Luka 19 - Le Nouveau Testament in Kele (Lokele) 1958

Sakayo wa Yeliko

¹ Yesu lɔɔtɔ nda Yeliko la Inde lotandela bokenge, la

² aäkä omao boto, lina liande liko Sakayo, inde ayaläkä Bokumi wa basɔnjaki ba bɔsɔmbi la aäkä lifoka.

³ Sakayo loluka fofe yɔɛnɛ ani ayali Yesu, kongo ko atiakɔkɔlɔ̈kɔ̈ eoka ya ekuke ya bato, litina mbo aäkä buwe.

⁴ Nde inde lokwa mangu oso w’ato, inde lolila isandu sha liönjï mbo ɛnɛkɛ Yesu eoka loäkä nde mbo Yesu eteke bokenge la mboka ena.

⁵ Ayäkä Yesu nda elela ena, Inde loila baiso likolo, Inde loonga lande mbo— Wendesa, Sakayo, sulwaka se, eoka louse lole loami ndoyala nda ndakɔ yaɛ.

⁶ Limɔ Sakayao loumama osulwa se, inde lonyangela Yesu la limɛngɔ.

⁷ Ɛnɛ̈kɛ̈ bato ongoma, iyo yaatotina loimaima, iyo mbo— Asɔkɛ okaingala nda ndakɔ ya boto obe.

⁸ Kongo ko Sakayo loemala fii, inde loonga la Ngɛnɛ mbo— Tɛnɛ ngo, Ngɛnɛ, itofaefa eba touwe botüku wa biengo la bieto yami; yaambo yɔnɔkɔlɔ̈kɔ̈ yeka ende boto la wiya, itoinola yao binɛi binɛi nda lɔmɔi lɔmɔi.

⁹ Yesu loonga lande mbo— Louse liuwesi lisoya nda e-ndakɔ-ye, eoka inde nd’ale imɔ wana wa Abalayama.

¹⁰ Wana wa Boto asoya nde ko ndoluka la ndoyuwesa oyasolefa.

Bɔkɔwa wa lotimbana la ewa booshaosha

¹¹ Okäka’iyo ebaoi-ba, Yesu loonga imɔ ko liasi, Inde lotel’iyo bombila eoka asoya oko tina la Yelusaleme la eoka mbo batangäkä nde mbo Bɔkɔta wa Mungu bosamboya kwaamao nda mbil’ao.

¹² Eokao Inde loonga mbo— Boto ɔmɔi wa bɔkɔ̈kɔ wa bɔkɔta, lɔkɛ lɔkɛndɔ nda yese y’esika ndokafomo isosha sha bɔkɔta, limɔ ndoinwa liasi.

¹³ Nde inde lota bɛkɔwa yande liu lioi, inde lofaef’iyo mia liu ya falanga, oto la oto mia ɛmɔi, inde loonga lau mbo— Timbesaka bokalala la yao, konda akainweke’mi.

¹⁴ Nde bato ba bokenge wande angɛnɛ loiyel’inde, iyo lotoma ikomya sha wange ombisa yande okaonga lande mbo— Totilɛmbɛ mbo oyo ayaleke bɔkɔta wasu.

¹⁵ Loaaka mbo, ainwäk’inde ani asosila ndɔɔlɔ isosha sha bɔkɔta, inde loonga mbo bɛkɔwa ena ebifak’inde of’iyo mia ya falanga bayeke oso wande, mbo aluweke botalia ebosɔɔl’iyo nda bokalala wau.

¹⁶ Ewa oso loya, inde mbo— Ngɛnɛ, mia yaɛ ɛmɔi esokondela mia liu.

¹⁷ Ngɛnɛ loonga lande mbo— Eingo ko, bɔkɔwa olau ako aɛ, eoka osokɔcha loasɔ lona lɔkɛkɛ, ɔlɔkɔ isosha shokomya bekenge liu.

¹⁸ Ewa ambale loya la inde mbo— Ngɛnɛ, mia yaɛ ɛmɔi esokondela mia bɔɔmwi.

¹⁹ Ngɛnɛ loonga imɔ lande mbo— Aɛ imɔ, ɔlɔkɔ isosha sha bekenge bɔɔmwi.

²⁰ Limɔ wasi loya, inde mbo— Ngɛnɛ, tɛnɛ mia yaɛ ena, eyüchiki’mi nda itambala;

²¹ eoka yawangäk’aɛ eoka wende boto owaü, la otoilaka yeka ebititek’aɛ se, la ototwaka bina ebitilɔɛk’aɛ.

²² Ngɛnɛ loonga lande mbo— Ko la lioi lia bɔnɔkɔ waɛ angɛnɛ, isotenel’aɛ loasɔ-lo, aɛ bɔkɔwa obe, oluwiki nde mbo yende boto owaü, la mbo itoilaka yeka ebititeke’mi se, la mbo itotwaka bina ebitilɔɛkɛ’mi;

²³ eokao monito otiafäkä bieto yami ende bato ebatoisaka yao la bɔsɛɛli, mbo akainyweke’mi, yaɔlɔ eyami bieto la bɔsɛɛli lisanga?

