Luka 20 - Le Nouveau Testament in Kele (Lokele) 1958

Lofelo eoka ya Isosha sha Yesu

¹ Lise limɔi aekesäk’Inde bato nda ndakɔ ya Mungu, la anangoeläk’iyo Mboli Ilau, kanga ebieti la baekesi ba Bikela la biange loosh’Inde,

² iyo loonga lande mbo— Kambesak’iso, ¿Otokelaka njasɔ-bi la sini isosha? ¿Ale to ndai oyasof’Aɛ isosha-si?

³ Inde lomutola lau mbo— Imi imɔ nd’atofel’ino lofelo; kambesaka’mi to; ¿Lilufi lia Yoane moni, liaäkä lia Use, kwa lia bato?

⁵ Iyo angɛnɛ lotafelakana, mbo— Eya mbo toonga mbo liaka elia Use, limɔ Inde koonga lasu mbo— ?Eokao, monito otiaimelak’inde?

⁶ Nde toonga mbo— Elia bato, limɔ batotina batokushel’iso batalɛ, eoka basoimela mbo Yoane aaka Bɔtɔndɔli.

⁷ Iyo lomutoela Yesu mbo batiluwe olo asokwi la liao.

⁸ Yesu loonga lau mbo— La Imi imɔ angokambes’ino isosha esitokela’mi la njasɔ-bi.

Bombila wa Balɔi babe

⁹ Limɔ Inde loakola ndotela bato ebombila-bo. Oto ɔmɔi alɔɔ̈kɔ̈ elanga ya tuma inde lomachela balɔi elanga, limɔ inde lɔkɛ yese yasi okaumwa omao.

¹⁰ Ayäkä mbile ya eula ya tuma, inde lotoma bɔkɔwa ende balɔi mbo bafaefek’inde tuma twa elanga yande, kongo ko balɔi lokuchak’inde, iyo losaya bɔkɔwa besamba wawa.

¹¹ Limɔ Inde lotomel’iyo bɔkɔwa wasi, iyo lokuchak’imɔ ko inde, iyo lokeel’inde sɔni, iyo losay’inde besamba wawa.

¹² Liasi imɔ, inde lotoma ewa asatɔ, iyo loswel’Inde bafwa, iyo loilya inde lousa loa elanga.

¹³ Limɔ ngɛnɛ wa elanga loonga mbo— Yekelaka nd’iye? Yetomaka wana wami ebosamomu, eluwa batolites’inde.

¹⁴ Kongo ko ɛnɛ̈kɛ̈ balɔi wɛnɛ wana iyo loongana mbo— Oyo ende bosangesi wa botiko, toolek’inde mbo botiko boyaleke ewasu.

¹⁵ Ongoma iyo loumbol’inde lousa loa elanga, iyo lool’inde. ¿Ngɛnɛ wa elanga ekeelaka balɔi moni?

¹⁶ Eyaka nde la atosɛɛsɛlɛsɛ balɔi ana la efaka bato basi elanga yande. Okäkä bato ongoma, iyo loonga mbo— Loyalëke ongoma!

¹⁷ Nde Yesu lowɛlɛ iyo bonono, Inde mbo— Ongoma to, litina moni lia lioi-li eliatomökö nda Lokasa (loa Mungu) mbo— Litalɛ lina elisofeka baswi, Liao lisoswomo nda botö wa ndakɔ?

¹⁸ Boto oyatokwa likulya nda litalɛ-li, inde kounya; liao likwa likolo lia boto, liao komiak’inde kwa fututi.

¹⁹ Kanga ebieti la baekesi ba Bikela lokotaka ndoundes’Inde ko nda mbile-ao kongo ko iyo lowänga bato eoka iyo lolüwa mbo Yesu asotombol’iyo nda bombila-bo.

Bosɔmbi wa Kaisala

²⁰ Iyo lowɛlɛ Yesu baiso lamao iyo lotoma tɔtɔmbi ebakwekeläkä bato ba momongo ebatoyalaila baoi bande mbo ko l’eoka ya lioi, iyo kowamb’Inde ende oyo w’isosha la likomyi ako Komanda.

