔ.

²³ Aeko wale ende batomali ba lieme la ebatomwesa bana baɛlɛ nda bacho ana! Bifembi bifi nde bilayalaka nda yese etotina-ye la luno lolayalaka ende bato-ba.

²⁴ Bato-ao belatindomoko la chaka, belaindomoko kala ndokɛsɔmɔ bɛkɔwa nda biese yasi bitotina; bokengɛ wa Yelusaleme bolamatekelomoko la batindi ba ebati BaYuda kond’akasileke mbile ya ebati BaYuda.

²⁵ Bisisho bilɛnɛlɛkɛ nda liso lia use, nda tengai, la nda tolonge la nda wenda-bo toloi la loeyaeyo bilakwaka ende bato ba yese bitotina, eoka ya balundi ba balia la batutu ba eliya eyefi.

²⁶ Bato belalɛkwaka la bɔwa woenyelaka njasɔ ebikayeke nda wenda-bo, eoka befoka ya use belatukatuka.

²⁷ Limɔ bɛlɛnɛkɛ Wana wa Boto atoya nda bafita la bofoka la bɔfɛkɔ finɛ.

²⁸ Nde akaakoleke ebitotina-bi ndoya, limɔ yaimwaka yai la ilaka betö yanu likolo, eoka loendolomo loanu losamboya.

²⁹ Limɔ Yesu lotel’iyo bombila, Inde mbo— Tichaka bosau, ango ko isandu shasi imɔ;

³⁰ atofɛtɛ wao la kasa, osɔɛnɛ la ino angɛnɛ otolüwa mbo mbile ya eula esamboya.

³¹ Ko ongoma akɛnɛk’ino wɛnɛ enjasɔ-bi bisoya, lüwaka mbo Bɔkɔta wa Mungu bosoya tina.

³² Itoonga lanu wewe mbo— E-fɛtɔ-ye eitosila oso ani ebitotina-bi bikayi;

³³ use la se bilawanjwaka bao, kongo ko baoi bami batilawanjwek’imɔ.

³⁴ Lambaka la wɛli mbo betema yanu bitawa kwa afofa yeka la liwa änä la bifembi ya liwawi-li la bocho ona botaundes’ino futuku kwa lisɔngɔ lia ilonga,

³⁵ botoosha nde batotina ebatoyala fangi la fangi nda wenda-bo.

³⁶ Eokao yalaka la botengu la sombolaka mbile bitotina, mbo bolongeke ndosokwaka bitotina-bi ebisamboya la ndoemesana oso wa Wana wa Boto.

³⁷ Lise la lise Yesu loekekesa bato nda ndakɔ ya Mungu, nde la ocho Inde lokuswaka okaingala nda Löngo loa Elaya.

³⁸ Bato batotina lokɛsɛnɛ end’Inde la nɔngɔnɔngɔ nda ndakɔ ya Mungu ndokok’Inde.