²⁴ Ngɛnɛ loonga la ebande ebemaläkä omao mbo— Ɔnɔkɔɛlɛk’inde mia ena, faka inde oyayali la mia liu.

²⁵ Nde bamɔi loonga lande mbo— Ngɛnɛ ale to la mia liu.

²⁶ Ngɛnɛ lomutola mbo— Itoonga lanu mbo inde oyasɛli yeka, efomoko yasi; nde oyatisɛlɛ yeka, atɔɔnɔkɔɛlɔmɔ ko yao eyesɛl’inde.

²⁷ Nde loasɔ loa ebaiyeläkä’mi, ebatialɛmbɛkɛ mbo iyaleke Bɔkɔta wau, eshaka iyo eyamaya, singesa iyo oso wami!

Yesu loiya nda Yelusaleme

²⁸ Asiläkä Yesu ndoonga, Inde loetel’iyo oso okakɛ likolo nda Yelusaleme.

²⁹ Iyak’Inde tina la Betefange I la Betania nda löngo eloatangomökö Löngo loa Elaya, Inde lotoma baeki bambale bande lotomo,

³⁰ Inde mbo— Takɛndɛkɛ nda bokenge ebole oso wanu, la akaɔtɛk’ino ina, otoosha efembeli ya punda ekandomu, boto ayayali kɔni nda bɔkɔngɔ wa yao, faikolaka yao, eshaka yao lono.

³¹ Boto efel’ino mbo— ¿Monito otofaikola yao? ongoma ino koonga lande mbo— Ngɛnɛ asoeno yao

³² Baeki ebatomomökö, lɔkɛ, iyo loosha loasɔ chaa kwa aongi Yesu lau.

³³ Afaikoläkä’iyo efembeli ya punda, bangɛnɛ ba yao loonga lau mbo— ¿Otofaikola efembeli ya punda monito?

³⁴ Iyo loonga mbo— Ngɛnɛ asoeno yao.

³⁵ Limɔ iyo loesha yao ende Yesu; iyo lotalia bisinda yau nda bɔkɔngɔ wa yao la iyo loyalesa Yesu olikolo.

³⁶ Aɛk’Inde ongoma, iyo lofalola bisinda yau se nda mboka.

³⁷ Asishanäk’Inde tina la bokenge, olo asulwi mboka se nda löngo loa Elaya, ekuke etotina ya baeki loakola ndoficha limɛngɔ la ndoinakela Mungu la limiki lifi eoka ya bisisho ebiɛnɛ̈k’iyo,

³⁸ iyo mbo— Limɛngɔ la Bolau ende Bɔkɔta oyasoya nda lina lia Ngɛnɛ; Lilatemi olo nda Use la loomalo lofi anamana nda isɔkɔ sha Use.

³⁹ BaFalusi bamɔi ebayaläkä nda ekuke loonga lande mbo— Boekesi, imaka baeki baɛ.

⁴⁰ Inde lomutola lau mbo— Isoonga lanu mbo ango beyala ngo tau, ambo batalɛ nde koanjanja.

⁴¹ Iyäkä Yesu tina, Inde lotangela bokenge, Inde loleela wao,

⁴² Inde mbo— Aɛ Yelusaleme, Eya mbo boluwa ambo louse-lo, ko yao ebisikioeshel’aɛ lilatemi! Kongo ko bisoisomo mbo otɛnɛ yao.

⁴³ Kongo ko mbile eyaka nde ani biyani laɛ beswelaka likula lia bita liolingel’aɛ; bekufesak’aɛ la ndokuswaka la ndɔɔtɔkɔ;

⁴⁴ betulunga bokenge la bana baɛ, angomacha litalɛ olikolo lia litalɛ ango limɔi, eoka otilembeeleke yose ya lotichako loaɛ.

Lotaneso loa balɛlɛ ba Tempelo

⁴⁵ Lamao Inde lɔɔtɔ nda Ndakɔ ya Mungu, Inde loakola ndokusola bato ebatoungesa yeka omao.

⁴⁶ Inde mbo— Losɔnɔmu nda lokasa mbo Ndakɔ yami etotangomo ndakɔ ya lisomboli, nde ino nd’asokela la yao, ko lisɛkɔ lia eba biya.

⁴⁷ Yesu loekekesäkä bato lise la lise omao nda Ndakɔ ya Mungu. Kongo ko kanga ebieti la baekesi ba Bikela amamwito la betoli oso ya bato imɔ, iyo loluka fofe yool’Inde,

⁴⁸ kongo ko batiɛnɛ̈kɛ̈ yao eoka bato batotina lowɛlɛ Inde bonono wookamela lioi liande.