²¹ Eba lofel’Inde mbo— Boekesi, tosolüwa mbo otoongaka la mbo otoekekesa ko yao ebiengani chaa la oitokwelakwela bɔmbɔ wa boto nde otoekekesa mboka ya Mungu la wewe;

²² ¿Losoengana lasu ofaefa Kaisala bɔsɔmbi, kwa angofa?

²³ Kongo ko Yesu loleembela bɔlɔwäne wau, Inde loonga lau mbo— Tambaka’mi lofalanga.

²⁴ ¿Lole la bolendela wa ndai la lisɔni lia ndai? Iyo mbo— Eya Kaisala.

²⁵ Yesu loonga to lau mbo— Eokao, inolaka to ende Kaisala ko eya Kaisala, inolaka ende Mungu ko eya Mungu.

²⁶ Batiakɔkɔlɔk’imɔ ndound’Inde nda lioi lina oso wa bato nde iyo lomwaala limutoli liande, iyo loyalaka tau.

Litɛmwi nda Liwa

²⁷ Limɔ bamɔi ba BaSadoke loya end’Inde ebaitoimela litɛmwi nda liwa; iyo lofela Yesu mbo—

²⁸ Boekesi, Mɔsɛ nd’atelak’iso lokasa mbo, boloo ewa la wali ani atiote wana, limɔ etungani atosangola lotika loa boloo mbo aoteleke boloo wana.

²⁹ Baäkä nde batolome bosambale, bana ba sango ɔmɔi; boloo wau losɔngɔ wali la inde lowa, angwɛnɛ wana,

³⁰ limɔ ewa ambale losangola lotika,

³¹ la ewa asatɔ ko ongoma, iyo bosambale ko ongoma nde batiote wana;

³² limɔ otomali lowa liili.

³³ ¿Eokao, nda litɛmwi nda liwa, otomali atoyala wali wa ndai, eoka iyo batotina bosambale basɔngɔ̈kɔ̈ ko inde?

³⁴ Yesu loonga lau mbo— Bana ba wenda-bo batosɔngɔ la batosɔngɔmɔ,

³⁵ kongo ko ebaondu nde ndoiyela wenda ona la litɛmwi nda liwa, iyo ana baitosɔngɔ la baitosɔngɔmɔ;

³⁶ la batikɔkɔlɛ imɔ ndowa liasi, eoka bengani bakitomo; bende bana ba Mungu eoka mbo bende bana ba litɛmwi nda liwa.

³⁷ Ko Mɔsɛ angɛnɛ nd’aluwesäk’iso nda lokasa loande loaso loa Isasandu mbo ebasowa batotɛmwa nda liwa; omao inde loonga mbo Ngɛnɛ Mungu wa Abalayama, Mungu wa Isaka, Mungu wa Yakobo.

³⁸ Ati to Mungu wa ebawi, kangä wa ebale la liwawi, eoka end’Inde batotina bale la liwawi.

³⁹ Limɔ bamɔi ba baekesi ba Bikela lomutoel’Inde mbo— Boekesi, oongi nde lioi lilau finɛ,

⁴⁰ eoka batiatendeläkä imɔ ofel’Inde lofelo ango lɔmɔi.

⁴¹ Limɔ Yesu loonga lau mbo— ¿Monito batoonga mbo Masiya ende wana wa Dawidi?

⁴² eoka Dawidi angɛnɛ nda Lokasa loa Bɛɛlɛ loonga mbo— Ngɛnɛ loonga la Ngɛnɛ wami mbo— Yalaka se nda bosamba wami wa olome,

⁴³ Kond’atosɛlɛ’mi baiyani baɛ ose ya batindi baɛ kwa esolo.

⁴⁴ Ongoma Dawidi lotang’Inde mbo Ngɛnɛ; ¿Ale to wana wande imɔ la moni?

⁴⁵ Nda batoi ba bato batotina Inde loonga la baeki bande mbo—

⁴⁶ Lambaka batikasa ebalɛmbi okɛndɛkɛndɛ la bisinda bisa la mbo balamolomoko nda baongo la mbo bafomoko kangala ya betoli oso nda bisɔngɔmɛlɔ la bilela ya oso nda bilambɔ.

⁴⁷ Batɔɔsɔkɔ ndakɔ ya ebawelu olome; la batosombolaka basomboli ba yumwa ko la bolimbake wau. Nde belafomoko se la likuchi lioeta.